കാലാവധി കഴിയാറായ വാക്​സിൻ കൈമാറി പകരം നല്ലത് സ്വീകരിക്കാൻ ഇസ്രായേൽ; ആ കരാറിനില്ലെന്ന്​​ ഫലസ്​തീൻ

ടെൽ അവീവ്​: ഫലസ്​തീന്​ 10 ലക്ഷം ഫൈസർ വാക്​സിൻ കൈമാറാമെന്ന വാഗ്​ദാനവുമായി ഇസ്രായേൽ. എന്നാൽ, കാലാവധി കഴിയാറായ വാക്​സിനുകൾ വേണ്ടെന്ന്​ ഫലസ്​തീൻ. വളരെ വൈകാതെ കാലാവധി അവസാനിക്കുന്ന വാക്​സിനുകളാണ്​ കൈമാറാമെന്ന്​ ഇസ്രായേൽ സമ്മതിച്ചത്​. പകരം പുതിയ വാക്​സിനുകൾ എത്തു​േമ്പാൾ നൽകണമെന്നായിരുന്നു കരാർ. തുടക്കത്തിൽ ഇതിന്​ വഴങ്ങിയ അധികൃതർക്കെതിരെ ഫലസ്​തീനികൾ കൂട്ടമായി രംഗത്തെത്തിയതോടെ കരാറിൽനിന്ന്​ പിൻവാങ്ങുകയായിരുന്നു.

കരാർ പ്രകാരം ആദ്യ ഗഡുവായ 90,000 വാക്​സിനുകൾ വെള്ളിയാഴ്ച ഫലസ്​തീൻ അധികൃതർ കൈപ്പറ്റിയപ്പോഴാണ്​ കാലാവധി കഴിയാറായതെന്ന്​ മനസ്സിലായത്​. കരാറിലെ ചട്ടങ്ങൾ പാലിക്കാത്തതാണ്​ ഇവയെന്ന്​ ഫലസ്​തീൻ സർക്കാർ വക്​താവ്​ ഇബ്രാഹിം മൽഹം പറഞ്ഞു. ഇതോടെ കരാർ പിൻവലിക്കാൻ പ്രധാനമന്ത്രി മുഹമ്മദ്​ ശത്വിയ്യ ആരോഗ്യ മന്ത്രിക്ക്​ നിർദേശം നൽകുകയായിരുന്നു.

വർഷാവസാനം ഫലസ്​തീന്​ ലഭിക്കുന്ന വാക്​സിനുകൾ പകരമായി നൽകണമെന്ന നിബന്ധനയിലാണ്​ വെള്ളിയാഴ്ച ഇസ്രായേൽ പ്രഖ്യാപനം നടത്തിയത്​.

85 ശതമാനം പേർക്ക്​ വാക്​സിൻ നൽകിയ ഇസ്രായേൽ വെസ്റ്റ്​ ബാങ്ക്​, ഗസ്സ എന്നിവിടങ്ങളിലെ 45 ലക്ഷം ഫലസ്​തീനികൾക്ക്​ കൈമാറാൻ വിസമ്മതിക്കുന്നതിനെതിരെ വ്യാപക വിമർശനമുയർന്നിരുന്നു. ഇവയുടെ ഭരണവും സാമ്പത്തിക രംഗവുമുൾപെടെ എല്ലാം നിയന്ത്രിക്കു​േമ്പാഴാണ്​ കടുത്ത അനീതി നിറഞ്ഞ സമീപനം. ഈ പശ്​ചാത്തലത്തിലാണ്​ പുതിയ പ്രധാനമന്ത്രി നാഫ്​റ്റലി ബെനറ്റി​ന്‍റെ ഓഫീസ്​ കൈമാറ്റ പ്രഖ്യാപനം നടത്തിയത്​. ഫൈസർ വാക്​സിന്‍റെ കാലാവധി എന്ന്​ തീരുമെന്ന്​ പ്രഖ്യാപനത്തിൽ വ്യക്​തമാക്കിയിരുന്നില്ല. അതേ സമയം, സെപ്​റ്റംബറോടെ തിരികെ നൽകണമെന്ന്​ നിർദേശിക്കുന്നുമുണ്ട്​.

ഇതുവരെ 2,70,000 ഫലസ്​തീനികൾക്കാണ്​ കോവിഡ്​ വാക്​സിൻ ലഭിച്ചത്​. അതേ സമയം, വൈറസ്​ ബാധിതർ മൂന്നു ലക്ഷവുമാണ്​.