ബൈഡനും ഭാര്യയും തിങ്കളാഴ്ച കോവിഡ്​ വാക്​സിൻ സ്വീകരിക്കും

വാഷിങ്​ടൺ: നിയുക്ത യു.എസ്​ പ്രസിഡന്‍റ്​ ജോ ബൈഡനും ഭാര്യ ജിൽ ബൈഡനും തിങ്കളാഴ്ച കോവിഡ്​ വാക്​സിന്‍റെ ആദ്യ ഡോസ്​ സ്വീകരിക്കും. വൈസ്​ പ്രസിഡന്‍റായി തെരഞ്ഞെടുക്കപ്പെട്ട കമല ഹാരിസും ഭർത്താവും ഒരാഴ്ചക്ക്​ ശേഷമാകും കോവിഡ്​ വാക്​സിന്‍റെ അദ്യ ഡോസ്​ സ്വീകരിക്കുക. ജോ ബൈഡന്‍റെ പ്രസ്​ സെക്രട്ടറിയായി തെരഞ്ഞെടുക്ക​െപ്പട്ട ജെൻ സാക്കി വ്യക്തമാക്കിയതാണ്​ ഇക്കാര്യം.

യു.എസ്​ വൈസ്​ പ്രസിഡന്‍റായ മൈക്ക്​ പെൻസും ഭാര്യയും കൂടാതെ, മുതിർന്ന ഉദ്യോഗസ്​ഥരിലൊരാളായ നാൻസി പെലോസിയും വെള്ളിയാഴ്ച കോവിഡ്​ വാക്​സിന്‍റെ ആദ്യ ഡോസ്​ സ്വീകരിച്ചതിന്​ പിന്ന​ാലെയാണ്​ ജോ ബൈഡന്‍ വാക്​സിൻ സ്വീകരിക്കുമെന്ന വിവരം പുറത്തുവരുന്നത്​.

വാക്​സിൻ കുത്തിവെപ്പ്​ നൽകുന്ന ​ഡെലവയർ മെഡിക്കൽ കേന്ദ്രത്തിലെ ആരോഗ്യ പ്രവർത്തകർക്ക്​ ജോ ബൈഡൻ നന്ദി അറിയിക്കുകയും ചെയ്യും. 'കോവിഡ്​ വാക്​സിൻ ലഭിക്കുന്നവരുടെ മുൻനിരയിൽ ഇടം പിടിക്കാൻ എനിക്ക്​ ആഗ്രഹമില്ല. എന്നാൽ വാക്​സിൻ സുരക്ഷിതമാണെന്ന്​ ജനങ്ങൾക്ക്​ ഉറപ്പുനൽകാൻ വാക്​സിൻ സ്വീകരിക്കും' -ജോ ബൈഡന്‍ പറഞ്ഞു. 78കാരനായ ജോ ബൈഡൻ ഹൈറിസ്​ക്​ വിഭാഗത്തിലാണ്​ ഉൾപ്പെടുക.