ഇന്ത്യയിലെ കോവിഡ്​ സാഹചര്യം ആശങ്കപ്പെടുത്തുന്നു -ലോകാരോഗ്യ സംഘടന

ജനീവ: ഇന്ത്യയിലെ കോവിഡ്​ സാഹചര്യം ആശങ്കപ്പെടുത്തുന്നതാണെന്ന്​ ലോകാരോഗ്യ സംഘടന മേധാവി ടെഡ്രോസ്​ അദാനോം ഗെബ്രിയേസസ്​​. നിരവധി സംസ്ഥാനങ്ങളിൽ രോഗികളുടെ എണ്ണവും മരണങ്ങളും ആശങ്കയുണ്ടാക്കുന്നതാണെന്ന്​ അ​ദ്ദേഹം പറഞ്ഞു. ആദ്യ വർഷത്തേക്കാളും ഗുരുതരമായിരിക്കും മഹാമാരിയുടെ രണ്ടാം വർഷം. ഇന്ത്യയിലേക്ക്​ നിരവധി ഓക്​സിജൻ കോൺസെൻട്രേറ്ററുകൾ, മാസ്​ക്​, മെഡിക്കൽ ഉപകരണങ്ങൾ എന്നിവ നൽകിയെന്നും അദ്ദേഹം വ്യക്​തമാക്കി.

ഇന്ത്യയിൽ ആശങ്കപ്പെടുത്തുന്ന സാഹചര്യമാണ്​ പല സംസ്ഥാനങ്ങളിലും നില നിൽക്കുന്നത്​. രോഗികളുടെ എണ്ണവും മരണവും രാജ്യത്ത്​ ഉയർന്ന്​ തന്നെ നിൽക്കുന്നു. ഇന്ത്യയെ സഹായിക്കാനായി മുന്നോട്ട്​ വന്ന എല്ലാ രാജ്യങ്ങളോടും ലോകാരോഗ്യ സംഘടന നന്ദി പറയുന്നുവെന്നും അദ്ദേഹം കൂട്ടിചേർത്തു.

കഴിഞ്ഞ ഏതാനം ദിവസങ്ങളായി രാജ്യത്ത്​ മൂന്ന്​ ലക്ഷത്തിലധികം പേർക്കാണ്​ കോവിഡ്​ സ്ഥിരീകരിക്കുന്നത്​. പല ദിവസങ്ങളിലും നാലായിരത്തോളം മരണവും ഉണ്ടാവുന്നുണ്ട്​. രാജ്യത്തെ വാക്​സിനേഷൻ പ്രവർത്തനങ്ങൾ ഫലപ്രദമാവാത്തതും പ്രതിസന്ധി ഗുരുതരമാക്കുന്നുണ്ട്​.