വിവാഹത്തെ കുറിച്ച്​ എനിക്ക്​ ചില സങ്കൽപങ്ങളുണ്ടായിരുന്നു -മലാല

ലണ്ടൻ: പൊതു പ്രവർത്തന ജീവിതത്തിനിടയിൽ ഒന്ന്​ വിവാഹം കഴിച്ചതിന്​ ഏറെ വിവാദങ്ങളിൽ പെട്ടിരിക്കുകയാണ്​ പാകിസ്​താനിൽ നിന്നുള്ള നൊബേൽ ജേതാവ്​ കൂടിയായ മലാല യൂസുഫ്​ സായ്​. വിവാഹകം കഴിച്ചതിലൂടെ മലാല വിവാഹത്തെ കുറിച്ച്​ നേരത്തേ പ്രകടിപ്പിച്ചിരുന്ന അഭിപ്രായത്തിൽനിന്നും ഏറെ പിന്നാക്കം പോയി എന്നാണ്​ ഒരു വിഭാഗം വിമർശനം ഉന്നയിച്ചത്​. ജീവിതത്തിൽ വിവാഹത്തിന്‍റെ ആവശ്യം ഇല്ല എന്ന തരത്തിൽ മലാല സംസാരിച്ചിട്ടുണ്ട്​ എന്നായിരുന്നു വിമർശകരുടെ വാദം. അവർ മലാലയുടെ പഴയ ചില വീഡിയോകളും ഇതിനെ സാധൂകരിക്കാൻ കുത്തിപ്പൊക്കി കൊണ്ടുവന്നിരുന്നു.

രാഷ്​ട്രീയ പരമായ വിമർശനങ്ങൾക്കും മലാലയുടെ വിവാഹം തിരികൊളുത്തി. വിവാഹം കഴിഞ്ഞിട്ട്​ ഒരാഴ്ച പൂർത്തിയാകുന്നതിനിടെ അതിനുള്ള മറുപടിയുമായി എത്തിയിരിക്കുകയാണവർ. ബി.ബി.സിയിലെ ഏറ്റവും പുതിയ അഭിമുഖത്തിലാണ്​ അവർ വിവാഹം സംബന്ധിച്ച്​ തന്‍റെ നയനിലപാടുകൾ തുറന്നു പറയുന്നത്​. കഴിഞ്ഞയാഴ്ചയാണ്​ പാകിസ്​താൻ ക്രിക്കറ്റ്​ ബോർഡ്​ അംഗം അസർ മാലിക്കിനെ മലാല വിവാഹം കഴിച്ചത്​.

വിവാഹം തന്‍റെ പരിഗണനയിലുള്ള കാര്യമായിരുന്നെന്നും തനിക്ക്​ അത്​ സംബന്ധിച്ച്​ ചില സങ്കൽപങ്ങളും സ്വപ്​നങ്ങളും ഒക്കെ ഉണ്ടായിരുന്നു എന്നും അവർ ഇന്‍റർവ്യൂവിൽ തുറന്നു പറയുന്നു. വിവാഹം സംബന്ധിച്ച കാര്യങ്ങൾ താൻ വളരെ നേരത്തേ തന്നെ ബ്രിട്ടീഷ് വോഗിനോട് പറഞ്ഞിരുന്നതായും അവർ അറിയിച്ചു. ബി.ബി.സിയുടെ ആൻഡ്രൂ മാർ ഷോയിൽ പ്രത്യക്ഷപ്പെട്ടാണ്​ മലാല പുതിയ വിവാദങ്ങൾക്കെല്ലാം മറുപടി പറയുന്നത്​.

തന്‍റെ മൂല്യങ്ങളും നിലപാടുകളും മനസ്സിലാക്കുന്ന ഒരു ഭർത്താവിനെ കണ്ടെത്തിയതിൽ താൻ ഭാഗ്യവതിയാണെന്ന്​ മലാല അഭിമുഖത്തിൽ പറഞ്ഞു. ശൈശവ വിവാഹത്തിനും വിവാഹമോചനത്തിനും ഇരയാക്കപ്പെട്ട നിരവധി പെൺകുട്ടികളെ നമ്മുടെ ലോകത്ത്​ കാണാനാകും. അതിനെക്കുറിച്ചൊക്കെ താൻ പങ്കിട്ട ആശങ്കകൾ ഇപ്പോഴും നിലനിൽക്കുന്നതായും അവർ പറഞ്ഞു.

മലാല യൂസുഫ്​ സായിയെ കുറിച്ച്​ പങ്കാളി അസർ മാലിക്​ ട്വീറ്റ്​ ചെയ്​ത വാക്കുകൾ നേരത്തേ സമൂഹ മാധ്യമങ്ങളിൽ ​വൈറലായിരുന്നു​. ഇരുവരും ഒരുമിച്ച്​ കേക്ക്​ മുറിക്കുന്ന ചിത്രത്തിനൊപ്പമാണ്​ മലാലയെ കുറിച്ചുള്ള ഹൃദയം തൊട്ട കുറിപ്പും അസർ ട്വിറ്ററിൽ പങ്കുവെച്ചിരുന്നത്​. 'മലാലയിൽ, എനിക്ക് ഏറ്റവും പിന്തുണ നൽകുന്ന ഒരു സുഹൃത്തിനെ, സുന്ദരിയും ദയയും ഉള്ള ഒരു പങ്കാളിയെ ഞാൻ കണ്ടെത്തി - ഞങ്ങളുടെ ജീവിതകാലം മുഴുവൻ ഒരുമിച്ച് പങ്കിടാൻ കഴിയുമെന്നതിൽ ഞാൻ വളരെ ആവേശത്തിലാണ്. ഞങ്ങളുടെ നിക്കാഹിന്​ ആശംസ നേർന്ന എല്ലാവർക്കും നന്ദി.

ഞങ്ങളുടെ ക്രിക്കറ്റ്​ ടീമിന്‍റെ പാരമ്പര്യമനുസരിച്ച്​ ഞങ്ങൾ ഇവിടെ വിജയത്തിന്‍റെ കേക്ക്​ മുറിക്കുന്നു -അസർ ട്വിറ്ററിൽ കുറിച്ചു. ആയിക്കണക്കിന്​ പേരാണ്​ ഇതിൽ ആശംസ അറിയിച്ച്​ രംഗത്തെത്തിയിരുന്നത്​. കഴിഞ്ഞ ചൊവ്വാഴ്ച ലണ്ടനിലെ മലാലയുടെ വീട്ടിൽ വെച്ചായിരുന്നു ലളിതമായ ചടങ്ങിൽ ഇരുവരുടെയും നിക്കാഹ്​ നടന്നത്​.

ലാഹോറിൽ നിന്നുള്ള അസർ മാലിക് വ്യവസായിയും പാകിസ്ഥാൻ ക്രിക്കറ്റ് ബോർഡ്​ ഹൈ പെർഫോമൻസ് സെന്‍ററിന്‍റെ ജനറൽ മാനേജരുമാണ്. കനേഡിയൻ പ്രധാനമന്ത്രി ജസ്റ്റിൻ ട്രൂഡോ, പാകിസ്ഥാൻ പ്രധാനമന്ത്രി ഇമ്രാൻ ഖാന്‍റെ മുൻ ഭാര്യ ജെമീമ ഗോൾഡ്​സ്​മിത്ത്, ആപ്പിൾ സി.ഇ.ഒ ടിം കുക്ക്, പ്രിയങ്ക ചോപ്ര എന്നിവരടക്കം ലോകത്തിന്‍റെ വിവിധ കോണുകളിൽനിന്ന്​ ദമ്പതികൾക്ക്​ ആശംസകൾ പ്രവഹിക്കുകയാണ്​.

അതേസമയം, മലാല പാകിസ്​താനിയെ വിവാഹം കഴിച്ചതിനെ വിമർശിച്ച്​ എഴുത്തുകാരി തസ്​ലീമ നസ്​റിൻ രംഗത്തെത്തിയിരുന്നു. മലാല ഇംഗ്ലീഷുകാരനെ വിവാഹം കഴിക്കുമെന്നായിരുന്നു താൻകരുതിയതെന്നും വിവാഹ വാർത്ത നിരാശപ്പെടുത്തിയെന്നും അവർ പറഞ്ഞു. 2012ൽ താലിബാൻ തലക്ക്​ വെടിവെച്ച മലാല ബ്രിട്ടനിൽ അഭയം നേടിയിരിക്കുകയാണ്​.