കോവിഡ്​ ഭീതിക്കിടെ ആസ്​ട്രിയയിലെ യു.എസ്​ നയതന്ത്ര ഉദ്യോഗസ്​ഥർക്ക്​​ ഹവാന സിൻഡ്രം; മഹാമാരിയാകുമോ?

വിയന: ആസ്​ട്രിയയിലെ അമേരിക്കൻ സ്​ഥാനപതി കാര്യാലയത്തിലെ 20 ഉദ്യോഗസ്​ഥരെ ദുരൂഹ രോഗം പിടികൂടിയത്​ ആശങ്ക പരത്തി. മസ്​തിഷ്​കത്തെ ബാധിക്കുന്ന ഹവാന സിൻഡ്രത്തിന്​ സമാനമായ ലക്ഷണങ്ങളോടെയാണ്​ രോഗം കണ്ടെത്തിയത്​. പരിശോധനയിൽ പിന്നീട്​ ഇതേ രോഗം തന്നെയെന്ന്​ സ്​ഥിരീകരിച്ചു. രോഗത്തിന്‍റെ ഉറവിടം കണ്ടെത്താനായിട്ടില്ല. മൈക്രോവേവ്​ റേഡിയേഷൻ വഴിയാകാം രോഗം ലഭിച്ചതെന്നാണ്​ സംശയം. 2016-17ൽ ക്യൂബയിൽ ആദ്യമായി തിരിച്ചറിഞ്ഞതിനാലാണ്​ രോഗഹത്തിന്​ ഹവാന സിൻഡ്രം എന്ന പേരുവന്നത്​.

തലകറക്കം, സമനില​ നഷ്​ടപ്പെടൽ, കേൾവിക്കുറവ്​, ആധി, വിഷയത്തിൽ ശ്രദ്ധയൂന്നാനുള്ള കഴിവ്​ നഷ്​ടപ്പെടൽ തുടങ്ങിയ ലക്ഷണങ്ങളാണ്​ ഇവരിൽ കണ്ടത്​. യു.എസ്​ ഉദ്യോഗസ്​ഥർക്ക്​ പുറമെ കാനഡ പ്രതിനിധികളിലും രോഗം തിരിച്ചറിഞ്ഞിട്ടുണ്ട്​. കോവിഡ്​ മഹാമാരിയെ പോലെ കൂടുതൽ പേരിലേക്ക്​ പകരാനുള്ള സാധ്യത നിലവിൽ ശാസ്​ത്രജ്​ഞർ തള്ളുന്നു​.

യു.എസ്​ നയതന്ത്ര പ്രതിനിധികളെ ലക്ഷ്യമിട്ട്​ ക്യൂബ നടത്തിയ ആക്രമണത്തിന്‍റെ തുടർച്ചയായാണ്​ രോഗപ്പകർച്ചയെന്ന്​ വാഷിങ്​ടൺ കുറ്റപ്പെടുത്തുന്നു. എന്നാൽ, ആരോപണം ക്യൂബ നിഷേധിച്ചു. ഇരുരാജ്യങ്ങൾക്കുമിടയിൽ ഇനിയും തീരാതെ തുടരുകയാണ്​ ഹവാന സിൻഡ്രവുമായി ബന്ധപ്പെട്ട ആരോപണ പ്രത്യാരോപണങ്ങൾ.

സംഭവം ​അന്വേഷിച്ചുവരികയാണെന്നും യു.എസ്​ അധികൃതരുമായി സഹകരിച്ച്​ നടപടികൾ സ്വീകരിക്കുമെന്നും ആസ്​ട്രിയ വ്യക്​തമാക്കി. ശീതയുദ്ധകാലത്ത്​ ചാരപ്പണിക്ക്​ പ്രശസ്​തമായ ഇടത്താവളമാണ്​ ആസ്​ട്രിയയിലെ നയതന്ത്ര കാര്യാലയങ്ങൾ. യു.എസ്​ ഉൾപെടെ രാജ്യങ്ങൾക്ക്​ വലിയ നയതന്ത്ര ശ്രംഖലയാണ്​ ഇവിടെ പ്രവർത്തിക്കുന്നത്​.

ട്രംപ്​ പിൻവാങ്ങിയതോടെ പാതിവഴിയിലായ 2015ലെ ഇറാൻ ആണവ കരാർ വീണ്ടും പ്രാബല്യത്തിലാക്കാൻ ലക്ഷ്യമിട്ടുള്ള ചർച്ചകൾ വിയനയിൽ പുരോഗമിക്കുന്നതിനിടെയാണ്​ പുതിയ ​രോഗബാധ.