കോവിഡ്​ ഭയം; യു.കെയിൽ അഞ്ചുവയസുകാരിയായ മകളെ കൊലപ്പെടുത്തിയ ഇന്ത്യൻ യുവതി കുറ്റം സമ്മതിച്ചു

ലണ്ടൻ: യു.കെയിൽ അഞ്ചുവയസുകാരിയായ മകളെ വീട്ടിൽവെച്ച്​ കൊലപ്പെടുത്തിയ കേസിൽ ഇന്ത്യക്കാരിയായ മാതാവ്​ കുറ്റം സമ്മതിച്ചു. കോവിഡ്​ 19​െൻറ ഭയത്തെ തുടർന്നാണ്​ കൊലപാതകമെന്നാണ്​ വിവരം.

​കോവിഡ്​ ബാധിച്ച്​ മരിക്കുമെന്ന്​ ഭയപ്പെട്ടു. ഇതോടെ അഞ്ചുവയസായ മകൾക്ക്​ അമ്മയെ കൂടാതെ ജീവിക്കാൻ കഴിയില്ലെന്ന്​ ചിന്തിച്ചതോടെയാണ്​ കൊലപാത​കമെന്ന്​ മാധ്യമങ്ങൾ റി​പ്പോർട്ട്​ ചെയ്​തു.

തെക്കൻ ലണ്ടനിൽ 2020 ജൂൺ 30നായിരുന്നു സംഭവം. സുധ ശിവാനന്തം എന്ന 36കാരി മകൾ സായഗിയെ കിടപ്പുമുറിയിൽവെച്ച്​ കുത്തിക്കൊലപ്പെടുത്തുകയായിരുന്നു.

​കൊറോണ വൈറസ്​ ബാധിക്കുമെന്ന ഭയം സ്​ത്രീയെ അലട്ടിയിരുന്നതായും ലോക്​ഡൗൺ നിയന്ത്രണങ്ങൾ കൂടി വന്നതോടെ ഭയം ഇരട്ടിയായതായും ഭർത്താവ്​ പറഞ്ഞു. കൊലപാതകത്തിന്​ ശേഷം സുധ ഒരു വർഷത്തോളം മാനസിക അസ്വാസ്​ഥ്യം പ്രകടിപ്പിക്കുകയും ചെയ്​തിരുന്നു.

2006 മുതൽ സുധയും കുടുംബവും യു.കെയിലാണ്​ താമസം. രോഗങ്ങളെക്കുറിച്ച്​ ആശങ്ക സുധയെ അലട്ടിയിരുന്നു. കൂടാതെ രോഗം വന്ന്​ മരിക്കുമെന്ന ഭയവും ഉടലെടുത്തിരുന്നതായി ​പ്രോസിക്യൂട്ടർ പറഞ്ഞു.

സംഭവം നടന്ന ദിവസം, ഭർത്താവിനോട്​ ജോലിക്ക്​ പോകരുതെന്ന്​ അപേക്ഷിച്ചിരുന്നു. കൂടാതെ, സുഹൃത്തുക്കളോട്​ തനിക്ക്​ സുഖമി​ല്ലെന്ന്​ അറിയിക്കുകയും ചെയ്​തിരുന്നു.

വൈകിട്ട്​ നാലുമണിയോടെ അയൽക്കാർ മിച്ചം, മൊണാർക്ക്​ പരേഡിലെ ഫ്ലാറ്റിലെത്തിയപ്പോൾ സുധയെ സ്വയം പരിക്കേൽപ്പിച്ച നിലയിൽ കണ്ടെത്തുകയായിരുന്നു. സായാഗിയെ കട്ടിലിൽ കൊല്ലപ്പെട്ട നിലയിലും കണ്ടെത്തി. മകളുടെ കഴുത്തിലും നെഞ്ചിലും വയറിലും നിരവധി തവണ കുത്തേറ്റതി​െൻറ പാടുകളുണ്ടായിരുന്നു. സുധയെ രണ്ടുമാസത്തെ ചികിത്സക്ക്​ ശേഷം പൊലീസ്​ കസ്​റ്റഡിയിലേക്ക്​ മാറ്റിയിരുന്നു.

കോവിഡ്​ മൂലമുണ്ടായ ഭയവും സാമൂഹിക ഒറ്റ​പ്പെടലുമാണ്​ ഭാര്യ മകളെ കൊല്ലാൻ കാരണ​മായതെന്ന്​ സുധയുടെ ഭർത്താവ്​ കോടതിയിൽ പറഞ്ഞു.

കൊലപാതകത്തിന്​ മുമ്പ്​ തങ്ങളുടെ കുടുംബം സന്തോഷത്തോടെയാണ്​ കഴിഞ്ഞിരുന്നു. സ്വബോധത്തോടെ മകളെ ഭാ​ര്യക്ക്​ കൊല്ലാൻ കഴിയുമായിരുന്നില്ലെന്നും അദ്ദേഹം കൂട്ടിച്ചേർത്തു. നിലവിൽ സുധയെ ചികിത്സക്കായി ആശുപത്രിയിൽ പ്രവേശിച്ചിരിക്കുകയാണ്​.