രണ്ട്​ മിനിറ്റ്​ നേരത്തേ ജോലി അവസാനിപ്പിച്ചിറങ്ങി; ജീവനക്കാരുടെ ശമ്പളം വെട്ടിക്കുറച്ച്​ ജാപ്പനീസ്​ സർക്കാർ

ടോക്യോ: രണ്ട്​ മിനിറ്റ്​ നേരത്തെ ജോലി അവസാനിപ്പിച്ച്​ ഇറങ്ങിയതിന്​ ജീവനക്കാരുടെ ശമ്പളം വെട്ടിക്കുറച്ച്​ ജപ്പാൻ സർക്കാർ. മാർച്ച്​ ആദ്യവാരമാണ്​ നേരത്തെ ​പുറത്തിറങ്ങിയവരുടെ ശമ്പളം സർക്കാർ വെട്ടിക്കുറച്ചത്​. ഫുഭാഷി സിറ്റി ബോർഡ്​ ഓഫ്​ എഡ്യൂക്കേഷനിലാണ്​ സംഭവം.

2019 മേയ്​ മുതൽ 2021 ജനുവരി വരെ 319 പേരാണ്​ ഇത്തരത്തിൽ നേരത്തെ ജോലി വിട്ട്​ പുറത്തിറങ്ങിയത്​. വീട്ടിലേക്ക്​ നേരത്തെയുള്ള ബസ്​ കിട്ടുന്നതിനായിരുന്നു ജോലി സ്ഥലത്ത്​ വേഗം പുറത്തിറങ്ങിയതെന്നാണ്​ ജീവനക്കാരുടെ വിശദീകരണം.

5.15 ആണ്​ ജീവനക്കാർക്ക്​ ജോലി അവസാനിപ്പിച്ച്​ പുറത്തിറങ്ങാനുള്ള സമയം. എന്നാൽ, പലരും 5.13ന്​ തന്നെ പുറത്തിറങ്ങിയെന്ന്​ ഓഫീസിലെ അറ്റൻഡൻസിന്‍റെ ചുമതലയുള്ള ജീവനക്കാരൻ കണ്ടെത്തി. തുടർന്നാണ്​ നടപടിയുണ്ടായത്​.