കുടിവെള്ളവും ഭക്ഷണവും വൈദ്യുതിയും വിഛേദിക്കപ്പെട്ട്​ ഗസ്സ; മരണം കൂടുന്നു

ജറൂസലം: ആക്രമണം ഉടൻ അവസാനിപ്പിക്കില്ലെന്ന്​ ഇസ്രായേൽ താത്​കാലിക പ്രധാനമന്ത്രി ബിൻയമിൻ നെതന്യാഹു പ്രഖ്യാപനം നടത്തിയതിനു പിന്നാലെ ഗസ്സക്കു മേൽ ആക്രമണം വീണ്ടും ശക്​തം. ഗസ്സയിൽ ഇതുവരെ 58 കുട്ടികളും 34 സ്​ത്രീകളുമുൾപെടെ 192 മരണം സ്​ഥിരീകരിക്കപ്പെട്ടിട്ടുണ്ട്​. ഹമാസ്​ ഇസ്രായേലിൽ നടത്തിയ ആക്രമണങ്ങളിൽ രണ്ട്​ കുട്ടികളുൾപെടെ 10 പേരും മരിച്ചു.

എട്ടുദിവസത്തിനിടെ ഏറ്റവും കനത്ത ആക്രമണം കണ്ട ഞായറാഴ്ച 42 ഫലസ്​തീനികളാണ്​ കൊല്ല​പ്പെട്ടത്​.

കുടുംബങ്ങൾ താമസിച്ച മുന്നു കെട്ടിടങ്ങൾ​ ഇസ്രായേലി ബോംബറുകൾ തകർത്തപ്പോൾ നിരവധി പേർക്ക്​ പരിക്കേൽക്കുകയും ചെയ്​തു. ഗസ്സയിലെ ഹമാസ്​ മേധാവി യഹ്​യ സിൻവറിന്‍റെ വീടും തകർക്കപ്പെട്ടു. തിങ്കളാഴ്ചയും ഏറ്റവും കടുത്ത ആക്രമണമാണ്​ ഇസ്രായേൽ തുടരുന്നതെന്ന്​ ​അസോസിയേറ്റഡ്​ പ്രസ്​ റിപ്പോർട്ട്​ ചെയ്​തു. നഗരത്തിന്‍റെ തെക്ക്​, പടിഞ്ഞാർ മേഖലകളിൽ നടക്കുന്ന ആക്രമണത്തിൽ ആളപായം അറിവായിട്ടില്ല. തിങ്കളാഴ്ച മാത്രം 55 വ്യോമാക്രമണങ്ങളാണ്​ ഗസ്സയിൽ ഇസ്രായേൽ നടത്തിയത്​. താമസ കേന്ദ്രങ്ങൾക്ക്​ പുറമെ നഗരത്തിൽനിന്ന്​ മാറി ഒഴിഞ്ഞ ഭൂമികളിലും ബോംബ്​ വർഷം നടന്നു. നഗര മധ്യത്തിലെ നാലു കെട്ടിടം ബോംബിട്ടുതകർത്തിട്ടുണ്ട്​. ഇവിടെ ആക്രമണ സമയം താമസക്കാർ ഇല്ലായിരുന്നുവെന്നാണ്​ സൂചന.

വിവിധ കെട്ടിടങ്ങൾ തകർക്ക​പ്പെടുകയും നിരത്തുകൾ ബോംബുവർഷത്തിന്‍റെ അവശിഷ്​ടങ്ങളാൽ നിറയുകയും ചെയ്​തതോടെ ഗസ്സയിൽ കടുത്ത പ്രതിസന്ധി നിലനിൽക്കുകയാണ്​. വൈദ്യുതി ലൈനുകൾ നേരത്തെ തകർത്ത ഇസ്രായേൽ കുടിവെള്ള വിതരണ സംവിധാനവും ബോംബിട്ട്​ നശിപ്പിച്ചിട്ടുണ്ട്​.

നഗരത്തിൽ 10 വൈദ്യുതി ലൈനുകളിൽ ആറും നിശ്​ചലമാണ്​. ഇതോടെ, പകുതി ഇടങ്ങളിലും വൈദ്യുതി മുടങ്ങിയിട്ട്​ ദിവസങ്ങളായി. അതിർത്തി പങ്കിടുന്ന പ്രദേശങ്ങൾ പൂർണമായും ഇരുട്ടിലാണ്​.

ആക്രമണത്തിനു പുറമെ സന്നദ്ധ പ്രവർത്തകർക്ക്​ ഗസ്സയിൽ പ്രവേശന വിലക്കും ഇസ്രായേൽ ഏർപെടുത്തിയത്​ കടുത്ത മാനുഷിക ദുരന്തത്തിലേക്ക്​ കാര്യങ്ങൾ എത്തിക്കുമെന്ന്​ യു.എൻ ജീവകാരുണ്യ ഓഫീസ്​ (ഒ.സി.എച്ച്​.എ) മുന്നറിയിപ്പ്​ നൽകി.

കാലികൾക്ക്​ നൽകാനുള്ള ഭക്ഷ്യ വസ്​തുക്കൾ പോലും അതിർത്തിക്കപ്പുറത്ത്​ പിടിച്ചിട്ടുണ്ട്​.

മത്സ്യബന്ധനത്തിന്​ ഗസ്സയിൽനിന്ന്​ ഫലസ്​തീനികൾക്ക്​ കടലിൽ​ പോകുന്നതിനും ഇസ്രായേൽ വിലക്കേർപ്പെടുത്തിയിട്ടുണ്ട്​. കടൽവെള്ള സംസ്​കരണ പ്ലാന്‍റ്​ ഇവിടെ നിശ്​ചലമായത്​ കുടിവെള്ളം കിട്ടാക്കനിയാക്കിയ മേഖലകളുണ്ട്​.

ഗസ്സ ദുരിതഭൂമിയായി മാറിയതോടെ പലായനം ചെയ്യുന്നവരുടെ സംഖ്യ കുത്തനെ ഉയരുകയാണ്​. 40 സ്​കൂളുകളിലായി തുറന്ന അഭയ​ാർഥി കേന്ദ്രങ്ങളിൽ ഇതുവരെ 17,000 പേരെ പാർപിച്ചിട്ടുണ്ട്​.