മലാലയുമായി കൈകോർത്ത്​ ആപ്​ൾ

വാഷിങ്​ടൺ: ഏറ്റവും പ്രായംകുറഞ്ഞ നെബോൽ പുരസ്​കാര ജേതാവ്​ മലാല യൂസുഫ്​ സായിയുമായി കൈകോർത്ത്​ യു.എസ്​ ആസ്​ഥാനമായുളള ബഹുരാഷ്​ട്ര ഭീമൻ ആപ്​ൾ'. ആപ്ൾ ടി.വി പ്ലസുമായാണ്​ വർഷങ്ങൾ നീളുന്ന കരാർ. നാടകം, ഹാസ്യ പരിപാടികൾ, ഡോക്യുമെന്‍ററികൾ, ആനിമേഷൻ, കുട്ടികളുടെ പരമ്പരകൾ തുടങ്ങി വിവിധ പരിപാടികളുടെ നിർമാണത്തിൽ മലാല സഹകരിക്കും. 'എക്​സ്​ട്രാകരിക്കുലാർ' എന്ന സ്വന്തം കമ്പനിയുടെ പേരിലാകും മലാല ഇവക്കാവശ്യമായ ഉള്ളടക്കം നിർമിക്കുക.

''ലോകത്തിന്​ പ്രചോദനമാകാനുള്ള അവരുടെ ശേഷി പ്രയോജനപ്പെടുത്തുകയാണ്​ ലക്ഷ്യ'മെന്ന്​ കമ്പനി വാർത്താ കുറിപ്പിൽ അറിയിച്ചു.

തീവ്രവാദി ആക്രമണത്തിൽ ഗുരുതര പരിക്കുകളുമായി വർഷങ്ങൾ മല്ലിട്ട മലാല തിരിച്ചെത്തിയ ശേഷം പെൺകുട്ടികളുടെ വിദ്യാഭ്യാസ പ്രവർത്തന രംഗത്ത്​ സജീവമാണ്​. ബി.ബി.സിക്കായി സ്വ​ന്തം പേരിലും തൂലിക നാമത്തിലും ഇവർ എഴുതിയ ലേഖനങ്ങളും ​േബ്ലാഗുകളും വൻ ജനപ്രീതി നേടിയിരുന്നു. ആത്​മകഥയും ലോകം മുഴുക്കെ ബെസ്റ്റ്​സെല്ലറായി. മലാലയുടെ രചനകളോടുള്ള ജനപ്രീതി ഉപയോഗപ്പെടുത്തുകയെന്ന ലക്ഷ്യത്തോടെയാണ്​ ആപ്​ൾ കരാറിലെത്തുന്നത്​.

2014ൽ 17ാം വയസ്സിലാണ്​ മലാല നൊബേൽ ജേതാവാകുന്നത്​. കുട്ടികളുടെ അവകാശ സംരക്ഷണത്തിന്​ പ്രവർത്തിച്ചുവരുന്ന ഇന്ത്യക്കാരനായ കൈലാശ്​ സത്യാർഥിക്കൊപ്പമായിരുന്നു പുരസ്​കാരം നേടിയത്​.