അമേരിക്ക ഇരുണ്ട കാലഘട്ടത്തിൽനിന്ന്​ പുറത്തുകടക്കും –ബൈഡൻ

ന്യ​ൂയോർക്​: അമേരിക്ക ഇരുണ്ട കാലഘട്ടത്തിൽനിന്ന്​ പുറത്തുകടക്കുമെന്ന്​ ഡെമോക്രാറ്റിക്​ പാർട്ടി പ്രസിഡൻറ്​ സ്ഥാനാർഥി ജോ ബൈഡൻ. ഭയത്തെയും വിഭജനത്തെയും മറികടന്ന്​ അമേരിക്ക ​പ്രതീക്ഷയെ തെരഞ്ഞെടുക്കും. വിദ്വേഷവും ഭിന്നിപ്പും പ്രചരിപ്പിക്കുന്ന പ്രസിഡൻറ്​ ഡോണൾഡ്​ ​ട്രംപ്​, ഉത്തരവാദിത്വം ഏറ്റെടുക്കുന്നതിൽ പരാജയപ്പെട്ട നേതാവാണെന്നും അദ്ദേഹം പറഞ്ഞു.

ഡെമോക്രാറ്റിക്​ പാർട്ടിയുടെ ചതുർദിന കൺവെൻഷ​​െൻറ സമാപനദിവസം പ്രസിഡൻറ്​ സ്ഥാനം ഏറ്റെടുത്ത്​ സംസാരിക്കുകയായിരുന്നു അദ്ദേഹം. 100 വർഷത്തിനിടയിലെ ഏറ്റവും വലിയ മഹാമാരി, മഹാമാന്ദ്യത്തിനു ശേഷമുള്ള ഏറ്റവും വലിയ സാമ്പത്തിക പ്രതിസന്ധി, പൗരാവകാശ പോരാട്ട കാലയളവിന്​ ശേഷമുള്ള ഏറ്റവും വലിയ നീതിക്കുള്ള പോരാട്ടം, കാലാവസ്ഥ പ്രതിസന്ധി എന്നീ നാല്​ വലിയ വെല്ലുവിളികൾ ഒരേസമയം നേരിടുകയാണ്​.

നമ്മളെയും രാജ്യത്തെയും സംരക്ഷിക്കുന്നതിൽ പരാജയപ്പെട്ട പ്രസിഡൻറ്​, പ്രാഥമിക ഉത്തരവാദിത്വം മറന്നു. വോട്ടുകൾക്കപ്പുറം അമേരിക്കയുടെ ആത്മാവും ഹൃദയവും സ്വന്തമാക്കാനാണ്​ പ്രചാരണമെന്നും അദ്ദേഹം പറഞ്ഞു.