അമേരിക്കൻ എച്ച്​-1ബി വിസയുടെ രജിസ്​​ട്രേഷൻ മാർച്ച്​ ഒന്നിന്​​ തുടങ്ങും

വാഷിങ്​ടൺ: 2023 സാമ്പത്തിക വർഷത്തേക്കുള്ള എച്ച്​-1ബി വിസകൾക്കുള്ള പ്രാരംഭ രജിസ്ട്രേഷൻ മാർച്ച് ഒന്നിന്​ ആരംഭിക്കുമെന്ന്​ യു.എസ് സിറ്റിസൺഷിപ്പ് ആൻഡ് ഇമിഗ്രേഷൻ സർവിസസ് (USCIS) അറിയിച്ചു. മാർച്ച് 18 വരെ രജിസ്റ്റർ ചെയ്യാം. ഓൺലൈൻ സംവിധാനം ഉപയോഗിച്ചാണ്​ രജിസ്റ്റർ ചെയ്യേണ്ടത്​.

ഇങ്ങനെ രജിസ്റ്റർ ചെയ്യുന്നവർക്ക്​ ഒരു സ്ഥിരീകരണ നമ്പർ നൽകും. ഈ നമ്പർ ഉപയോഗിച്ച്​ രജിസ്ട്രേഷൻ ട്രാക്ക് ചെയ്യാൻ കഴിയും. അതേസമയം, ഇതുപയോഗിച്ച്​ കേസ് സ്റ്റാറ്റസ് ട്രാക്ക് ചെയ്യാൻ സാധിക്കില്ല. 10 ഡോളറാണ് രജിസ്ട്രേഷൻ ഫീസ്.

സാങ്കേതിക വിദഗ്​ധരായ വിദേശികൾക്ക്​ യു.എസിൽ തൊഴിലെടുക്കാൻ അനുവദിക്കുന്ന സ​മ്പ്രദായമാണ്​ എച്ച്​-1ബി വിസ. ഇന്ത്യ, ചൈന പോലുള്ള രാജ്യങ്ങളിൽനിന്ന്​ ആയിരക്കണക്കിനാളുകളാണ്​ യു.എസിൽ എച്ച്​ -1ബി വിസ ഉപയോഗിച്ച്​ തൊഴിലെടുക്കാൻ എത്തുന്നത്​.

ഐ.ടി കമ്പനികളിൽ ജോലി ചെയ്യുന്ന ഇന്ത്യക്കാരാണ് ഏറെയും ഇതിന്‍റെ ഗുണഭോക്താക്കൾ. എല്ലാ വർഷവും 65,000 പുതിയ എച്ച്–1ബി വിസകളാണ് യു.എസ് അനുവദിക്കുന്നത്.