ഗസ്സയിലെ ഇസ്രായേൽ ക്രൂരതകൾക്ക്​​​ പിന്തുണ വിടാതെ​ ബൈഡൻ; പ്രതിഷേധവുമായി അമേരിക്കക്കാരും സെനറ്റർമാരും

വാഷിങ്​ടൺ: ഫലസ്​തീനികൾക്ക്​ ഐക്യദാർഢ്യവുമായി അമേരിക്കയും ചില സെനറ്റർമാരും രംഗ​ത്തെത്തിയിട്ടും ഇസ്രായേൽ വിഷയത്തിൽ പഴയ നിലപാടുകൾ കൂടുതൽ രൂഢമാക്കി ഡെമോക്രാറ്റ്​ പ്രതിനിധി കൂടിയായ പ്രസിഡന്‍റ്​ ജോ ബൈഡൻ. യു.എൻ രക്ഷാസമിതി വെള്ളിയാഴ്​ച അടിയന്തര യോഗം വിളിച്ചെങ്കിലും ഇസ്രായേലിനെതിരെ പ്രമേയം പാസാകുമെന്ന ഭീതിയിൽ യു.എസ്​ ഒറ്റക്ക്​ ഇടപെട്ട്​ നിർത്തിവെക്കുകയായിരുന്നു. മുമ്പും ഇസ്രായേൽ വിഷയങ്ങളിൽ മുൻനിര രാഷ്​ട്രങ്ങൾ രംഗത്തെത്തു​േമ്പാൾ വീറ്റോ പ്രയോഗിച്ച്​ അവയെ ചെറുത്തുനിന്ന യു.എസ്​ നയമാണ്​ ഇത്തവണയും തുടരുന്നത്​.

കഴിഞ്ഞ ദിവസം ഇസ്രായേൽ പ്രധാനമന്ത്രി ബിൻയമിൻ നെതന്യാഹുവിനെ വിളിച്ച ബൈഡൻ ആക്രമണം സ്വയം പ്രതിരോധത്തിന്‍റെ ഭാഗമായതിനാൽ തുടരാമെന്ന്​​ വ്യക്​തമാക്കിയിരുന്നു. അതേ സമയം, ഫലസ്​തീൻ പ്രസിഡന്‍റ്​ മഹ്​മൂദ്​ അബ്ബാസിനെ വിളിച്ച്​ അടിയന്തരമായി ഹമാസ്​ റോക്കറ്റാക്രമണം അവസാനിപ്പിക്കാൻ നിർദേശം നൽകുകയും ചെയ്​തു. ​ഫോൺ സംഭാഷണത്തിന്​ പിറകെ ആക്രമണത്തിന്​ മൂർച്ച കൂട്ടാൻ നെതന്യാഹു നിർദേശം നൽകി. എട്ടു ദിവസത്തിനിടെ ഏറ്റവും കനത്ത ബോംബാക്രമണം കണ്ട ഞായറാഴ്ച മാത്രം 42 പേരാണ്​ കൊല്ലപ്പെട്ടത്​. ഇതേ ദിവസം തകർത്ത മൂന്നു കെട്ടിട സമുച്ചയങ്ങൾക്കുള്ളിൽ കുടുങ്ങിക്കിടക്കുന്നവരിൽ എത്ര പേരെ ജീവനോടെ പുറത്തെത്തിക്കാമെന്ന പ്രതീക്ഷയുമില്ല.

ഹമാസിനെ തീവ്രവാദ സംഘടനയാക്കി മാറ്റിനിർത്തുന്നതിനാൽ മധ്യസ്​ഥ ശ്രമങ്ങൾക്കു പോലും യു.എസ്​ സന്നദ്ധമല്ല. ഹമാസുമായി സംസാരിക്കാനില്ലെന്നാണ്​ അമേരിക്കയുടെയും പ്രമുഖ രാഷ്​ട്രങ്ങളുടെയൊക്കെയും നിലപാട്​. മറുവശത്ത്​, ഇസ്രായേൽ ആക്രമണങ്ങളിൽ പിഞ്ചുകുഞ്ഞുങ്ങളും സ്​ത്രീകളുമുൾപെടെ എണ്ണമറ്റ നിരപരാധികൾ പിടഞ്ഞുവീഴു​േമ്പാഴും അത്​ സ്വയം പ്രതിരോധമായി കാണുന്നു​. ചർച്ചകൾക്കായി ഹാദി ആമിറിനെ ഇസ്രായേലിലേക്ക്​ യു.എസ്​ അയച്ചിട്ടുണ്ടെങ്കിലും മുതിർന്ന നയതന്ത്ര പ്രതിനിധി പോലുമല്ലാത്തതിനാൽ ഇസ്രായേൽ വകവെക്കില്ലെന്നുറപ്പ്​.

അമേരിക്കയിൽ പക്ഷേ, ഇസ്രായേലിനെതിരെയും ബൈഡൻ നിലപാടിനെതിരെയും പ്രതിഷേധം ശക്​തമാണ്​. ഭരണം കൈയാളുന്ന ഡെമോക്രാറ്റിക്​ പാർട്ടിയിലെ 28 അംഗങ്ങൾ ഇതിനകം പരസ്യമായി ഇസ്രായേലിനെതിരെ രംഗത്തെത്തിയിട്ടുണ്ട്​. ജോർജിയ സെനറ്റർ ജോൺ ഒസോഫിന്‍റെ നേതൃത്വത്തിൽ പുറത്തിറക്കിയ സംയുക്​ത പ്രസ്​താവനയിൽ ആക്രമണം അടിയന്തരമായി നിർത്തിവെക്കണമെന്ന്​ ആവശ്യപ്പെട്ടു.