ഗസ്സയിലെ ഇസ്രായേൽ ആക്രമണത്തിൽ കൊല്ലപ്പെട്ടത്​ ഒമ്പത്​ കുട്ടികൾ

ജറൂസലം: മസ്​ജിദുൽ അഖ്​സയിൽ മൂന്നു ദിവസമായി തുടരുന്ന അതിക്രമത്തിനിടെ ഗസ്സയിൽ പുതിയ പോർമുഖം തുറന്ന്​ ഇസ്രായേൽ നടത്തിയ വ്യോമാക്രമണത്തിൽ ​അറുകൊല ചെയ്യപ്പെട്ടത്​ ഒമ്പത്​ കുട്ടികൾ. 22 പേർ കൊല്ലപ്പെട്ട ആക്രമണത്തിൽ വടക്കൻ ഗസ്സയിലെ ഷാതി അഭയാർഥി ക്യാമ്പിൽ കഴിഞ്ഞുവന്ന ഒരു സ്​ത്രീയും മരിച്ചു. അവരുടെ മക്കൾക്ക്​ പരിക്കേറ്റിട്ടുണ്ട്​.

മസ്​ജിദുൽ അഖ്​സയോടു ചേർന്നുള്ള ശൈഖ്​ ജർറാഹ്​ പ്രദേശത്തെ ഫലസ്​തീനി താമസക്കാരെ കുടിയൊഴിപ്പിക്കുന്നതിനെതിരെ ആരംഭിച്ച പ്രക്ഷോഭമാണ്​ ​മേഖലയെ വീണ്ടും സംഘർഷഭരിതമാക്കിയത്​. മസ്​ജിദുൽ അഖ്​സയിൽ കടന്നുകയറി ഇസ്രായേൽ സേന നടത്തിയ അതിക്രമങ്ങളിൽ 300 ലേറെ പേർക്ക്​ പരിക്കേറ്റിരുന്നു. ആക്രമണം അവസാനിപ്പിക്കാൻ ലോക രാഷ്​ട്രങ്ങൾക്കൊപ്പം ഗസ്സയുടെ ചുമതലയുള്ള ഹമാസും ആവശ്യപ്പെട്ടിരുന്നു. നിരന്തര സമ്മർദം ഉയർന്നിട്ടും പരിഗണിക്കാതെ വന്നതോടെ തിങ്കളാഴ്ച ഹമാസ്​ ഇസ്രായേലിനു നേരെ റോക്കറ്റാക്രമണം നടത്തി. ദക്ഷിണ ഇസ്രായേലിലുണ്ടായ ആക്രമണത്തിൽ ആളപായം റിപ്പോർട്ട്​ ചെയ്യപ്പെട്ടിട്ടില്ല.

പിന്നാലെ ഗസ്സയിൽ ഇസ്രായേൽ ബോംബറുകൾ നടത്തിയ ആക്രമണത്തിലാണ്​ ഒമ്പതു കുട്ടികളു​ൾപെടെ 22 ഫലസ്​തീനികൾ ഗസ്സയിൽ മരിച്ചത്​. ഏഴു വർഷത്തിനിടെ ഏറ്റവും കൂടുതൽ ഫലസ്​തീനികൾ കൊല്ലപ്പെട്ട ഇസ്രായേൽ ആക്രമണമാണിത്​്​.

1967ൽ ജറൂസലം പിടിച്ചടക്കിയത്​ ആഘോഷിച്ച്​ തിങ്കളാഴ്ച ഇസ്രായേലിൽ വ്യാപകമായി ജറൂസലം ദിനാചരണം നടന്നിരുന്നു. ആയിരങ്ങൾ പ​ങ്കെടുത്ത റാലികളും നടന്നു.

ഇസ്രായേൽ തലസ്​ഥാന നഗരമായി ട്രംപ്​ കാലത്ത്​ യു.എസ്​ അംഗീകാരം നൽകിയ ജറൂസലമിൽ അധിനിവേശം വ്യാപിപ്പിക്കുന്നതിന്‍റെ ഭാഗമായി മസ്​ജിദുൽ അഖ്​സയോടു ചേർന്ന ശൈഖ്​ ജർറാഹി​െല മുസ്​ലിം കുടുംബങ്ങളെ ഒഴിപ്പിക്കുന്നത്​ തുടരുകയാണ്​. മേയ്​ ആറിന്​ കൂടുതൽ കുടുംബങ്ങൾ ഒഴി​യാൻ നോട്ടീസ്​​ ലഭിച്ചിരുന്നു. ഇവർക്ക്​ പിന്തുണയുമായി പതിനായിരങ്ങളാണ്​ സംഘടിച്ചത്​. ഇവർക്കു നേരെയാണ്​ മസ്​ജിദിലും പരിസരങ്ങളിലും ഇസ്രായേൽ പൊലീസ്​ നരനായാട്ട്​ തുടരുന്നത്​. തിങ്കളാഴ്ചയും രാത്രി നമസ്​കാരം കഴിഞ്ഞ്​ മടങ്ങുന്നവർക്കു നേരെ ഇസ്രായേൽ പൊലീസ്​ നടത്തിയ അക്രമങ്ങളിൽ 200ലേറെ പേർക്ക്​ പരിക്കേറ്റിരുന്നു. കഴിഞ്ഞ ദിവസങ്ങളിലും നൂറുകണക്കിന്​ പേർക്കാണ്​ പരിക്കേറ്റത്​. മസ്​ജിദുൽ അഖ്​സയിലെ സൈനിക നടപടിക്കെതിരെ രൂക്ഷ വിമർശനമുയർന്നിട്ടും പ്രധാനമന്ത്രി നെതന്യാഹു കൂടുതൽ കർശനമാക്കാൻ നിർദേശം നൽകിയത്​ മേഖലയെ സംഘർഷത്തിലാഴ്​ത്തുമെന്ന്​ കരുതുന്നു.

കിഴക്കൻ ജറൂസലം തങ്ങളുടെ തലസ്​ഥാന നഗരമായാണ്​ ഫലസ്​തീനികൾ വിശ്വസിക്കുന്നത്​. ഇത്​ സമ്പൂർണമായി പിടിച്ചെടുത്ത്​ വിശാല ജറൂസലം പട്ടണം തലസ്​ഥാനമാക്കാൻ ഇസ്രായേൽ ബലപ്രയോഗവും തുടരുന്നു.

വെസ്റ്റ്​ ബാങ്കിലുൾപെടെ ഫലസ്​തീനിലുടനീളം പ്രതിഷേധം ശക്​തമാണ്​.