60 അടി താഴെ പാറക്കൂട്ടത്തിലേക്ക്​ തലയിടിച്ച്​ വീണു; ഡോക്ടർമാരെ അമ്പരപ്പിച്ച്​ ജീവിതത്തിലേക്ക്​ മടക്കം

കോൺ‌വാൾ (യു.കെ): ചികിത്സിച്ച ഡോക്​ടർമാർക്ക്​ വരെ ഇപ്പോഴും വിശ്വസിക്കാനായിട്ടില്ല, റെബേക്ക ജീവിതത്തിലേക്ക്​ തിരിച്ചുവന്നുവെന്ന്​. കുന്നിൻചെരുവിലൂടെ നടക്കവേ കാൽതെറ്റി​ 60 അടി താഴെയുള്ള പാറക്കൂട്ടങ്ങളിലേക്ക്​ തലയിടിച്ചു വീണ റെബേക്ക ക്രോഫോർഡ് എന്ന 37 കാരിയാണ്​ ജീവിതത്തിലേക്ക്​ തിരികെ എത്തിയത്​. 'ഇത്ര ഉയരത്തിൽനിന്ന്​ തലയിടിച്ച്​ വീണ ഒരാൾ ജീവനോടെ ബാക്കിയാകുന്നത്​ ഇതാദ്യമാണ്​' -അവളെ ചികിത്സിച്ച ഡോക്​ടർമാർ പറഞ്ഞു.

കഴിഞ്ഞ ജൂണിൽ കോൺ‌വാളിലെ ലാമോർണ അഴിമുഖത്തെ​ തീരത്തുകൂടി കുടുംബത്തോടൊപ്പം നടക്കവേയാണ്​ റെബേക്ക വീണത്​. ബന്ധുക്കൾ ഉടൻ 999 എന്ന ഹെൽപ്​ലൈൻ നമ്പറിൽ വിളിച്ചു. കോസ്റ്റ്ഗാർഡും കോൺ‌വാൾ എയർ ആംബുലൻസും നിമിഷങ്ങൾക്കകം പറന്നെത്തി റെബേക്ക​െയ ആശുപത്രിയിലെത്തിച്ചു.

''56 അടി താഴേക്കാണ്​ വീണതെന്ന്​ എനിക്ക്​ വിശ്വസിക്കാനാവുന്നില്ല. വലിയ ശബ്​ദത്തോടെ എന്‍റെ തല പാറയിൽ ഇടിച്ചു. കടുത്ത വേദനയായിരുന്നു. ജീവതത്തിൽ ഇതുപോലൊന്ന് അനുഭവിച്ചിട്ടില്ല. ശരീരമാസകലം നുറുങ്ങുന്ന വേദന. വീഴ്ചയെ കുറിച്ച്​ ഓർക്കാൻ തന്നെ പേടിയാകുന്നു. ഞാൻ മരിച്ചെന്നു കരുതി എന്‍റെ ബന്ധുക്കൾ നിലവിളിക്കുന്നുണ്ടായിരുന്നു" -ഭയാനകമായ അനുഭവത്തെക്കുറിച്ച് റെബേക്ക ഓർത്തെടുത്തു.

'സിനിമകളിലൊക്കെ കാണുന്നതുപോലെയായിരുന്നു റെബേക്ക വീണത്​. ശരീരം പറന്നുപോകുന്നതുപോലെ അവൾ വീണു. വീഴ്ചയിൽ പാറകളിലൊക്കെ തട്ടിത്തെറിച്ചു. താഴേക്ക്​ നോക്കി "ദൈവമേ, എന്‍റെ സഹോദരി മരിച്ചു" എന്ന് നിലവിളിക്കുകയായിരുനു ഞാൻ' -സംഭവ ദിവസം റെബേക്കയോടൊപ്പം ഉണ്ടായിരുന്ന സഹോദരി ഡെബ്സ് പറഞ്ഞു.

തക്കസമയത്ത്​ കോസ്റ്റ്ഗാർഡ് എത്തി റെബേക്കയെ ആശുപത്രിയിൽ എത്തിച്ചതിനാൽ ജീവൻ തിരിച്ചുകിട്ടി. തലയുടെ പുറംഭാഗത്ത്​ കാര്യമായ പരിക്കേറ്റെങ്കിലും ഉള്ളിൽ രക്തസ്രാവമില്ലെന്ന്​ സിടി സ്കാൻ പരിശോധനയിൽ കണ്ടെത്തി. ന​ട്ടെല്ലിന്​ ചെറിയ ക്ഷതമുണ്ടായിരുന്നെങ്കിലും ശസ്ത്രക്രിയ ആവശ്യമില്ലായിരുന്നു. അഞ്ച് ദിവസത്തെ ആശുപത്രിവാസത്തിന്​ ശേഷം ശേഷം ഡിസ്ചാർജായ റെബേക്ക, സംഭവിച്ചതൊക്കെ ഒരു ദുഃസ്വപ്​നം പോലെ കരുതുകയാണ്​.