ഒമ്പത്​ പ്രവിശ്യ കേന്ദ്രങ്ങൾ താലിബാൻ നിയന്ത്രണത്തിൽ

കാബൂൾ: അഫ്ഗാൻ സൈന്യം തിരിച്ചടി തുടരുമ്പോഴും രാജ്യത്തി​െൻറ പല മേഖലകളിലും പിടിമുറുക്കി താലിബാൻ. നിലവിൽ ഫൈസാബാദ്​, ഫറ, പുലി ഖുമുരി, സാരെ പുൾ,ഷേബർഖാൻ, ഐബക്​, കുന്ദൂസ്​,തലൂഖാൻ, സരഞ്​ജ്​ എന്നിങ്ങനെ ഒമ്പത്​ പ്രവിശ്യ കേന്ദ്രങ്ങൾ താലിബാ​െൻറ നിയന്ത്രണത്തിലാണ്​. ഒരാഴ്ചയ്ക്കിടെയാണ്​ രാജ്യത്തെ 34 പ്രവിശ്യ തലസ്ഥാനങ്ങളിൽ ഒമ്പതെണ്ണവും നിയന്ത്രണത്തിലാക്കിയത്​. അഫ്​ഗാനിസ്​താനിൽ 34 പ്രവിശ്യകളും 421 ജില്ലകളുമാണുള്ളത്​.

ബഡക്ഷാൻ പ്രവിശ്യ തലസ്​ഥാനമായ ഫൈസാബാദാണ്​ ഏറ്റവുമൊടുവിൽ താലിബാ​െൻറ കൈകളിലെത്തിയത്​. കുന്ദൂസ്​ വിമാനത്താവളത്തിൽ നൂറുകണക്കിന്​ സൈനികർ താലിബാനു മുന്നിൽ കീഴടങ്ങിയതായും റിപ്പോർട്ടുണ്ട്​. വിമാനത്താവളവും താലിബാൻ പിടിച്ചെടുത്തു. വിമാനത്താവളമൊഴികെയുള്ള ഭാഗങ്ങളായിരുന്നു ഞായറാഴ്​ച താലിബാൻ അധീനതയിലാക്കിയത്​. ഇതോടെ അഫ്ഗാ​െൻറ 65 ശതമാനം ഭൂപ്രദേശവും താലിബാൻ നിയന്ത്രണത്തിലായെന്നാണ് റിപ്പോര്‍ട്ടുകള്‍.

തജികിസ്​താൻ,ഉസ്​ബെകിസ്​താൻ തുടങ്ങിയ രാജ്യങ്ങളുമായുള്ള അഫ്​ഗാൻ അതിർത്തിയും താലിബാൻ കൈയടക്കിയതായി പ്രതിരോധമന്ത്രാലയ വൃത്തങ്ങളെ ഉദ്ധരിച്ച്​ റഷ്യൻ മാധ്യമങ്ങൾ റിപ്പോർട്ട്​ ചെയ്​തു. അതിർത്തി കടക്കില്ലെന്ന്​ താലിബാൻ ഉറപ്പുനൽകിയിട്ടുണ്ടെങ്കിലും ഈ മേഖലയിൽ റഷ്യ അണികളുമായി സംയുക്​ത സൈനികാഭ്യാസം തുടരുകയാണ്​.

ഖത്തർ തലസ്​ഥാനമായ ദോഹയിൽ യു.എസ്​,ചൈന,പാകിസ്​താൻ രാജ്യങ്ങളുടെ പ്രതിനിധികളുടെ സമാധാന ചർച്ചയിൽ അവ്യക്തത തുടരുകയാണ്​. ചർച്ചയു​െട ആദ്യദിനം റഷ്യ പ​ങ്കെടുത്തിരുന്നില്ല. വടക്കൻ കാബൂളിലെ ബഗ്രാം വിമാനത്താവളത്തിനു നേർക്ക്​ റോക്കറ്റാ​ക്രമണം നടത്തിയത്​ താലിബാൻ സ്​ഥിരീകരിച്ചു.

കാന്തഹാറിലും ഹെൽമന്ദിലും പോരാട്ടം രൂക്ഷമാണ്​. കാന്തഹാറിൽ സ്​ത്രീകളും കുട്ടികളുമടക്കം 47 പേർ കൊല്ലപ്പെട്ടു. പോരാട്ടം രൂക്ഷമായതോടെ മസാരി ശരീഫിലെ ഇന്ത്യൻ കോൺസുലേറ്റ്​ അടച്ചിരുന്നു. നയതന്ത്ര ഉദ്യോഗസ്​ഥരോടും പൗരൻമാരോടും മടങ്ങാൻ നിർദേശിച്ച ഇന്ത്യ ഇവർക്കായി പ്രത്യേക സേന വിമാനവും അയച്ചു. ഇതോടെ കാബൂളിലെ എംബസി ഒഴികെ അഫ്​ഗാനിലെ എല്ലാ ഇന്ത്യൻ നയതന്ത്ര ഓഫിസുകളും പൂട്ടി. 90 ദിവസത്തിനുള്ളിൽ താലിബാൻ അഫ്​ഗാൻ തലസ്​ഥാനമായ കാബൂൾ പിടിച്ചെടുക്കുമെന്നാണ്​​ യു.എസ്​ ഇൻറലിജൻസ്​ റിപ്പോർട്ട്​. ഒരുമാസത്തിനകം താലിബാൻ സായുധസേന കാബൂൾ വളയുമെന്നും യു.എസ്​ പ്രതിരോധ വൃത്തങ്ങൾ അറിയിച്ചു. എന്നാൽ ഇത്​ അന്തിമ നിഗമനമല്ലെന്നും കടുത്ത പ്രതിരോധത്തിലൂടെ അഫ്​ഗാൻ സൈന്യത്തിന്​ താലിബാനെ പരാജയപ്പെടുത്താൻ കഴിയുമെന്നും അധികൃതർ വ്യക്തമാക്കി. അതിനിടെ,യുദ്ധമുഖമായ അഫ്​ഗാനിസ്​താനിലേക്ക്​ ആളുകളെ നാടുകടത്തുന്നത്​ ജർമനിയും നെതർലൻഡും നിർത്തിവെച്ചു.

രാജിവെച്ച്​ ധനമന്ത്രി രാജ്യംവിട്ടു

താലിബാൻ രാജ്യത്തെ വരുമാന സ്രോതസ്സി​െൻറ മുഖ്യമായ കസ്​റ്റംസ്​ പോസ്​റ്റുകൾ പിടിച്ചെടുത്തതോടെ അഫ്​ഗാൻ ധനകാര്യ മ​ന്ത്രി ഖാലിദ്​ പയേന്ദ രാജിവെച്ചു. രാജിവെച്ചയുടൻ ഇദ്ദേഹം രാജ്യംവിട്ടതായാണ്​ റിപ്പോർട്ട്​. അദ്ദേഹം എ​വിടേക്കാണ്​ പോയതെന്ന്​ വ്യക്തമല്ല.

സൈന്യത്തെ പിൻവലിച്ചതിൽ ഖേദമില്ലെന്ന്​ ബൈഡൻ

താലിബാൻ വിരുദ്ധപോരാട്ടത്തിൽ യു.എസും അഫ്ഗാൻ സര്‍ക്കാറിനെ കൈയൊഴിഞ്ഞ മട്ടാണ്​. അഫ്ഗാനിൽ നിന്ന് സൈന്യത്തെ തിരിച്ചു വിളിക്കാനുള്ള തീരുമാനത്തിൽ കുറ്റബോധമില്ലെന്നും സ്വന്തം രാജ്യത്തിനായി പോരാടാൻ അഫ്​ഗാൻ ജനത ഒന്നിച്ചുനിൽക്കണമെന്നും യു.എസ് പ്രസിഡൻറ്​ ജോ ബൈഡൻ മാധ്യമങ്ങളോടു പറഞ്ഞു. അഫ്​ഗാനുള്ള മറ്റ്​ സഹായം തുടരുമെന്നും ബൈഡൻ വ്യക്തമാക്കി. രണ്ട്​ പതിറ്റാണ്ട്​ നീണ്ട സൈനിക ഇടപെടൽ അവസാനിപ്പിച്ച് അഫ്ഗാനിൽനിന്ന് യു.എസ്​ സൈന്യത്തെ പിൻവലിക്കുന്ന നടപടി ഇക്കഴിഞ്ഞ മേയിൽ ഒൗ​േദ്യാഗികമായി ആരംഭിച്ചിരുന്നു. യു.എസ്​ പിൻമാറ്റം അറിയിച്ചതിന്​ പിന്നാലെ നാറ്റോ സഖ്യകക്ഷികളും തങ്ങളുടെ സൈന്യത്തെ പിൻവലിക്കാൻ​ ആരംഭിച്ചു.സൈനിക പിൻമാറ്റം പൂർത്തിയായാലുടൻ അഫ്​ഗാനിലെ യു.എസ്​ എംബസിക്ക്​ മാത്രമാകും സൈനിക കാവലുണ്ടാകുക.

അഷ്​റഫ്​ ഗനി മസാരി ശരീഫിൽ

കാബൂൾ: രൂക്ഷമായ പോരാട്ടം നടക്കുന്ന വടക്കൻ മേഖലയിലേക്ക്​ പറന്ന്​ അഫ്​ഗാൻ പ്രസിഡൻറ്​ അഷ്​റഫ്​ ഗനി. നാലുഭാഗവും താലിബാൻ സേനാംഗങ്ങളാൽ ചുറ്റപ്പെട്ട സൈനികർക്കു പിന്തുണ നൽകാനാണ്​ ഗനിയെത്തിയത്​. താലിബാനെതിരെ നാട്ടു സൈന്യങ്ങളെ അണിനിരത്താനുള്ള ശ്രമത്തിലാണിദ്ദേഹം. ഒറ്റ രാത്രി കൊണ്ട് ഫൈസാബാദ് താലിബാൻ നിയന്ത്രണത്തിലായതിനു പിന്നാലെയാണ്​ ഗനി മസാരി ശരീഫിൽ നേരി​ട്ടെത്തിയത്​. ഇവിടുത്തെ അടുത്ത അനുയായികളായ അറ്റ മുഹമ്മദ് നൂറുമായും അബ്​ദുൽ റഷീദ് ദോസ്തവുമായും ചര്‍ച്ച നടത്തിയ അദ്ദേഹം സൈനിക നീക്കങ്ങള്‍ വിലയിരുത്തി. മസാരി നഗരം കൂടി താലിബാൻ നിയന്ത്രണത്തിലായാൽ അഫ്ഗാനിലെ വടക്കൻ മേഖലയിലെ നിയന്ത്രണം സര്‍ക്കാറിന് പൂര്‍ണമായും നഷ്​ടപ്പെടും. ഇത്​ ഗനി ഭരണകൂടത്തിന്​ വലിയ ആഘാതമായിരിക്കും.