മുസ്​ലിം കൗൺസിൽ ഓഫ്​ ബ്രിട്ടന്​ ആദ്യ വനിതാ സെക്രട്ടറി ജനറൽ

ബ്രിട്ടനിലെ ഏറ്റവും വലിയ മുസ്ലിം സംഘടനയായ മുസ്​ലിം കൗൺസിൽ ഓഫ് ബ്രിട്ടൺ (എംസിബി) സെക്രട്ടറി ജനറൽ സ്ഥാനത്തേക്ക്​ സാറ മുഹമ്മദ് തിരഞ്ഞെടുക്കപ്പെട്ടു. 500'ൽ പരം അഫിലിയേറ്റ് സംഘടനകൽ പ്രവർത്തിച്ചു വരുന്ന എം.സി.ബിയുടെ ഭാരവാഹികൾക്കുള്ള തിരഞ്ഞെടുപ്പ് ഫെബ്രുവരി 24ന് പൂർത്തിയായിരുന്നു. ഹറൂൻ ഖാ​െൻറ നാല്​ വർഷത്തെ സേവനത്തിനു ശേഷമാണ്​ സാറ മുഹമ്മദ് സെക്രട്ടറി ജനറൽ സ്ഥാനത്തേക്ക്​ തിരഞ്ഞെടുക്കപ്പെടുന്നത്. ഇമാമും അധ്യാപകനും മീഡിയ അവതാരകനുമായ അജ്മൽ മസൃറിനെ പിന്തള്ളിയാണ് സാറയെ തെരഞ്ഞെടുത്തത്​.

ഹ്യൂമൻ റൈറ്‌സ് നിയമത്തിൽ ബിരുദാനന്തര ബിരുദ ധാരിയായ സാറ എം.സി.ബിയുടെ സെക്രട്ടറി ജനറൽ ആയി തിരഞ്ഞെടുക്കപ്പെടുന്ന ആദ്യ വനിതയാണ്. അസിസ്റ്റൻറ്​ സെക്രട്ടറി ജനറൽ ആയി അവർ മുൻപ്‌ സേവനം അനുഷ്ഠിച്ചിരുന്നു.

എം.സി.ബിയെ ബ്രിട്ടീഷ് മുസ്ലിംകളുടെ സമഗ്രവും വൈവിധ്യപൂർണവുമായ പ്രതിനിധാനത്തിന് തുടർന്നും ശക്തിപ്പെടുത്തുക എന്നതാവും ത​െൻറ ലക്ഷ്യമെന്നും, ആദ്യ വനിതാ സെക്രട്ടറി ജനറൽ ആയി തിരഞ്ഞെടുക്കപ്പെട്ടത് ഒരു അംഗീകാരമായി കണക്കാക്കുന്നു എന്നും, ഇത്​ വരും തല മുറയ്ക്ക് ഒരു പ്രചോദനമാകുമെന്നും സാറ പറഞ്ഞു.

ഹസൻ ജൗധി ഡെപ്യൂട്ടി സെക്രട്ടറി ജനറൽ ആയി വീണ്ടും തിരഞ്ഞെടുക്കപ്പെട്ടു. 28 മെമ്പർമാർ അടങ്ങുന്ന നാഷണൽ കൗൺസിലും ഇന്ന് തിരഞ്ഞെടുക്കപ്പെട്ടു. എംസിബിയുടെ വാർഷിക ജനറൽ മീറ്റിംഗിൽ ആണ് തിരഞ്ഞെടുപ്പ് ഫലങ്ങൾ പ്രഖ്യാപിക്കപ്പെട്ടത്.