B.1.617-നെ ഇന്ത്യൻ വകഭേദമെന്ന്​ വിളിക്കരുതെന്ന്​ മാധ്യമങ്ങളോട്​ കേന്ദ്രം; പ്രതികരിച്ച്​ ലോകാരോഗ്യ സംഘടന

ന്യൂഡൽഹി: കോവിഡ്​ മഹാമാരിയുടെ രണ്ടാം തരംഗത്തിൽ പ്രധാനമായും പടർന്നുപിടിക്കുന്നതും അപകടം വിതക്കുന്നതും കൊറോണ വൈറസി​െൻറ B.1.617 എന്ന വകഭേദമാണ്​. വൈറസി​െൻറ ഇന്ത്യൻ വകഭേദമെന്നാണ് ഇതിനെ​ പലരും വിശേഷിപ്പിക്കുന്നത്​. നിലവിൽ 44 രാജ്യങ്ങളിൽ കോവിഡി​െൻറ 'ഇന്ത്യൻ വകഭേദം' കണ്ടെത്തിയെന്നായിരുന്നു ഇന്ന്​ ലോകാരോഗ്യ സംഘടനയെ ഉദ്ധരിച്ച്​ മാധ്യമങ്ങൾ റിപ്പോർട്ട്​ ചെയ്​തത്​. എന്നാൽ, B.1.617-നെ 'ഇന്ത്യൻ വകഭേദം' എന്ന് ലോകരാജ്യങ്ങളും ആരോഗ്യ വിഭാഗവും എന്തിന്​ മാധ്യമങ്ങളടക്കം​ വിശേഷിപ്പിക്കുന്നതിനെതിരെ കേന്ദ്ര സർക്കാർ രംഗത്തെത്തുകയായിരുന്നു.

അതുമായി ബന്ധപ്പെട്ട്​​ ലോകാരോഗ്യ സംഘടനയും പ്രതികരണം അറിയിച്ചിരിക്കുകയാണ്​. വൈറസുകളെയോ അതി​െൻറ വകഭേദങ്ങളെയോ അവ ആദ്യമായി കണ്ടെത്തിയ രാജ്യങ്ങളുടെ പേരുകളിലല്ല തങ്ങൾ തിരിച്ചറിയുന്നതെന്ന്​ ലോകാരോഗ്യ സംഘടന വ്യക്തമാക്കി. ലോകാരോഗ്യ സംഘടനയുടെ സൗത്​ ഇൗസ്റ്റ്​ ഏഷ്യ വിഭാഗം ബുധനാഴ്ച ട്വിറ്ററിലൂടെയാണ്​ ഇത്​ അറിയിച്ചത്​. ''വൈറസുകളെ അവയുടെ ശാസ്ത്രീയനാമങ്ങളിൽ തന്നെയാണ്​ ഞങ്ങൾ പരാമർശിക്കാറുള്ളത്​. എല്ലാവരോടും അത്​ പോലെ തന്നെ ചെയ്യാൻ അഭ്യർത്ഥിക്കുകയും ചെയ്യുന്നു. " -ലോകാരോഗ്യ സംഘടന കൂട്ടിച്ചേർത്തു.

B.1.617-നെ ആഗോള ഉത്കണ്ഠ പരത്തിയ വകഭേദമായി തരംതിരിക്കാനുള്ള ലോകാരോഗ്യ സംഘടനയുടെ നീക്കം ഉൾക്കൊള്ളുന്ന റിപ്പോർട്ടുകളിൽ ഇന്ത്യൻ വകഭേദമെന്ന് വിശേഷിപ്പിക്കരുതെന്ന് കേന്ദ്ര സർക്കാർ മാധ്യമങ്ങളെ ഉപദേശിച്ചതിന്​ തൊട്ടുപിന്നാലെയാണ്​ വിശദീകരണം. പല മാധ്യമങ്ങളും ഇന്ത്യൻ വകഭേദമെന്ന്​ ഉപയോഗിച്ചതായി കാണുന്നു. മാധ്യമ റിപ്പോർട്ടുകൾ ഇതുവരെ തെളിയിക്കപ്പെടാത്തതും അടിസ്ഥാനരഹിതവുമാണ്. ലോകാരോഗ്യ സംഘടന പോലും B.1.617നെ ഇന്ത്യൻ വകഭേദമെന്ന്​ പരാമർശിച്ചിട്ടില്ല. ഈ വിഷയത്തെക്കുറിച്ചുള്ള റിപ്പോർട്ടിൽ 'ഇന്ത്യൻ' എന്ന പദം അവർ ഉപയോഗിച്ചിട്ടില്ല. -കേന്ദ്ര സർക്കാർ അവരുടെ പ്രസ്​താവനയിൽ പറഞ്ഞു.

അതേസമയം, കോവിഡി​െൻറ B.1.617​ വകഭേദം 44 രാജ്യങ്ങളിൽ കണ്ടെത്തിയെന്ന്​ ലോകാരോഗ്യ സംഘടന അറിയിച്ചിട്ടുണ്ട്​. വിവിധ രാജ്യങ്ങളിൽ നിന്ന്​ ശേഖരിച്ച 4500 സാമ്പിളുകളിൽ B.1.617​െൻറ സാന്നിധ്യം കണ്ടെത്തി. ലോകാരോഗ്യ സംഘടനയുടെ ആറ്​ മേഖലകളിലും ജനിതക വകഭേദം സംഭവിച്ച കൊറോണ ​വൈറസി​െൻറ സാന്നിധ്യം കണ്ടെത്തിയിട്ടുണ്ടെന്നും അധികൃതർ അറിയിച്ചിട്ടുണ്ട്​.