ഓഷ്​വിറ്റ്​സ്​ ക്യാമ്പ്​ തകർത്ത അവസാന സൈനികൻ ഡേവിഡ്​ ദുഷ്​മാൻ വിടവാങ്ങി

ബെർലിൻ: രണ്ടാം ലോക യുദ്ധാവസാനം ഓഷ്​വിറ്റ്​സിലെ നാസി കോൺസെൻട്രേഷൻ ക്യാമ്പ്​ തകർത്ത സൈനികരിൽ അവസാനത്തെയാളായി വിശേഷിപ്പിക്കപ്പെട്ട ഡേവിഡ്​ ദുഷ്​മാൻ വിടവാങ്ങി. സോവ്യറ്റ്​ റഷ്യയുടെ ടി-34 ടാങ്കുമായി ഓഷ്​വിറ്റ്​സിന്‍റെ വൈദ്യുതി വേലി തകർത്ത അദ്ദേഹം 'ഓഷ്​വിറ്റ്​സ്​ ​ഹീറോ' എന്ന പേരിലാണ്​ അറിയപ്പെട്ടിരുന്നത്​. 98 വയസ്സായിരുന്നു.

ലോക യുദ്ധാനന്തരം ലോക പ്രശസ്​ത ഫെൻസിങ്​ താരമായി മാറിയ ദുഷ്​മാൻ 1945 ജനുവരി 27ന്​ ​വൈദ്യുതി വേലി തകർത്തതോടെയാണ്​ തടവുകാർ മോചിതരാകുന്നത്​. ഓഷ്​വിറ്റ്​സിനെ കുറിച്ച്​ അറിവി​ല്ലാതെയാണ്​ ജർമൻ നഗരത്തിൽ എത്തിയിരുന്നതെന്നും എന്നാൽ, അകത്തെത്തിയപ്പോൾ നിറയെ അസ്​ഥികൂടങ്ങൾ കണ്ട്​ ഞെട്ടിയതായും പിന്നീട്​ അദ്ദേഹം പറഞ്ഞിരുന്നു. അസ്​ഥികൂടങ്ങൾക്കൊപ്പമിരുന്ന എല്ലും തോലുമായ തടവുകാരെയാണ്​ അന്ന്​ മോചിപ്പിച്ചത്​. ജർമനിയിൽ ജൂതരുൾപെടെ ഏറ്റവും കൂടുതൽ തടവുകാർ കൊല്ലപ്പെട്ടത്​ ഓഷ്​വിറ്റ്​സ്​ ക്യാമ്പിലായിരുന്നുവെന്നാണ്​ ചരിത്രം. ഗ്യസ്​ ചേംബറുകളിലായിരുന്നു കൂട്ടക്കൊലയേറെയും നടന്നത്​.

ഓഷ്​വിറ്റ്​സിൽ യുദ്ധത്തെ അതിജീവിച്ച 69 സോവ്യറ്റ്​ സൈനികരിൽ ഒരാളായ അദ്ദേഹത്തിന്​ ഗുരുതര പരിക്കേറ്റിരുന്നു. രോഗം ഭേദമായി ഫെൻസിങ്​ ലോകത്ത്​ പ്രതിഭ പരീക്ഷിച്ച അദ്ദേഹം അറിയപ്പെട്ട ​പരിശീലകനായും ലോക​ ശ്രദ്ധ പിടിച്ചുപറ്റി. പ്രായമേറെ ചെന്നിട്ടും നാലു വർഷം മുമ്പുവരെ ഫെൻസിങ്​ പരിശീലകനായി പ്രാദേശിക തലത്തിൽ നിറഞ്ഞുനിന്നു.