അഞ്ചു വർഷം നീണ്ട 'മൈൻ റെയിഡുകൾക്ക്​' ശേഷം മൂഷിക ഡിറ്റക്​റ്റീവ്​ പടിയിറങ്ങുന്നു; വിരമിക്കൽ വികാര നിർഭരം

ക​േമ്പാഡിയയിൽ വേറി​ട്ടൊരു വിരമിക്കൽ ചടങ്ങ്​ നടന്നു. അഞ്ചുവർഷത്തെ സേവനം കൊണ്ട്​ നിരവധി പേരുടെ ജീവൻ രക്ഷിച്ച ഒരു എലിയായിരുന്നു ചടങ്ങിലെ താരം. മാഗവ എന്ന പേരുള്ള ആഫ്രിക്കൻ എലിയാണ്​ അഞ്ചുവർഷത്തെ സേവനത്തിന്​ ശേഷം തന്‍റെ ഏഴാമത്തെ വയസിൽ സർവീസിൽ നിന്ന്​ വിരമിച്ചത്​.

എലികൾ എങ്ങിനെയാണ്​ ജീവൻ രക്ഷിക്കുക എന്നാലോചിച്ച്​ തലപുകക്കേണ്ട. തന്‍റെ സർവീസ്​ കാലയളവിനിടയിൽ രണ്ടേകാൽ ലക്ഷം ചതുരശ്ര മീറ്റർ ഭൂമിയെയാണ്​ മാഗവ സുരക്ഷിതമാക്കിയത്​. ഏകദേശം 42 ഫുട്​ബാൾ മൈതാനങ്ങളുടെ വലുപ്പമുണ്ടാകും അത്രയും ഭൂമിക്ക്​. അറിയാതെ മനുഷ്യരൊന്ന്​ കാലെടുത്തു വെച്ചാൽ പൊട്ടിത്തെറിക്കുമായിരുന്ന 71 മൈനുകളും 38 മറ്റു സ്​ഫോടക വസ്​തുക്കളും ആ ഭൂമിയിൽ നിന്ന്​ കണ്ടെത്തിയാണ്​ മാഗവ തന്‍റെ ജോലി ഭംഗിയായി നിർവഹിച്ചത്​.

ശരിക്കു പറഞ്ഞാൽ താൻസാനിയയാണ്​ മാഗവ എന്ന മുഷിക പ്രതിഭയുടെ സ്വദേശം. 2014 ലായിരുന്നു മാഗവയുടെ ജനനം. ബെൽജിയൻ സന്നദ്ധ സംഘടനയായ 'അ​േപാപോ'യാണ്​ മാഗവക്ക്​ പരിശീലനം നൽകിയത്​.

ഭൂമിയിൽ കുഴിച്ചിട്ട മൈനുകളടക്കമുള്ള സ്​ഫോടക വസ്​തുക്കൾ മണം പിടിച്ച്​ കണ്ടെത്താനുള്ള പരിശീലനമാണ്​ മാഗവക്ക്​ നൽകിയത്​. ആ പരീക്ഷണം വൻ വിജയമായിരുന്നു. ഒരു ടെന്നീസ്​ കോർട്ടിന്‍റെ വലിപ്പമുള്ള സ്​ഥലത്ത്​ മൈനുകള​ുണ്ടോ എന്ന്​ പരിശോധിച്ച്​ ഉറപ്പുവരുത്താൻ മാഗവക്ക്​ വേണ്ടി വന്നത്​ അര മണിക്കുറാണ്​. സാധാരണ മെറ്റൽ ഡിറ്റക്​റ്ററുകളു​പയോഗിച്ച്​ ഇ​ത്രയും ഭാഗം അരിച്ചുപെറുക്കി മൈനുകൾ കണ്ടെത്താൻ ചുരുങ്ങിയത്​ നാലു ദിവസമെങ്കിലും വേണ്ടതാണ്​. അതാണ്​ അര മണിക്കൂറു കൊണ്ട്​ മാഗവ എന്ന മുഷിക പ്രതിഭ പൂർത്തിയാക്കിയത്.

2016 ലാണ്​ മാഗവയെ ക​േമ്പാഡിയയിൽ എത്തിക്കുന്നത്​. പിന്നീട്​ ഒാടി നടന്ന്​ ജോലി ചെയ്യുകയായിരുന്നു മാഗവ. മനുഷ്യർ മൈനുകൾ കണ്ടെത്താൻ പരിശോധന നടത്തു​േമ്പാൾ പൊട്ടിത്തെറിക്കാനുള്ള സാധ്യതയുണ്ട്​. എന്നാൽ, ഭാരം കുറഞ്ഞ എലികൾ പരിശോധന നടത്തു​േമ്പാൾ ആ ഭീഷണി ഉണ്ടായിരുന്നില്ല. മൈൻ ക​ണ്ടെത്തിയാൽ മാഗവ ഭുമിയിൽ ചുരണ്ടി കൊണ്ടിരിക്കും. പിന്നീട്​ മൈൻ നിർവീര്യമാക്കുന്നവർക്ക്​ ജോലി എളുപ്പമാകും.

2020 ൽ ബ്രിട്ടനൽ നിന്ന്​ ധീരതക്കുള്ള ഉയർന്ന പുരസ്​കാരം മാഗവക്ക്​ ലഭിച്ചിരുന്നു. മാഗവയുടെ ധൈര്യത്തെയും സേവനത്തെയും മാനിച്ചാണ്​ പുരസ്​കാരം നൽകിയത്​.

മാഗവക്ക്​ പ്രായമേറിയതുകൊണ്ടോ ജോലി ചെയ്യാൻ കഴിയാത്തതുകൊണ്ടോ അല്ല വിരമിക്കുന്നതെന്ന്​ പരിശീലകരായ 'അപോപോ' പറയുന്നു. ഇനി മാഗവക്ക്​ വിശ്രമിക്കാനും ഇഷ്​ടമുള്ള പഴങ്ങളും നട്​സും കഴിച്ചിരിക്കാനുമുള്ള സമയമാണെന്നും അവർ പറഞ്ഞു. മൈൻ റൈഡുകളിൽ ഇനി മാഗവയെ മിസ്​ ചെയ്യുമെന്നും വിരമിക്കൽ വികാര നിർഭരമാണെന്നും അപോപോ ഭാരവാഹികൾ പറയുന്നു. ​

പുതിയതായി പരിശീലനം നൽകിയ 20 എലികളെ കൂടി അപോപോ ക​േമ്പാഡിയയിൽ എത്തിച്ചിട്ടുണ്ട്​.