അഫ്​ഗാനിൽ മന്ത്രിവസതിക്കു നേരെ ബോംബാക്രമണം; കാബൂളിൽ സ്​ഫോടന പരമ്പര

കാബൂൾ: അഫ്​ഗാൻ പ്രതിരോധമന്ത്രിയെ ലക്ഷ്യമിട്ട്​ താലിബാൻ നടത്തിയ കാർബോംബാക്രമണത്തിൽ എട്ടുപേർ കൊല്ലപ്പെട്ടു. 20 പേർക്ക്​ പരിക്കേൽക്കുകയും ചെയ്​തു. അതി സുരക്ഷമേഖലയായ ഗ്രീൻസോണിൽ പ്രതിരോധമന്ത്രി ബിസ്​മില്ലാ ഖാൻ മുഹമ്മദിയുടെ വസതിക്കു നേരെയായിരുന്നു ചൊവ്വാഴ്​ച രാത്രി ആക്രമണം. തുടർന്ന്​ സുരക്ഷസേന നടത്തിയ വെടിവെപ്പിൽ നാല്​ ആക്രമികൾ കൊല്ലപ്പെട്ടു.

അഞ്ചുമണിക്കൂറോളം സുരക്ഷസേന നടത്തിയ വെടിവെപ്പിലാണ്​ ആക്രമികളെ കൊലപ്പെടുത്തിയത്​. സംഭവസമയം മന്ത്രി വീട്ടിലുണ്ടായിരുന്നില്ല. ആക്രമണത്തിൽനിന്ന്​ മന്ത്രിയുടെ കുടുംബാംഗങ്ങൾ രക്ഷപ്പെട്ടു. ആക്രമണത്തി​െൻറ ഉത്തരവാദിത്തം ഏറ്റെടുത്തതായി താലിബാൻ വക്​താവ്​ സബിഹുല്ല മുജാഹിദ്​ അറിയിച്ചു. കാന്തഹാറിലെ മുന്നേറ്റത്തിനു പിന്നാലെ കാബൂളും പിടിച്ചെടുക്കാനാണ്​ താലിബാൻ നീക്കം. അഫ്​ഗാൻ സൈന്യം താലിബാനുനേരെ നടത്തിയ ആക്രമണങ്ങൾക്ക്​ തിരിച്ചടിയാണിതെന്നും സബിഹുല്ല വ്യക്തമാക്കി. നിരവധി ഉന്നതതല ഉദ്യോഗസ്​ഥരുടെ വസതികൾ ഗ്രീൻസോണിലാണ്​. ആക്രമണത്തെ തുടർന്ന്​ ​ഗ്രീൻസോണിൽനിന്ന്​ നൂറുകണക്കിനാളുകളെ സുരക്ഷിതമായി ഒഴിപ്പിച്ചു. ഇതിനുശേഷം കാബൂൾ നഗരത്തി​െൻറ വിവിധ ഭാഗങ്ങളിൽ സ്​ഫോടന പരമ്പരയുണ്ടായി. 10 പേർക്ക്​ പരി​ക്കേറ്റതായാണ്​ റിപ്പോർട്ട്​.

മണിക്കൂറുകൾക്കകം സുരക്ഷ ഏജൻസിയുടെ കവാടത്തിലും സ്​ഫോടനം നടന്നു. ആക്രമണത്തിൽ മൂന്നുപേർക്ക് പരിക്കേറ്റു. അഫ്​ഗാനിൽ താലിബാൻ ആ​ക്രമണം ശക്​തിപ്രാപിക്കുകയാണ്​. രാജ്യത്തുനിന്ന്​ യു.എസ്​ സൈനിക പിന്മാറ്റം പ്രഖ്യാപിച്ചതിനു പിന്നാലെയാണ്​ ഭരണം പിടിച്ചെടുക്കാൻ താലിബാൻ ആക്രമണം ശക്തമാക്കിയത്​.

ഇന്ത്യയുടെ പങ്കാളിത്തത്തോടെ നിർമിച്ച സൽമ അണ​ക്കെട്ട്​ ലക്ഷ്യമിട്ട്​ താലിബാൻ നടത്തിയ ആക്രമണം പരാജയപ്പെടുത്തിയതായി സൈന്യം അറിയിച്ചു. ശക്തമായ തിരിച്ചടിയെ തുടർന്ന്​ താലിബാൻ മേഖല വിട്ടതായും സൈന്യം അറിയിച്ചു. ഹെറാത്​ പ്രവിശ്യയിലെ ചെഷ്​തെ ശരീഫ്​ ജില്ലയിലാണ്​ സൽമ അണക്കെട്ട്​. പ്രവിശ്യയിലെ ആയിരക്കണക്കിന്​ കുടുംബങ്ങൾക്ക്​ വെള്ളവും വൈദ്യുതിയും ലഭിക്കുന്നത്​ ഈ അണക്കെട്ടിൽനിന്നാണ്​.