കോവിഡ്​: ഇംറാൻെറ വീഴ്​ചകൾ ചൂണ്ടിക്കാട്ടി; വനിത മാധ്യമപ്രവർത്തകർക്കെതിരെ സൈബർ ആക്രമണം

ന്യൂഡൽഹി: പ്രധാനമന്ത്രി ഇംറാൻ ഖാനെ വിമർശിച്ചതിനെ തുടർന്ന്​ സൈബർ ആക്രമണം നേരിടുകയാണെന്ന്​ പാകിസ്​താനിലെ വനിത മാധ്യമപ്രവർത്തകർ. സർക്കാർ ഉദ്യോഗസ്ഥരും പാകിസ്​താൻ തെഹരീഖ്​-ഇ-ഇൻസാഫ്​ പാർട്ടി പ്രവർത്തകരും സൈബറിടങ്ങളിൽ അപമാനിക്കുകയാണെന്ന്​ വനിത മാധ്യമ പ്രവർത്തകരുടെ സംയുക്​ത പ്രസ്​താവനയിൽ പറയുന്നു.

കടുത്ത സൈബർ ആക്രമണം മൂലം സ്വതന്ത്രമായി തൊഴിൽ ചെയ്യാൻ കഴിയുന്നില്ല. കോവിഡ്​ പ്രതിരോധത്തിലെ ഇംറാൻ ഖാൻെറ വീഴ്​ചകൾ ചൂണ്ടിക്കാണിച്ച മാധ്യമപ്രവർത്തകരാണ്​ കൂടുതൽ ആക്രമണം നേരിടുന്ന​െതന്നും പ്രസ്​താവനയിൽ പറയുന്നു. 36 വനിത മാധ്യമപ്രവർത്തകരാണ്​ പ്രസ്​താവനയിൽ ഒപ്പുവെച്ചിരിക്കുന്നത്​. അവാർഡ്​ നേടിയ മാധ്യമപ്രവർത്തകരായ ബേനസീർ ഷാ, അസ്​മ ഷിരാസി, മെഹ്​മൽ സർഫ്രാസ്​, അയേഷ ബക്​ഹാഷ്​, അംബർ ഷാംസി എന്നിവരും ഇതിൽ ഉൾപ്പെടുന്നു.

സർക്കാർ ഉദ്യോഗസ്ഥർക്കൊപ്പം ഭരണകക്ഷിയുടെ വിവിധ ട്വിറ്റർ അക്കൗണ്ടുകളിലൂടേയും സൈബർ ആക്രമണം ശക്​തമാണ്​. തങ്ങളുടെ ചിത്രങ്ങളും വീഡിയോയും മോർഫ്​ ചെയ്​ത്​ പ്രചരിപ്പിക്കുകയാണ്​. വ്യാജ വാർത്തകളാണ്​ തങ്ങൾ റിപ്പോർട്ട്​ ചെയ്യുന്നതെന്ന പ്രചാരണവും നടക്കുന്നുണ്ടെന്നും ഇവർ ആരോപിക്കുന്നു. അതേസമയം, മാധ്യമ പ്രവർത്തകർക്കെതിരെ നടക്കുന്ന സൈബർ ആക്രമണങ്ങൾ അംഗീകരിക്കാനാവില്ലെന്ന്​ പാകിസ്​താൻ മനുഷ്യാവകാശ മന്ത്രി ശിരീൻ മസാരി പറഞ്ഞു.