സൂചിയെ തടവിലാക്കിയ മ്യാന്മറിൽ സ്വയം പ്രധാനമന്ത്രിയായി പ്രഖ്യാപിച്ച്​ സൈനിക മേധാവി

നായ്​പിഡാവ്​: സർക്കാറിനെ പുറത്താക്കി സൈന്യം അധികാരം പിടിച്ച മ്യാന്മറിൽ സ്വയം പ്രധാനമന്ത്രിയായി പ്രഖ്യാപിച്ച്​ സൈനിക മേധാവി മിൻ ഓങ്​ ഹ്​ലായിങ്​. ആറു മാസം മുമ്പാണ്​ ജനാധിപത്യപരമായി തെരഞ്ഞെടുക്കപ്പെട്ട സർക്കാറിനെ പുറത്താക്കി സൈന്യം ഭരണമേറ്റെടുത്തത്​. ഭരണമുന്നണി നേതാവായിരുന്ന ഓങ്​ സാൻ സൂചിയുൾപെടെ അറസ്റ്റിലായിരുന്നു. രണ്ടു വർഷത്തിനിടെ വീണ്ടും തെരഞ്ഞെടുപ്പ്​ നടത്തി പുതിയ പ്രധാനമന്ത്രിക്ക്​ അധികാരം കൈമാറുമെന്നാണ്​ സൈനിക മേധാവിയുടെ വാഗ്​ദാനം. 2023 ആഗസ്​റ്റോടെ അടിയന്തരാവസ്​ഥ ലക്ഷ്യം നേടുമെന്നും ബഹുകക്ഷി തെരഞ്ഞെടുപ്പ്​ തന്നെയാകും നടക്കുകയെന്നും അദ്ദേഹം പറയുന്നു.

പുതിയ പ്രഖ്യാപനത്തോടെ രാജ്യം നീണ്ട രണ്ടരവർഷം സൈന്യത്തിനു കീഴിലാകുമെന്നുറപ്പായി. ഒരു വർഷത്തിനകം ഭരണം കൈമാറുമെന്നായിരുന്നു നേരത്തെ വാഗ്​ദാനം. ഫെബ്രുവരി ഒന്നിനാണ്​ രാജ്യത്ത്​ അടിയന്തരാവസ്​ഥ പ്രഖ്യാപിച്ചത്​. 2008ൽ നിലവിൽവന്ന ഭരണഘടന ഇത്​ അനുവദിക്കുന്നുണ്ടെന്ന്​ സൈന്യം പറയുന്നു.

സർക്കാറിനെ പുറത്താക്കിയതിനെതിരെ നടന്ന പ്രതിഷേധങ്ങളിൽ ഇതുവരെ 939 പേർ കൊല്ലപ്പെട്ടിട്ടുണ്ട്​.