ഞങ്ങൾക്ക്​ വാക്​സിൻ നൽകൂ; ദരിദ്ര രാജ്യങ്ങൾക്കായി അഭ്യർഥിച്ച്​ ലോകാരോഗ്യ സംഘടന

ജനീവ: ലോകത്തിലെ വാക്​സിൻ വിതരണത്തിലെ അസമത്വത്തിൽ അപലപിച്ച്​ ലോകാരോഗ്യ സംഘടന. വികസിത രാജ്യങ്ങൾ തങ്ങളുടെ പൗരൻമാർക്ക്​ വാക്​സിൻ നൽകി സുരക്ഷിതത്വം ഉറപ്പാക്കുകയും സാമൂഹിക അന്തരീക്ഷം തിരിച്ചെടുക്കുകയും ചെയ്യുന്നു. എന്നാൽ ദരിദ്ര രാജ്യങ്ങളിൽ വാക്​സിൻ ക്ഷാമം രൂക്ഷമായി തുടരുകയാണെന്നും ഇതിൽ അപലപി​ക്കുന്നുവെന്നും ലോകാരോഗ്യ സംഘടന പറഞ്ഞു.

ആഫ്രിക്കയിൽ പുതുതായി കോവിഡ്​ സ്​ഥിരീകരിക്കുന്നവരുടെയും ജീവൻ നഷ്​ടമാകുന്നവരുടെ എണ്ണവും മുൻ ആഴ്​ചയെ അപേക്ഷിച്ച്​ ഇൗ ആഴ്​ചയിൽ 40 ശതമാനം കൂടി. ഡെൽറ്റ വൈറസ്​ ആഗോള തലത്തിൽ പടർന്നുപിടിക്കുന്നത്​ വളരെയധികം അപകടകാരിയാണ്​ -ലോകാരോഗ്യ സംഘടന തലവൻ ട്രെഡോസ്​ അദാനോം ഗെബ്രിയേസസ്​ പറഞ്ഞു. ആഗോള സമൂഹം എന്നനിലയിൽ സമ്മുടെ സമൂഹം പരാജയപ്പെടുകയാണെന്നും വാർത്താ​സമ്മേളത്തിൽ അ​ദ്ദേഹം കൂട്ടിച്ചേർത്തു.

കുറഞ്ഞ വരുമാനമുള്ള രാജ്യങ്ങളുമായി വാക്​സിൻ പങ്കിടാൻ വിമുഖത കാട്ടിയ രാജ്യ​ങ്ങളെ പേരെടുത്ത്​ പറയാതെ അദ്ദേഹം വിമർശിച്ചു. ആഫ്രിക്കൻ രാജ്യങ്ങൾക്ക്​ സങ്കീർണമായ ചികിത്സകൾ നൽകാൻ സാധിക്കില്ലെന്ന്​ ചിലർ വിമർശിച്ചപ്പോൾ എച്ച്​.ഐ.വി/എയ്​ഡ്​സ്​ പ്രതിസന്ധിയുമായി അദ്ദേഹം താരതമ്യപ്പെടുത്തി.

ഇൗ മനോഭാവം പഴയതാണെന്ന്​ ഞാൻ ഒാർമിപ്പിക്കുന്നു. ഇപ്പോൾ നിലനിൽക്കുന്നത്​ വിതരണത്തി​െൻറ പ്രശ്​നമാണ്​, അതിനാൽ അവർക്ക്​ വാക്​സിൻ നൽകൂ -അദാനോം പറഞ്ഞു.

പോളിയോ, കോളറ തുടങ്ങിയവയിൽ ചില രാജ്യങ്ങളുടെ പ്രതിരോധ പ്രവർത്തനങ്ങൾ വികസിത രാജ്യങ്ങളേക്കാൾ മെച്ചപ്പെട്ടതായിരുന്നുവെന്ന്​ ഡബ്ല്യൂ.എച്ച്​.ഒ വിദഗ്​ധരിൽ ഒരാളായ മൈക്ക്​ റയാൻ പറഞ്ഞു. ഇൗ മഹാമാരി സമയത്തും ഞങ്ങൾ നിങ്ങൾക്ക്​ വാക്​സിൻ നൽകില്ല, കാരണം നിങ്ങൾ അവ പാഴാക്കുമോയെന്ന്​ ഭയപ്പെടുന്നുവെന്ന കൊളോണിയൽ മനോഭാവം ഗൗരവത്തോടെയാണ്​ കാണുന്നതെന്നും അദ്ദേഹം കൂട്ടിച്ചേർത്തു.

ദരിദ്ര രാജ്യങ്ങൾക്ക്​ കോവിഡ്​ വാക്​സിൻ ലഭ്യമാക്കുന്നതിനായി ലോകാരോഗ്യ സംഘടനയുടെ നേതൃത്വത്തിൽ 'കോവാക്​സ്​' ആരംഭിച്ചിരുന്നു. ഇതിലൂടെ 132 രാജ്യങ്ങൾക്ക്​ 90 മില്ല്യൺ വാക്​സിൻ ഡോസുകൾ നൽകുകയും ചെയ്​തിരുന്നു. എന്നാൽ, വാക്​സിൻ നിർമാതാക്കളായ ഇന്ത്യ വാക്​സിൻ കയറ്റുമതി നിർത്തിവെച്ചതോടെ പ്രതിസന്ധിയിലാകുകയായിരുന്നു.