കോവിഡ്​ ബാധിതനായി നാലാം ദിവസം മാധ്യമ സംഘവുമായി പാക്​ പ്രധാനമന്ത്രിയുടെ കൂടിക്കാഴ്ച; വിവാദം

ഇസ്​ലാമാബാദ്​: കോവിഡ്​ ബാധിതനായി നാലാം ദിവസം മാധ്യമ സംഘവുമായി കൂടിക്കാഴ്​ച നടത്തിയ പാകിസ്​താൻ പ്രധാനമന്ത്രി ഇംറാൻ ഖാനെതിരെ വൻ പ്രതിഷേധം. കഴിഞ്ഞ ശനിയാഴ്ചയാണ്​ 68കാരനായ ഇംറാന്​ കോവിഡ്​ ബാധിതനായത്​. കോവിഡ്​ വാക്​സിൻ ആദ്യ ഡോസ്​ സ്വീകരിച്ച്​ രണ്ട്​ ദിവസം തികയും മുമ്പാണ്​ ഇംറാന്​ രോഗം ബാധിച്ചത്​.

ഇൻഫർമേഷൻ ആൻഡ്​ ബ്രോഡ്​കാസ്റ്റിങ്​ വകുപ്പ്​ മന്ത്രി ഷിബ്​ലി ഫറാസ്​ യോഗത്തിന്‍റെ ചിത്രം ​സാമൂഹിക മാധ്യമങ്ങളിൽ പങ്കുവെച്ചതോടെയാണ്​ സംഭവം വിവാദമായത്​. ഗ്രേ നിറത്തിലുള്ള ട്രാക്​സ്യൂട്ടും ജോഗ്ഗറുകളും അണിഞ്ഞ ഇംറാൻ സോഫയിൽ മാധ്യമസംഘവുമായി അൽപം അകലം പാലിച്ച്​ ഇരിക്കുന്നതായാണ്​ ചിത്രത്തിൽ കാണാൻ സാധിക്കുന്നത്​.

രാജ്യത്ത്​ മൂന്നാം കോവിഡ്​ തരംഗ ഭീഷണി നേരിടുന്ന സാഹചര്യത്തിൽ കോവിഡ്​ ചട്ടങ്ങൾ ലംഘിച്ച പ്രധാനമന്ത്രിക്കു​ം യോഗത്തിൽ പ​ങ്കെടുത്തവർക്കുമെതിരെ എഫ്​.ഐ.ആർ രജിസ്റ്റർ ചെയ്യണമെന്ന്​ പ്രതിപക്ഷം ആവശ്യപ്പെട്ടു.

ക്വാറന്‍റീനിൽ കഴിയുന്ന വേളയിൽ യോഗം നടത്തിയ പ്രധാനമന്ത്രിയുടെ പ്രവർത്തിയെ ന്യായീകരിച്ച്​ സർക്കാർ തലത്തിൽ ആരും തന്നെ രംഗത്തെത്തിയിട്ടില്ലെന്നാണ്​ റിപ്പോർട്ടുകൾ.

വിഡിയോ കോൺ​ഫറൻസിങ്​ അടക്കമുള്ള സംവിധാനങ്ങൾ ഉള്ള സമയത്ത്​ ഇത്തരത്തിൽ ഒരു യോഗം നടത്തിയ ഇംറാനെതിരെ സാമൂഹിക മാധ്യമങ്ങളിൽ പ്രതിഷേധം ശക്​തമാണ്​. പാകിസ്​താനിൽ കോവിഡ്​ ബാധിതനായ വ്യക്തി ഒമ്പത്​ മുതൽ 14 ദിവസം വരെ ക്വാറന്‍റീനിൽ കഴിയണമെന്നാണ്​ ചട്ടം. എന്നാൽ രോഗബാധിതനായി നാലാം ദിനമായിരുന്നു വിവാദമായ യോഗം.

സാധ്യമായ പ്രതിരോധ മാർഗങ്ങളെല്ലാം സ്വീകരിച്ചിരുന്നുവെന്നും കൃത്യമായ അകലം പാലിച്ചായിരുന്നു യോഗം നടത്തിയതെന്നും മന്ത്രി ആസാദ്​ ഉമർ പറഞ്ഞു. എന്നാൽ ഇത്തരമൊരു സാഹചര്യത്തിൽ യോഗം നടത്താതിരിക്കുന്നതായിരുന്നു ഉചിതമെന്നും അ​ദ്ദേഹം അഭിപ്രായപ്പെട്ടു.