കോവിഡിനെ മെരുക്കണം, സമ്പദ്‌വ്യവസ്ഥ പുതുക്കിപ്പണിയണം, വംശീയതയോട്​ സംവദിക്കണം- നയം പ്രഖ്യാപിച്ച്​ കമല ഹാരിസ്​

ന്യൂയോർക്ക്​: അമേരിക്കയിൽ വൈസ്​ പ്രസിഡൻറായി തെരഞ്ഞെടുക്കപ്പെട്ടതിന്​ പിന്നാലെ കമല ഹാരിസ്​ പുതിയ ചുവടുവെപ്പിന്​ ഒരുങ്ങുന്നു. തങ്ങളുടെ ആദ്യ ലക്ഷ്യങ്ങൾ ഇവയായിരിക്കുമെന്ന്​ ഫേസ്​ബുക്കിലൂടെ കമല പ്രഖ്യാപിച്ചു.

' കോവിഡ്​ നിയന്ത്രണത്തിലാക്കാൻ ബൈഡനും ഞാനും തയാറാവുന്നു. നമ്മുടെ സാമ്പത്തിക രംഗം പുതുക്കിപ്പണിയാൻ ഞങ്ങൾ ഒരുങ്ങി. കാലാവസ്​ഥ വെല്ലുവിളികൾ അഭിമുഖീകരിക്കാൻ ഞങ്ങൾ തയാറാണ്​. വംശീയതതോട്​ സംവദിക്കാൻ ഞങ്ങൾ ഒരുങ്ങി. നിങ്ങൾക്ക്​ വേണ്ടി പോരടിക്കാൻ ഞങ്ങൾ തായാറായിക്കഴിഞ്ഞു'- കമല ഹാരിസ്​ ഫേസ്​ബുക്ക്​ പോസ്​റ്റിൽ പറഞ്ഞു.

ഇന്ത്യൻ വംശജയും കറുത്തവർഗക്കാരിയുമായ കമല ഹാരിസ്​ യു.എസി​െൻറ പ്രഥമ വനിത വൈസ്​ പ്രസിഡൻറാണ്​. ആഗസ്​റ്റിൽ പാർട്ടിയുടെ വൈസ്​ പ്രസിഡൻറ്​ സ്ഥാനാർഥിയായി പ്രഖ്യാപിച്ചത്​ മുതൽ ട്രംപിന്​ നേരെ കടുപ്പമേറിയ ചോദ്യങ്ങളെറിഞ്ഞ്​ ബൈഡനൊപ്പം മുൻനിരയിൽ കമലയുമുണ്ടായിരുന്നു.

നേരത്തെ, വിജയിച്ചതിനു പിന്നാലെ 'ഒരു പാട്​ ജോലി ബാക്കിയു​ണ്ട്​ നമുക്ക്​ തുടങ്ങാമെന്നായിരുന്നു കമല ഹാരിസിൻെറ ആദ്യ പ്രതികരണം.

' ജോ ബൈഡൻ, കമലഹാരിസ്​ എന്നിവർക്കുമപ്പുറം അമേരിക്കയുടെ ആത്​മാവിന്​ വേണ്ടിയുള്ള തെരഞ്ഞെടുപ്പായിരുന്നു ഇത്​. അത്​ തിരിച്ച്​ പിടിക്കാനുള്ള പോരാട്ടമാണ്​ നടന്നത്​. ഒരുപാട്​ ജോലികൾ തീർക്കാനുണ്ട്​. നമുക്ക്​ തുടങ്ങാം' -കമല ഹാരിസ്​ ട്വിറ്ററിൽ കുറിച്ചിരുന്നു. 'വൈസ്​ പ്രസിഡൻറായ ആദ്യ വനിത താനാണ്​ പക്ഷേ ഒരിക്കലും അവസാനത്തേത്​ ആകില്ലെന്ന കമലഹാരിസി​െൻറ പ്രഖ്യാപനവും ലോകമാധ്യമങ്ങൾ ഏറ്റെടുത്തിരുന്നു.