തോൽവിക്ക്​ കാരണം ട്രംപിൻെറ മരുമകൻ; റിപബ്ലിക്കൻ പാർട്ടിയിൽ വിമർശനം

വാഷിങ്​ടൺ: യു.എസ്​ തെരഞ്ഞെടുപ്പിലെ തോൽവിക്ക്​ കാരണം ഡോണൾഡ്​ ട്രംപിൻെറ മരുമകൻ ജാരെദ്​ കുഷ്​നറാണെന്ന്​ റി​പബ്ലിക്കൻ പാർട്ടിയിൽ വിമർശനം. വൈറ്റ്​ ഹൗസിൽ മുതിർന്ന ഉപദേശകനായി സേവനമനുഷ്​ഠിച്ച ജാരെദ്​ കുഷ്​നറിൻെറ നിർദേശങ്ങളാണ്​ തോൽവിയിലേക്ക്​ നയിച്ചതെന്നാണ്​ പാർട്ടിയിലെ ഒരു വിഭാഗം പറയുന്നത്​.

തെരഞ്ഞെടുപ്പിൻെറ പ്രചാരണം തുടങ്ങിയത്​ മുതൽ തന്ത്രങ്ങൾ മെനഞ്ഞത്​ കുഷ്​നറായിരുന്നു. ട്രംപിൻെറ കാമ്പയിൻ മാനേജറായ ബ്രാഡ്​ പാർസ്​കൽ സ്ഥാനമൊഴിയുന്നതിലേക്ക്​ നയിച്ചത്​ കുഷ്​നറിൻെറ ഇടപെടലുകളായിരുന്നുവെന്നാണ്​ വിലയിരുത്തൽ. ട്രംപിൻെറ അവസാനത്തെ രണ്ട്​ ദിവസത്തെ 10 റാലികളിലും കുഷ്​നറുണ്ടായിരുന്നു. അന്ന്​ ​ട്രംപിൻെറ പ്രചാരണ ചുമതല മുഴുവൻ ഏറ്റെടുത്ത്​ നടത്തിയത്​ കുഷ്​നർ ഒറ്റക്കായിരുന്നു.

തെരഞ്ഞെടുപ്പിൻെറ ആദ്യം മുതൽ അവസാനം വരെ കുഷ്​നറായിരുന്ന തെരഞ്ഞെടുപ്പ്​ ചുമതലയിലുണ്ടായിരുന്നത്​. ട്രംപ്​ ജയിച്ചാൽ അതിൻെറ ക്രെഡിറ്റ്​ സ്വാഭാവികമായി കുഷ്​നർക്ക്​ പോകും. തെരഞ്ഞെടുപ്പിൽ പരാജയമുണ്ടായതോടെ കുഷ്​നർ അതിൻെറ ഉത്തരവാദത്തവും ഏറ്റെടുക്കണമെന്നതാണ്​ റിപബ്ലിക്കൻ പാർട്ടിയിൽ ഉയരുന്ന ആവശ്യം. എന്നാൽ, പാർട്ടിയിലെ ഒരു വിഭാഗം കുഷ്​നറിനെ പ്രതിരോധിച്ചും രംഗത്തെത്തിയിട്ടുണ്ട്​.