ഭീകരതയെ നേരിടാൻ ഇമാം-പ്രഭാഷക ശിൽപശാലയുമായി ഇസ്​ലാമിക സൈനികസഖ്യം

മാലി: ഭീകരവാദം ഒരു പ്രത്യയശാസ്ത്ര രോഗമാണെന്നും അതിനു മതവുമായല്ല ബന്ധമെന്നും ഇസ്​ലാമിക അധ്യാപനങ്ങൾ പകർന്നു നൽകുന്നതിലൂടെ അതിനെ ചെറുക്കാൻ കഴിയുമെന്നും മാലിദ്വീപ്​ തലസ്ഥാനത്ത്​ ​ചേർന്ന ഭീകരതയെ നേരിടാനുള്ള ഇസ്​ലാമിക സൈനികസഖ്യം (ഇസ്​ലാമിക്​ മിലിട്ടറി കൗണ്ടർ ടെററിസം കൊയലീഷൻ-ഐ.എം.സി.ടി.സി) സംഘടിപ്പിച്ച ഇമാം-പ്രഭാഷക അന്താരാഷ്ട്ര ശിൽപശാല വിലയിരുത്തി.

ഭീകരവാദത്തെ നേരിടാൻ അന്താരാഷ്ട്രതലത്തിൽ ബൗദ്ധിക, മാധ്യമ, സാമ്പത്തിക,സൈനികസജ്ജീകരണം അത്യാവശ്യമാണെന്ന്​ പരിശീലനത്തിന്‍റെ ഉദ്​ഘാടനം നിർവഹിച്ച മേജർ ജനറൽ മുഹമ്മദ്​ ബിൻ സഈദ്​ അൽ മഗ്ദി (സൗദി അറേബ്യ) ചൂണ്ടിക്കാട്ടി. ഭീകരതവിരുദ്ധ നീക്കം സൈനികനടപടികളിൽ മാത്രം ഒതുങ്ങുന്നതല്ല. ഭീകരതക്കുള്ള സാമ്പത്തികസഹായം, കള്ളപ്പണം വെളുപ്പിക്കൽ തുടങ്ങിയ വിഷയങ്ങളിൽ സമുദായ​നേതാക്കളെ ബോധ്യപ്പെടുത്തുകയും ഇമാമുമാർക്കുംപ്രഭാഷകർക്കും ആധുനികസ​ങ്കേതങ്ങളും ശേഷികളും ഉപയോഗിച്ച്​ തീവ്രവാദ പ്രത്യയശാസ്ത്രങ്ങളെ നേരിടാൻ പ്രാപ്തി നൽകുകയും ചെയ്യുന്നതിനാണ്​ സൗദി അറേബ്യയുടെ മുൻകൈയിലുള്ള അന്താരഷ്ട്ര സൈനികസഖ്യം ഇത്തരം പരിപാടികൾ നടത്തുന്നതെന്ന്​ മാലിദ്വീപ്​ ഇസ്​ലാമികകാര്യ മന്ത്രി മുഹമ്മദ്​ ശഹീം അലി സഈദ്​, കായികമന്ത്രി അബ്​ദുല്ല റഫീഅ്​ എന്നിവർ വ്യക്തമാക്കി. സഖ്യത്തിലെ അംഗരാജ്യങ്ങളിൽ 90 പരിശീലനപരിപാടികളും 20 ബോധവത്​കരണമിഷനുകളും നടത്തുമെന്ന്​ സംഘാടകർ വ്യക്തമാക്കി.