ബ്രിട്ടനിൽ ആശുപത്രിയിൽ സ്​ഫോടനം; മൂന്നു പേർ അറസ്റ്റിൽ

ലിവർപൂൾ: ബ്രിട്ടനിലെ ലിവർപൂളിൽ ആശുപത്രിയിൽ സ്​ഫോടനം നടത്തിയതെന്ന്​ സംശയിക്കുന്ന മൂന്നു പേർ പൊലീസ്​ പിടിയിലായി. തീവ്രവാദ നിയമപ്രകാരമാണ്​ അറസ്റ്റ്. ഞായറാഴ്ച ലിവർപൂൾ വനിതാ ആശുപത്രിക്ക് പുറത്ത് യാത്രക്കാരനെ കയറ്റിക്കൊണ്ടിരുന്ന ടാക്​സി കാർ സ്​ഫോടനത്തിൽ പൊട്ടിത്തെറിച്ച്​ ഒരാൾ മരിച്ചിരുന്നു.

സംഭവസ്ഥലത്ത് തന്നെ മരിച്ച യാത്രക്കാരനെ ഇതുവരെ ഔദ്യോഗികമായി തിരിച്ചറിഞ്ഞിട്ടില്ല. പരിക്കേറ്റ ഡ്രൈവർ ആശുപത്രിയിൽ ചികിത്സയിലാണ്. 29, 26, 21 വയസ് പ്രായമുള്ള മൂന്ന് പേരെയാണ്​ നഗരത്തിലെ കെൻസിംഗ്​ടൺ പ്രദേശത്തുവെച്ച്​ നോർത്ത് വെസ്റ്റ്​ പൊലീസ്​ പിടികൂടിയത്​.

ഇന്ന് ലിവർപൂളിൽ നടന്ന ദാരുണമായ സംഭവത്തിൽ ദുരിതമനുഭവിക്കുന്ന എല്ലാവർക്കുമൊപ്പം താനുണ്ടെന്ന്​ പ്രധാനമന്ത്രി ബോറിസ് ജോൺസൺ ട്വിറ്ററിൽ അറിയിച്ചു.

എമർജൻസി സർവ്വീസ്​ നടത്തിയവരോടും അവരുടെ പെട്ടെന്നുള്ള പ്രതികരണത്തിനും പ്രൊഫഷണലിസത്തിനും ഞാൻ നന്ദി പറയാൻ ആഗ്രഹിക്കുന്നു, അന്വേഷണം തുടരുന്ന പൊലീസിനും -ബോറിസ്​ ട്വീറ്റ്​ ചെയ്​തു.