കോവിഡി​െൻറ രണ്ടാം വരവിൽ വിറങ്ങലിച്ച്​ ഇറ്റലി; നിയന്ത്രണം വർധിപ്പിക്കാനൊരുങ്ങി രാജ്യം

റോം: ഇറ്റലിയില്‍ കോവിഡി​െൻറ രണ്ടാം ഘട്ടം രൂക്ഷമായതോടെ ഞായറാഴ്​ച മുതൽ നിയന്ത്രണങ്ങൾ വർധിപ്പിക്കാനൊരുങ്ങി രാജ്യം. 24 മണിക്കൂറിനിടെ പതിനായിരത്തിലധികം പേര്‍ക്കാണ്​ ഇറ്റലിയിൽ രോഗം സ്ഥിരീകരിച്ചത്​. 55 മരണങ്ങളും റിപ്പോർട്ട്​ ചെയ്​തു. പ്രധാനമന്ത്രി ഗ്വിസെപ്പോ കോ​െൻറയുടെ ഒാഫീസാണ്​ കോവിഡിനെ ചെറുക്കാനുള്ള പുതിയ നിയന്ത്രണങ്ങൾ പ്രഖ്യാപിക്കുമെന്ന്​ അറിയിച്ചത്​.

മഹാമാരിയെ ചെറുക്കുന്നതിനൊപ്പം വ്യക്​തികൾക്കും വ്യവസായങ്ങൾക്കുമുള്ള ആഘാതം പരിമിതപ്പെടുത്താനായി പ്രാദേശിക, ആരോഗ്യ അധികാരികളുമായി സർക്കാർ പുതിയ നിയന്ത്രണങ്ങൾ ചർച്ച ചെയ്യുന്നുണ്ടെന്ന് കോ​െൻറയുടെ ഓഫീസ് അറിയിച്ചിട്ടുണ്ട്​.

ആദ്യഘട്ടത്തില്‍ കോവിഡി​െൻറ ഭീകരത പെട്ടന്ന്​ നിയന്ത്രിക്കാൻ ഇറ്റലിക്ക്​​ സാധിച്ചിരുന്നു. രണ്ടാം ഘട്ടത്തിൽ മരണനിരക്ക് കുറവാണെന്നതും ആശ്വാസമുളവാക്കുന്നതാണ്​. എന്നാൽ, കേസ് വര്‍ധിക്കുന്നതോടെ മരണ നിരക്ക് കൂടാനും അതുവഴി രാജ്യത്ത്​ പഴയ അവസ്ഥ തുടരാനും സാധ്യതയുണ്ട്. യൂറോപ്പില്‍ ഏറ്റവും അധികം മഹാമാരി ബാധിച്ച രാജ്യമാണ് ഇറ്റലി. കോവിഡ് ബാധിച്ച് ഏറ്റവും കൂടുതല്‍ പേര്‍ മരിച്ച രണ്ടാമത്തെ യൂറോപ്പ്യന്‍ രാജ്യവും ഇറ്റലിയാണ്. ബ്രിട്ടനാണ്​ ഒന്നാമത്​.