ആഫ്രിക്കയിൽ വീണ്ടും പോളിയോ പടരുന്നു; ഭീഷണിയാകുന്നത്​ പരിണാമം സംഭവിച്ച വൈറസുകൾ

ഖർത്തൂം: പോളിയോ മുക്തമെന്ന്​ പ്രഖ്യാപിച്ച ആഫ്രിക്കൻ ഭൂഖണ്ഡത്തിലെ സുഡാനിൽ വീണ്ടും പോളിയോ പടർന്നുപിടിക്കുന്നു. ​പോളിയോ വൈറസുകളെ പ്രതിരോധിക്കാൻ വാക്​സിനായി നൽകുന്ന വൈറസുകൾക്ക്​ പരിണാമം സംഭവിച്ച്​ പുതിയ തരം വൈറസുകളായി മാറുന്നതാണ്​ ഇത്തവണ ഭീഷണി ഉയർത്തുന്നത്​. ആഫ്രിക്കൻ രാജ്യമായ ചാഡിൽ കഴിഞ്ഞവർഷം ഇത്തരത്തിൽ പരിണാമം സംഭവിച്ച വൈറസുകൾ ഭീഷണി വിതച്ചിരുന്നു.

സുഡാനിലെ രണ്ടു പ്രവിശ്യകളിലാണ്​ പുതുതായി പോളിയോ സ്​ഥിരീകരിച്ചത്​. തെക്കൻ ഡാർഭറിലും ജെദാരിഫിലുമാണ്​ രോഗം സ്​ഥിരീകരിച്ചതെന്ന്​ ലോകാ​രോഗ്യ സംഘടന വ്യക്തമാക്കുന്നു. മാർച്ചിലും ഏപ്രിലും രോഗം സ്​ഥിരീകരിച്ച രണ്ടു കുഞ്ഞുങ്ങളും തളർന്നുവീഴുകയായിരുന്നു. രണ്ടുപേരിലും പോളിയോ കുത്തിവെപ്പ്​ നടത്തിയിരുന്നു. തുടർന്നാണ്​ വാക്​സിനായി നൽകുന്ന അണുക്കൾക്ക്​ പരിണാമം സംഭവിച്ച്​ പുതിയതരം വൈറസുകളായി രൂപാന്തരം പ്രാപിച്ചതാണ്​ രോഗത്തിന്​ കാരണമെന്ന നിഗമനത്തിലെത്തിയത്​. കഴിഞ്ഞവർഷം ചാഡിൽ ഇത്തരത്തിൽ ​പുതിയ പോളിയോ​ കേസുകൾ റിപ്പോർട്ട്​ ചെയ്​തിരുന്നു. തുടർന്ന്​ അവ കാമറൂണിലേക്ക്​ വ്യാപിക്കുകയും ചെയ്​തു.

ഇത്തരത്തിൽ​ പുതിയ പോളിയോ വൈറസുകൾ രോഗം പടർത്തിയ നിരവധി കേസുകൾ രാജ്യത്തുണ്ടെന്നാണ്​ നിഗമനം. റിപ്പോർട്ട്​ ചെയ്യപ്പെടാതെ പോകുന്ന കേസുകൾ നിരവധിയാണെന്നും പറയുന്നു.

വലിയ തോതിൽ പടർന്നുപിടിക്കുന്ന പോളിയോ ശ്വസന പേശികളെ ബാധിച്ചാൽ മരണം വരെ സംഭവിക്കാം. മലിന ജലത്തിലൂടെ പടരുന്ന വൈറസ്​ ബാധിച്ചാൽ ചികിത്സയില്ല. പ്രതിരോധ വാക്​സിൻ മാത്രമാണ്​ പോളിയോക്ക്​ പ്രതിവിധി. അഞ്ചുവയസിൽ താഴെയുള്ള കുഞ്ഞുങ്ങളെയാണ്​ പോളിയോ പ്രധാനമായും ബാധിക്കുക.

കഴിഞ്ഞ ആഴ്​ച ലോകാരോഗ്യ സംഘടന ആഫ്രിക്കൻ ഭൂഖണ്ഡത്തെ പോളിയോ മുക്തമായി പ്രഖ്യാപിച്ചിരുന്നു. 90 ശതമാനം കുട്ടികളിലും നടത്തിയ പ്രതിരോധ കുത്തിവെപ്പ്​ വഴിയാണ്​ പോളിയോയെ പിടിച്ചുകെട്ടാനായത്​. അംഗോള, കോംഗോ, നൈജീരിയ, സാംബിയ തുടങ്ങിയ 12ഒാളം ആഫ്രിക്കൻ രാജ്യങ്ങൾ പതിറ്റാണ്ടുകളായി പോളിയോ രോഗത്തി​െൻറ പിടിയിലായിരുന്നു. വലിയ രീതിയിൽ സംഘടിപ്പിച്ച പ്രതിരോധ കുത്തിവെപ്പ്​ കാമ്പയിനിലൂടെയും ബോധവൽക്കരണ പരിപാടികളിലൂടെയുമാണ്​ ആഫ്രിക്ക പോളിയോയെ പിടിച്ചുകെട്ടിയത്​. നിലവിൽ പാകിസ്​താനും അഫ്​ഗാനിസ്​ഥാനുമാണ്​ പോളിയോ നിർമാർജ്ജനം ചെയ്യാത്ത രാജ്യങ്ങൾ.