മോദിയെ ജനാധിപത്യ സംരക്ഷണം ഓർമിപ്പിച്ച്​ കമല ഹാരിസ്​

വാഷിങ്​ടൺ: യു.എസ്​ സന്ദർശനത്തിനെത്തിയ പ്രധാനമന്ത്രി നരേന്ദ്രമോദിയോട്​ ജനാധിപത്യ സ്ഥാപനങ്ങളെയും തത്ത്വങ്ങളെയും ഉയർത്തിപ്പിടിക്കേണ്ടതിന്‍റെ ആവശ്യം ചൂണ്ടിക്കാട്ടി യു.എസ്​ വൈസ്​ പ്രസിഡന്‍റ്​ കമല ഹാരിസ്​. ലോകമെങ്ങുമുള്ള ജനാധിപത്യ സംവിധാനങ്ങൾ ഭീഷണി നേരിടുകയാണെന്നും അവയെ സംരക്ഷിക്കേണ്ടത്​ നമ്മുടെ അനിവാര്യതയാണെന്നും, ഇരുവരും ചേർന്ന്​ നടത്തിയ സംയുക്ത വാർത്തസമ്മേളനത്തിൽ കമല ഹാരിസ്​ എടുത്തു പറഞ്ഞു.

2020ലെ ആഗോള ജനാധിപത്യ റാങ്കിങ്ങിൽ ഇന്ത്യ പിറകോട്ടുപോയ സാഹചര്യത്തിൽ യു.എസ്​ വൈസ്​ പ്രസിഡന്‍റിന്‍റെ ജനാധിപത്യ സംരക്ഷണ പരാമർശം ശ്രദ്ധേയമായിരിക്കുകയാണ്​.

''ലോകമെങ്ങുമുള്ള ജനാധിപത്യ സംവിധാനങ്ങൾ ഭീഷണി നേരിടുന്ന സാഹചര്യത്തിൽ നമ്മുടെ രാജ്യങ്ങളിലും മറ്റു രാജ്യങ്ങളിലും ജനാധിപത്യ തത്ത്വങ്ങൾ മുറുകെപിടിക്കൽ അനിവാര്യമായിരിക്കുകയാണ്​. അതു​െകാണ്ടുതന്നെ നമ്മുടെ രാജ്യനിവാസികൾക്കായി ജനാധിപത്യത്തെ നാം സംരക്ഷിക്കേണ്ടിയിരിക്കുന്നു.'' -കമല പറഞ്ഞു.

ജനാധിപത്യത്തോട്​ ഇന്ത്യൻ ജനതക്കുള്ള പ്രതിബദ്ധത ത‍​െൻറ സ്വന്തം അനുഭവത്തിലൂടെയും കുടുംബത്തി‍െൻറ അനുഭവത്തിലൂടെയും മനസിലാക്കിയിട്ടുണ്ടെന്നു പറഞ്ഞ കമല, ജനാധിപത്യ സ്ഥാപനങ്ങളെക്കുറിച്ചും തത്ത്വങ്ങളെക്കുറിച്ചും നമുക്കുള്ള കാഴ്ചപ്പാടുകൾ ശക്തിപ്പെടുത്താമെന്നും കൂട്ടിച്ചേർത്തു.

യു.എസ്​ പ്രസിഡന്‍റ്​ പദവിയിലേക്കുള്ള ജോ ബൈഡ‍​െൻറ വിജയം അംഗീകരിച്ചുകൊണ്ട്​ കാപിറ്റോൾ ഹില്ലിൽ അമേരിക്കൻ കോൺഗ്രസ്​ ചേർന്ന​േപ്പാൾ ട്രംപ്​ അനുകൂലികൾ നടത്തിയ ആക്രമണവും കമല ഹാരിസി‍െൻറ പരാമർശങ്ങൾക്കു നിദാനമായെന്നും ചൂണ്ടിക്കാട്ടപ്പെടുന്നു.

ലോകത്തെ ഏറ്റവും വലുതും വിജയകരവുമായ രണ്ടു ജനാധിപത്യ രാജ്യങ്ങളാണ്​ ഇന്ത്യയും അമേരിക്കയുമെന്ന മഹത്തായ കാര്യം കമല ഹാരിസ്​ എടുത്തു പറയുകയായിരുന്നുവെന്നാണ്​ ഇതു സംബന്ധിച്ച മാധ്യമ ചോദ്യങ്ങൾക്ക്​ ഇന്ത്യൻ വിദേശകാര്യ സെക്രട്ടറി ഹർഷ്​ വർധൻ ഷ്രിംഗ്ല പ്രതികരിച്ചത്​. ''തങ്ങളുടെ സ്വന്തം രാജ്യങ്ങളിൽ മാത്രമല്ല ജനാധിപത്യമെന്ന ബ്രാൻഡിനെ മറ്റു രാജ്യങ്ങളിൽ കൂടി പ്രചരിപ്പിക്കാൻ ഒന്നിച്ചു പ്രവർത്തിക്കണമെന്നാണ്​ യു.എസ്​ വൈസ്​ പ്രസിഡന്‍റ്​ പറഞ്ഞത്​'' -ഷ്രിംഗ്ല കൂട്ടിച്ചേർത്തു.