വാർത്തക്കിടെ അശ്ലീല വിഡിയോ സംപ്രേഷണം; മാപ്പ്​ പറഞ്ഞ്​ ചാനൽ

കാലാവസ്​ഥ വാർത്ത അവതരിപ്പിക്കുന്നതിനിടെ അബദ്ധത്തിൽ അശ്ലീല വിഡിയോ ക്ലിപ്പ്​ സംപ്രേഷണം ചെയ്​ത അമേരിക്കൻ ചാനൽ മാപ്പ്​ പറഞ്ഞ്​ തടിയൂരി. ഞായറാഴ്ചയാണ്​ വാഷിങ്​ടണിലെ സ്പോക്കെയ്ൻ ആസ്ഥാനമായ ക്രെം -2 ചാനലിന്​ അബദ്ധം പിണഞ്ഞത്​. വൈകീട്ട്​ ആറ്​ മണിക്കുള്ള ഷോയിൽ അവതാരകയുടെ പിറകിലുള്ള ടി.വി.യിൽ 13 സെക്കന്‍റ്​ ദൈർഘ്യമുള്ള വിഡിയോ പ്രദർശിപ്പിക്കുകയായിരുന്നു.

കാലാവസ്ഥാ വിദഗ്​ധൻ മിഷേൽ ബോസും അവതാരക കോഡി പ്രോക്ടറും ചേർന്ന് കാലാവസ്ഥാ വിവരങ്ങൾ നൽകുന്നതിനിടെയാണ്​ പശ്ചാത്തലത്തിൽ അശ്ലീല ക്ലിപ്പ് പ്ലേ ചെയ്​തത്​. അബദ്ധം ശ്രദ്ധയിൽപെട്ടതോടെ വീഡിയോ മാറ്റി റിപ്പോർട്ടിങ്​ തുടർന്നു.

പിന്നീട്​ രാത്രി 11 മണിയുടെ വാർത്താ പരിപാടിയിൽ ചാനൽ മാപ്പ്​ പറഞ്ഞു. "ക്രെം 2ൽ സംപ്രേഷണം ചെയ്​ത ആറുമണിയുടെ വാർത്തയിൽ സംഭവിച്ച പിഴവിന് ക്ഷമ ചോദിക്കാൻ ആഗ്രഹിക്കുന്നു. ഷോയുടെ ആദ്യ ഭാഗത്ത് ഒരു അനുചിതമായ വീഡിയോ പ്രദർശിപ്പിച്ചു. ഇത്തരം സംഭവം ആവർത്തിക്കാതിരിക്കാൻ ഞങ്ങൾ ജാഗ്രത പുലർത്തും".

സംഭവത്തിൽ അന്വേഷണം ആരംഭിച്ചതായി സ്‌പോക്കെയ്ൻ പൊലീസ് പുറത്തിറക്കിയ പ്രസ്താവനയിൽ പറഞ്ഞു. ഇതുസംബന്ധിച്ച്​ നിരവധി പേർ പൊലീസുമായി ബന്ധപ്പെട്ടുവെന്നും അന്വേഷണവുമായി ചാനൽ അധികൃതർ പൂർണമായും സഹകരിക്കുന്നു​ണ്ടെന്നും പൊലീസ്​ അറിയിച്ചു.