ടോകിയോ ട്രെയിനിലെ കത്തിക്കുത്ത്​ പ്രതിക്ക്​ സന്തോഷത്തോടെയിരിക്കുന്ന സ്​ത്രീകളെ കൊലപ്പെടുത്താൻ മോഹം

ടോകിയോ: ഒളിമ്പിക്​സ്​ നടക്കുന്ന ജപ്പാൻ തലസ്​ഥാന നഗരത്തിലെ ട്രെയിനിൽ 10 പേരെ കുത്തിപ്പരിക്കേൽപിച്ചതിന്​ പിടിയിലായ പ്രതിയുടെ കൈയിലിരിപ്പ്​ കേട്ട്​ പൊലീസ്​ ഞെട്ടി. സന്തോഷ​ത്തോടെ നടക്കുന്ന സ്​ത്രീകളെ കാണാൻ ഇഷ്​ടമില്ലെന്നും അവരെ വധിക്കലായിരുന്നു തന്‍റെ ലക്ഷ്യമെന്നും ഇയാൾ ​മൊഴി നൽകി.

വെള്ളിയാഴ്ച രാത്രി 8.40നാണ്​ നഗരത്തിന്‍റെ പടിഞ്ഞാറൻ​ മേഖലയിലെ ഒഡാക്യു ലൈനിൽ ആക്രമണമുണ്ടായത്​. 10 പേർക്ക്​ കുത്തേറ്റതിൽ യൂനിവേഴ്​സിറ്റി വിദ്യാർഥിനിയായ ഒരാളുടെ നില ഗുരുതരമാണ്​. മറ്റുള്ളവരുടെ പരിക്ക്​ സാരമുള്ളതല്ല.

ആറു വർഷം മുമ്പാണ്​ ഇതേ ചിന്ത വന്നുതുടങ്ങിയതെന്നും നിരവധി പേരെ വധിക്കണമെന്നുണ്ടായിരുന്നുവെന്നും ഇയാൾ പൊലീസിനോട്​ പറഞ്ഞു. ട്രെയിനിലും പുറത്തും യാത്രക്കാർക്ക്​ നേരെ ആക്രമണ സംഭവങ്ങൾ മുമ്പും റിപ്പോർട്ട്​ ചെയ്യപ്പെട്ടിരുന്നുവെങ്കിലും ആദ്യമായാണ്​ ഇതേ മനോഭാവം പിടിക്കപ്പെടുന്നത്​. 2008ൽ ട്രക്കിലെത്തിയ ആൾ ആൾക്കൂട്ടത്തിലേക്ക്​ ഇടിച്ചുകയറ്റിയ ശേഷം ഇറങ്ങി നിരവധി കത്തിക്കുത്ത്​ നടത്തിയിരുന്നു. ഏഴുപേരാണ്​ മരിച്ചത്​.