നേപ്പാൾ പ്രധാനമന്ത്രി ശർമ്മ ഒലിയെ പാർട്ടിയിൽ നിന്ന്​ പുറത്താക്കി

കാഠ്​മണ്ഡു: വിവാദ പ്രസ്​താവനകൾ കൊണ്ട്​ വാർത്തകളിൽ ഇടംപിടിച്ച നേപ്പാൾ പ്രധാനമന്ത്രി ശർമ്മ ഒലിയെ ഭരണകക്ഷിയായ നേപ്പാൾ കമ്മ്യൂണിസ്റ്റ്​ പാർട്ടി (എൻ.സി.പി)യിൽ നിന്ന്​ പുറത്താക്കി. ഞായറാഴ്ച പാർട്ടിയിലെ വിമത വിഭാഗം സെൻട്രൽ കമ്മിറ്റി യോഗം വിളിച്ചുചേർത്താണ്​ ഈ തീരുമാനമെടുത്തത്​. 'ശർമ്മ ഒലിയുടെ പാർട്ടി അംഗത്വം റദ്ദാക്കി'- യോഗത്തിനുശേഷം വിമത ഗ്രൂപ്പിന്‍റെ വക്​താവ്​ നാരായൺ കാജി ശ്രേഷ്​ഠ മാധ്യമങ്ങളോട്​ പറഞ്ഞു.

വെള്ളിയാഴ്ച വിമത വിഭാഗം നേതാക്കൾ ഒലിയുടെ അംഗത്വം റദ്ദാക്കുമെന്ന്​ വ്യക്​തമാക്കിയിരുന്നു. കഴിഞ്ഞമാസം 20ന്​ നേപ്പാൾ പാർലമെന്‍റ്​ പിരിച്ചുവിടാൻ ഒലി ശിപാർശ ചെയ്​തിരുന്നു. ഇതിനെ ചോദ്യം ചെയ്​ത്​ പാർട്ടിയിലെ ഒരു വിഭാഗം രംഗത്തെത്തിയിരുന്നു. ഒരുമാസത്തിനിടെ രണ്ട്​ തവണയാണ്​ ഈ തീരുമാനത്തിനെതിരെ അവർ തെരുവിലിറങ്ങിയത്​.

'ഞങ്ങൾ ഒലിയെ എൻ.സി.പിയുടെ ചെയർമാൻ സ്​ഥാനത്തുനിന്ന്​ പുറത്താക്കിയിരിക്കുകയാണ്​. ഇനി അദ്ദേഹത്തിനെതിരെ ഞങ്ങൾ അച്ചടക്ക നടപടി സ്വീകരിക്കും. കാരണം, കമ്യൂണിസ്​റ്റ്​ പാർട്ടിയിൽ അംഗമായിരിക്കാനുള്ള യോഗ്യത അദ്ദേഹത്തിനില്ല. ഞങ്ങൾ അദ്ദേഹത്തോട്​ വിശദീകരണം തേടിയിരുന്നു. പക്ഷേ, ഇതുവരെ മറുപടി നൽകിയിട്ടില്ല'- വിമത വിഭാഗം നേതാവ്​ മാധവ്​ കുമാർ നേപ്പാൾ പറഞ്ഞു. തെറ്റ്​ തിരുത്തിയാലും ഇനി ഒലിയുമായുള്ള കൂട്ടുകെട്ടിന്​ എൻ.സി.പിക്ക്​ താൽപര്യമില്ലെന്നും അദ്ദേഹം വ്യക്​തമാക്കി.

മുന്‍ പ്രധാനമന്ത്രി പ്രചണ്ഡയുമായി പാര്‍ട്ടിക്കുള്ളില്‍ തുടരുന്ന അധികാര വടംവലി രൂക്ഷമായതോടെയാണ് പാര്‍ലമെന്‍റ്​ പിരിച്ചുവിടാന്‍ ശര്‍മ ഒലി രാഷ്​ട്രപതി ബിദ്യദേവി ഭണ്ഡാരിയോട് ശുപാര്‍ശ ചെയ്തത്. എന്നാൽ, ഒലിയുടെ തീരുമാനം ഭരണഘടനാ വിരുദ്ധമാണെന്ന് പാർട്ടിയിലെ മുതിർന്ന നേതാക്കൾ ചൂണ്ടിക്കാട്ടുന്നത്​. പാർട്ടിയോട് ആലോചിക്കാതെ എടുക്കുന്ന ഇത്തരം തീരുമാനങ്ങൾക്ക് ഒലി വലിയ വില കൊടുക്കേണ്ടി വരുമെന്ന് മുതിർന്ന നേതാക്കൾ അന്നേ വ്യക്​തമാക്കിയിരുന്നു.