ഇസ്രായേൽ സൈന്യം ഫലസ്തീൻ യുവാവിനെ കൊലപ്പെടുത്തി
text_fields
വടക്കൻ അധിനിവേശ വെസ്റ്റ് ബാങ്ക് നഗരമായ ടുബാസിൽ ഇസ്രായേൽ സൈന്യത്തിന്‍റെ വെടിയേറ്റ് ഫലസ്തീൻ യുവാവ് മരിച്ചു. തുബാസ് നഗരത്തിൽ നിന്ന് ഏകദേശം 5 കിലോമീറ്റർ തെക്ക് തമ്മൂൺ ഗ്രാമത്തിൽ നിന്നുള്ള സദ്ദാം ഹുസൈൻ ബാനി ഒദെഹ് എന്ന 26കാരനാണ് മരിച്ചത്. ചൊവ്വാഴ്ച പുലർച്ചെ ഇസ്രായേൽ സൈന്യം ഇവിടെ റെയ്ഡഡിന് എത്തിയിരുന്നു. ഇതിനിടെയാണ് യുവാവിനെ വെടിവെച്ച് കൊലപ്പെടുത്തിയത്. നഗരത്തിലേക്കുള്ള പ്രവേശന കവാടത്തിൽ നിന്ന് ഒരു ഇസ്രായേൽ സൈനികൻ തൊടുത്ത വെടിയുണ്ട യുവാവിന്‍റെ തോളിലേക്കും ഹൃദയത്തിലേക്കും ഇടത് ശ്വാസകോശത്തിലേക്കും തുളച്ചുകയറിയതായി പലസ്തീൻ ആരോഗ്യ മന്ത്രാലയം അറിയിച്ചു. ഗുരുതരമായി പരിക്കേറ്റ യുവാവിനെ അടുത്തുള്ള ആശുപത്രിയിൽ എത്തിച്ചപ്പോഴേക്കും മരണത്തിന് കീഴടങ്ങി.
വെസ്റ്റ്ബാങ്കിലെ പ്രദേശങ്ങളിൽ വ്യാപകമായ അടിച്ചമർത്തലിന്‍റെ ഭാഗമായി ഇസ്രായേൽ സൈന്യം റെയ്ഡ് തുടരുകയാണ്. ഇതിനെ ചെറുക്കാൻ ശ്രമിക്കുന്ന പ്രദേശവാസികളെ അധിനിവേശ സൈന്യം അറസ്റ്റ് ചെയ്ത് നീക്കുകയാണ്.