പാക് പ്രധാനമന്ത്രി ശഹബാസ് ശരീഫ് ഉടൻ അവിശ്വാസ​ വോട്ട് നേരിടും -വെളിപ്പെടുത്തലുമായി ഇംറാൻ ഖാൻ

ഇസ്‍ലാമാബാദ്: പാകിസ്താൻ പ്രധാനമന്ത്രി ശഹബാസ് ശരീഫ് ഉടൻ അവി​ശ്വാസ​ വോട്ടെടുപ്പ് നേരിടേണ്ടി വരുമെന്ന വെളിപ്പെടുത്തലുമായി തെഹ്രീകെ ഇൻസാഫ് ചെയർമാൻ ഇംറാൻ ഖാൻ. പ്രസിഡന്റ് ഡോ. ആരിഫ് ആൽവി ഉടൻ തന്നെ ഭൂരിപക്ഷം തെളിയിക്കാൻ ശഹബാസ് ശരീഫിനോട് ആവശ്യപ്പെടുമെന്നാണ് ഇംറാൻ ഖാന്റെ അവകാശവാദം. ഡോ. ആൽവി തെഹ്‌രീക്-ഇ-ഇൻസാഫിൽ പെട്ടയാളാണ്.

ആദ്യം വിശ്വാസവോട്ടെടുപ്പിന്റെ പേരിൽ ശഹബാസ് പഞ്ചാബിൽ ഞങ്ങളെ പരീക്ഷിച്ചു. ഇപ്പോൾ പാർലമെന്റിൽ ഭൂരിപക്ഷമുണ്ടോ എന്ന് തെളിയിക്കാൻ അദ്ദേഹത്തിന്റെ ഊഴമാണ്. അദ്ദേഹത്തിനെതിരെ ഞങ്ങൾക്ക് ഒരു പദ്ധതിയുണ്ട്-എന്നായിരുന്നു ഇംറാൻ പറഞ്ഞത്. നിലവിലെ ഭരണസഖ്യവുമായി മുത്തഹിദ ഖ്വാമി മൂവ്മെന്റ്(എം.ക്യു.എം-പി) പാകിസ്താൻ ഭിന്നതയിലാണെന്ന് റിപ്പോർട്ടുണ്ടായിരുന്നു. കറാച്ചിയിലെയും ഹൈദരാബാദിലെയും പ്രാദേശിക തെരഞ്ഞെടുപ്പുമായി ബന്ധപ്പെട്ടായിരുന്നു ഭിന്നത. എം.ക്യു.എം-പിക്ക് പാർലമെന്റിൽ ഏഴ് അംഗങ്ങളാണുള്ളത്. അവർ പിന്തുണ പിൻവലിച്ചാൽ ശഹബാസ് സർക്കാർ താഴെ വീഴും.

ആദ്യം, ഷെഹ്ബാസ് വിശ്വാസവോട്ടിനായി പരീക്ഷിക്കപ്പെടും, പിന്നീട് ഞങ്ങൾക്ക് മറ്റ് പദ്ധതികളുണ്ട്," -ഇംറാൻ ഖാൻ മാധ്യമങ്ങളോട് പറഞ്ഞു.