ഗ​സ്സ​ വെ​ടി​നി​ർ​ത്ത​ൽ: കെയ്റോ ചർച്ചയിലേക്ക് ഇസ്രായേൽ പ്രതിനിധി സംഘത്തെ അയക്കില്ല

കെയ്റോ: ഗ​സ്സ​യി​ൽ വെ​ടി​നി​ർ​ത്ത​ലും ബന്ദികളെ മോചിപ്പിക്കുന്നതും അടക്കമുള്ള വിഷയങ്ങളിൽ കെയ്റോയിൽ നടക്കുന്ന ചർച്ചയിലേക്ക് പ്രതിനിധി സംഘത്തെ അയക്കേണ്ടതില്ലെന്ന് ഇസ്രായേൽ തീരുമാനം. മുതിർന്ന ഇസ്രായേൽ ഉദ്യോഗസ്ഥന്‍റെ പ്രതികരണം സി.എൻ.എൻ ആണ് റിപ്പോർട്ട് ചെയ്തത്.

ചർച്ചയുടെ ഭാഗമായി കൈമാറിയ ആവശ്യങ്ങളിൽ ഹമാസ് നിലപാട് വ്യക്തമാക്കിയില്ലെന്ന് ചൂണ്ടിക്കാട്ടിയാണ് പ്രതിനിധി സംഘത്തെ അയക്കേണ്ടതില്ലെന്ന് ഇസ്രായേൽ അധികൃതർ തീരുമാനിച്ചത്. ബന്ദികളുടെ വിശദമായ പട്ടിക, ജീവിച്ചിരിക്കുന്നവരെയും മരിച്ചവരെയും കുറിച്ചുള്ള വിവരങ്ങൾ, ബന്ദികളെ കൈമാറുന്നതിന് പകരമായി ഇസ്രായേൽ ജയിലിൽ നിന്ന് വിട്ടയക്കേണ്ട ഫലസ്തീനികളുടെ എണ്ണം എന്നീ കാര്യങ്ങളാണ് ഇസ്രായേൽ ഹമാസിനോട് ആവശ്യപ്പെട്ടിരുന്നത്.

അതേസമയം, ഗസ്സയിൽ സ്ഥിരം വെടിനിർത്തൽ നടപ്പാക്കുക, ഗസ്സ മുനമ്പിൽ നിന്ന് ഇസ്രായേലി സൈനികരെ പിൻവലിക്കുക, വടക്കൻ ഗസ്സയിലേക്ക് പലായനം ചെയ്ത ഫലസ്തീനികളെ തെക്കൻ ഗസ്സയിൽ തിരികെ എത്തിക്കുക എന്നിവയാണ് ചർച്ചയിൽ ഹമാസ് മുന്നോട്ടുവെക്കുന്ന പ്രധാന നിർദേശങ്ങൾ.

കെയ്റോ ചർച്ചയിലേക്ക് പ്രതിനിധികളെ അയച്ചില്ലെങ്കിലും ആറാഴ്ചത്തെ വെടിനിർത്തൽ ഇസ്രായേൽ ഭരണകൂടം അംഗീകരിച്ചതായാണ് മുതിർന്ന അമേരിക്കൻ ഉദ്യോഗസ്ഥൻ വ്യക്തമാക്കിയത്. എന്നാൽ, മന്ദഗതിയിലെ ചർച്ച റ​മ​ദാ​നിന് മുമ്പായി വെടിനിർത്തൽ നടപ്പാക്കാനുള്ള നീക്കത്തെ പ്രതികൂലമായി ബാധിക്കുമെന്നാണ് റിപ്പോർട്ട്.

ഗ​സ്സ​യി​ൽ വെ​ടി​നി​ർ​ത്ത​ൽ സാ​ധ്യ​മാ​ക്കാ​നുള്ള ചർച്ചക്കായി ഖ​ത്ത​ർ, യു.​എ​സ്, ഹ​മാ​സ് പ്ര​തി​നി​ധി​ക​ൾ ഈ​ജി​പ്തി​ലെ കൈ​റോ​യി​ൽ എ​ത്തി​യി​ട്ടു​ണ്ട്. ത​ങ്ങ​ൾ മു​ന്നോ​ട്ടു​വെ​ക്കു​ന്ന വ്യ​വ​സ്ഥ അം​ഗീ​ക​രി​ക്കാ​ൻ ഇ​സ്രാ​യേ​ൽ സ​ന്ന​ദ്ധ​മാ​വു​ക​യാ​ണെ​ങ്കി​ൽ ബ​ന്ദി കൈ​മാ​റ്റ​ത്തി​ന് ര​ണ്ടു ​ദി​വ​സം മ​തി​യെ​ന്ന് ഹ​മാ​സ് പ്ര​തി​ക​രി​ച്ചിരുന്നു.

ഇന്നലെ ഗസ്സയിലെ റഫയിൽ അഭയാർഥികൾ താമസിച്ച തമ്പിൽ ഇസ്രായേൽ നടത്തിയ ബോംബ് ആക്രമണത്തിൽ 11 പേർ കൊലപ്പെട്ടിരുന്നു. കുട്ടികളടക്കം 90 പേരാണ് 24 മണിക്കൂറിനിടെ കൊല്ലപ്പെട്ടത്. ഗസ്സ യുദ്ധത്തിൽ ഇതുവരെ കൊല്ലപ്പെട്ടവർ 30,410 ആയി. 71,700 പേർക്ക് പരിക്കേറ്റു.