വാക്​സിനെടുത്തില്ലെങ്കിൽ ജോലിയി​ല്ല; കർശന നിർദേശവുമായി ഈ രാജ്യം

സുവ: രാജ്യം കോവിഡ്​ ഡെൽറ്റ വകഭേദത്തിനെതിരെ പൊരുതുന്ന സാഹചര്യത്തിൽ എല്ലാ ജോലിക്കാർക്കും വാക്​സിനേഷൻ നിർബന്ധമാക്കാനൊരുങ്ങി ഫിജി. ആഗസ്റ്റ്​ 15നകം ഒന്നാം ഡോസ്​ വാക്​സിനെടുക്കാത്ത എല്ലാ സർക്കാർ ജോലിക്കാരോടും അവധിയിൽ പോകാൻ പ്രധാനമന്ത്രി ഫ്രാങ്ക്​ ബെയ്​നിമറാമ ആവശ്യപ്പെട്ടു. നവംബർ ഒന്നിനകം രണ്ടാം ഡോസ്​ എടുത്തില്ലെങ്കിൽ ജോലിയിൽ നിന്ന്​ പിരിച്ചുവിടുമെന്നും അദ്ദേഹം മുന്നറിയിപ്പ്​ നൽകി.

സ്വകാര്യ ജോലിക്കാർ ആഗസ്റ്റ്​ ഒന്നിനകം കുത്തിവെപ്പെടുക്കണമെന്നാണ്​ നിർദേശം. വാക്​സിനെടുക്കാത്തവർക്ക്​ കനത്ത പിഴയും കമ്പനികൾ അടച്ചുപൂട്ടിക്കുമെന്നും​ ഉത്തരവുണ്ട്​​. കോവിഡ്​ മാനദണ്ഡങ്ങൾ ജനങ്ങൾ പാലിക്കാത്തതിനാൽ രാജ്യത്ത്​ വൈറസ്​ വ്യാപനം കൂടിയതിന്‍റെ അടിസ്​ഥാനത്തിലാണ്​ സർക്കാർ നിയന്ത്രണങ്ങൾ കർശനമാക്കുന്നത്​.

ഏപ്രിൽ വരെ ഒരു വർഷം ഫിജിയിൽ സമൂഹവ്യാപനം ഉണ്ടായിരുന്നില്ല. എന്നാൽ ക്വാറന്‍റീൻ വ്യവസ്​ഥകൾ ലംഘിക്കപ്പെട്ടതോടെ കോവിഡ്​ ഡെൽറ്റ വകഭേദം രാജ്യത്ത്​ പടർന്ന്​ പിടിക്കുകയായിരുന്നു. ഇപ്പോൾ പ്രതിദിനം 700ലധികം കോവിഡ്​ കേസുകളാണ്​ രാജ്യത്ത്​ റിപ്പോർട്ട്​ ചെയ്യുന്നത്​. ദക്ഷിണ പസഫിക്​ രാജ്യമായ ഫിജിയിൽ 9.3 ലക്ഷമാണ്​ ജനസംഖ്യ.