ആർക്കു വേണം ഈ സ്വർണം പൊതിഞ്ഞ്​, ആഡംബരം തുളുമ്പും വിമാനം​? എയർപോർട്ടിലുപേക്ഷിച്ച്​ ട്രംപി​ന്‍റെ സ്വന്തം ബോയിങ്​ 757

വാഷിങ്​ടൺ: ഒരുവട്ടം കണ്ണ്​ ഉടക്കിയാൽ ഇമവെട്ടാതെ നോക്കിപ്പോകും, സ്വർണവർണമണിഞ്ഞ്​ ആഡംബരത്തി​ന്‍റെ നേർസാക്ഷ്യമായി ആകാശത്തും ഭൂമിയിലും പറന്നുനടന്ന ട്രംപി​ന്‍റെ ആ സ്വന്തം വിമാനം. വി.ഐ.പി യാത്രകൾ, ഫോ​ട്ടോഷൂട്ടുകൾ തുടങ്ങി പലതിനും മുൻ പ്രസിഡൻറ്​ അഭിമാനത്തോടെ ഉപയോഗിച്ചത്​. കത്തിയും ഫോർക്കും പിടിച്ച്​ വിമാനത്തിലിരുന്ന്​ കെ.എഫ്​.സി, മക്​ഡൊണാൾഡ്​സ്​ വിഭവങ്ങൾ കഴിക്കുന്നതി​ന്‍റെ ചിത്രങ്ങൾ വരെ പുറംലോകം ആസ്വദിച്ച്​ കണ്ടു. 24 കാരറ്റ്​ സ്വർണത്തിൽ തീർത്ത സീറ്റ്​ കൊളുത്തുകൾ, അലങ്കൃതമായ ബാത്​റൂമുകൾ... അങ്ങനെ എന്തൊക്കെയായിരുന്നു.

ഈ ബോയിങ്​ 757 വിമാനം പക്ഷേ, മൻഹാട്ടനിൽനിന്ന്​ 60 കിലോമീറ്റർ അകലെ ന്യൂയോർകിലെ ഓറഞ്ച്​ കൗണ്ടിയിൽ വെറുതെ വിശ്രമിക്കുകയാണിപ്പോൾ, പഴയ പ്രൗഢിയുടെ നിഴലായി.

ഒരു എഞ്ചിനി​ന്‍റെ ചില ഭാഗങ്ങൾ അഴിച്ചുമാറ്റിയിട്ടുണ്ട്​​. രണ്ടാമത്തേത്​ പ്ലാസ്​റ്റികിൽ പൊതിഞ്ഞുവെച്ചനിലയിലും​. ഇനിയും ലക്ഷക്കണക്കിന്​ ഡോളറുകൾ ഒഴുകിയാലേ ആകാശത്ത്​ ഈ വിമാനം പറക്കൂ. കോവിഡിൽ കുടുങ്ങി ടൂറിസം മേഖല പഴയ നില പ്രാപിക്കാത്തതിനാൽ ട്രംപി​ന്‍റെ വിമാനവും അതിവേഗമൊന്നും തിരിച്ചുവരുമെന്ന്​ അമേരിക്കക്കാർ പ്രതീക്ഷിക്കുന്നില്ല.

ഏറെയായി വിമാനം കട്ടപ്പുറത്താണെന്ന്​ മാധ്യമ റിപ്പോർട്ടുകൾ പറയുന്നു. ഇനി എന്നുമുതൽ യാത്ര പുനരാരംഭിക്കും എന്നതിനുമില്ല ഉത്തരം.

ട്രംപ്​ കൈവെച്ച ടൂറിസം അനുബന്ധ മേഖലകളിൽനിന്ന്​ വരുമാനം നിലച്ചത്​ ബാധിച്ചതായാണ്​ സൂചന. മോശം കാലാവസ്​ഥയിൽ ഒന്നും ചെയ്യാതെ വിമാനം ഇ​ട്ടേച്ചുപോന്നതിനാൽ​ തുരു​െമ്പടുക്കാൻ സാധ്യതയേറെ. മഞ്ഞും മഴയും ഈർപവും തുടങ്ങി കാലാവസ്​ഥയുടെ ഓരോ ഘടകവും ഇതിനു മേൽ പരിക്കേൽപിക്കും. ദീർഘനാൾ നിർത്തിയിടുന്ന വിമാനങ്ങൾ കുറെകൂടി അകലെ കാലാവസ്​ഥ അത്രക്ക്​ ബാധിക്കാത്ത ഒരു മരുഭൂമിയിലാണ്​ പതിവായി നിർത്തിയിടാറ്​. അത്​ വേണ്ടെന്നുവെച്ചാണ്​ അനാഥമായി കിടക്കുന്നത്​.

കുറെകൂടി ചെറിയ എട്ടു സീറ്റ്​ സെസ്​ന 750 കോർപറേറ്റ്​ ജെറ്റ്​ ആണ്​ നിലവിൽ ട്രംപ്​ ഉപയോഗിക്കുന്നത്​.

2010ലായിരുന്നു ബോയിങ്​ 757 വിമാനം ട്രംപ്​ സ്വന്തമാക്കുന്നത്​. മൈക്രോസോഫ്​റ്റ്​ ശതകോടീശ്വരൻ പോൾ അലെ​ന്‍റെതായിരുന്നു അതുവരെയും ഈ വിമാനം. പിന്നീട്​ അതിവേഗം ട്രംപിന്​ ഇഷ്​ട യാത്രാവാഹനമായി. പ്രസിഡൻറ്​ തെരഞ്ഞെടുപ്പ്​ പ്രചാരണ ഘട്ടങ്ങളിലും ഇത്​ കൂടെ സഞ്ചരിച്ചു. പക്ഷേ, നല്ലകാലം കഴിഞ്ഞതോടെ വിമാനയാത്രക്ക്​ ചെലവ്​ വല്ലാതെ കൂടി. മണിക്കൂറിന്​ 15,000- 18,000 ഡോളർ വരെ വേണമെന്നു വന്നതോടെ ശരിക്കും പ്രയാസം വന്നുമൂടി. എന്നല്ല, കൂടുതൽ നേരം പറത്താവുന്ന അവസ്​ഥ വിട്ടതായും വ്യോമയാന രംഗത്തെ വിദഗ്​ധർ പറയുന്നു.

എഞ്ചിൻ പഴക്കവും ആവശ്യമായ ഭാഗങ്ങൾ സംഘടിപ്പിക്കാനുള്ള ബുദ്ധിമുട്ടും പരിഗണിച്ചാൽ ട്രംപ്​ ചെയ്​തതു തന്നെ വഴി എന്നു വേണേൽ പറയേണ്ടിവരും. മിക്ക വിമാനസർവീസുകളും 757 മോഡലുകൾ ​ഉപേക്ഷിക്കുന്നതാണ്​ കാലം. റോൾസ്​റോയ്​സ്​ എഞ്ചിനുകളിലൊന്ന്​ കാര്യമായ അറ്റകുറ്റപ്പണി വേണ്ട സാഹചര്യത്തിലാണ്​. പോൾ അലൻ ഈ വിമാനം വാങ്ങും​മുമ്പ്​ മെക്​​സികോയിൽ വാണിജ്യ ആവശ്യത്തിന്​സർവീസ്​ നടത്തിയതാണ്​. അതുകഴിഞ്ഞ്​ പോൾ അലനും ഉപയോഗിച്ചു. അദ്ദേഹം വിൽക്കുന്നുവെന്ന്​ കേട്ടപ്പോൾ ചാടിപ്പിടിച്ചതാണ്​. പിന്നീട്​ ഫ്രാൻസിൽനിന്ന്​ വരുത്തിയ അലങ്കാര വസ്​തുക്കൾ ഉപയോഗിച്ച്​ അകത്ത്​ ഒന്നാകെ മാറ്റി.

കഴിഞ്ഞ വർഷങ്ങളിൽ ട്രംപി​ന്‍റെ ആസ്​തിയിൽ കാര്യമായ ഇടിവുണ്ടായതായാണ്​ റിപ്പോർട്ടുകൾ. അടുത്തിടെ ന്യൂയോർക്​ ടൈംസ്​ റിപ്പോർട്ട്​ ചെയ്​തത്​ 42 കോടി ഡോളറിലേറെ വ്യക്​തിഗത ബാധ്യതയുണ്ടെന്നാണ്​. അവയിലേറെയും അടുത്ത നാലു വർഷത്തിനുള്ളിൽ അടച്ചുതീർക്കേണ്ടവയും. ഗോൾഫ്​ കോഴ്​സുകളുൾപെടെ സുപ്രധാന ബിസിനസ്​ സംരംഭങ്ങളിലേറെയും വൻനഷ്​ടത്തിലാണ്​. അതുവഴി 2016 ഫെബ്രുവരിയിൽ 300 കോടി ഡോളർ ആസ്​തിയുള്ളത്​ ചുരുങ്ങിയത്​ 230 കോടി ഡോളറായി ചുരുങ്ങിയിട്ടുണ്ടാകുമെന്നാണ്​ കണക്കുകൂട്ടൽ. 10 കോടി ഡോളർ കൊടുത്തുവാങ്ങിയ ബോയിങ്​ 757 മോഡൽ ഇനി വിൽപന നടത്തിയാൽ ഒരു കോടി ഡോളർ പോലും തരപ്പെടില്ലെന്ന ആധി വേറെ.

228 യാത്രക്കാർക്കിരിക്കാവുന്ന വിമാനം ആഡംബരം കൂട്ടി 43 സീറ്റിലേക്ക്​ ചുരുക്കിയതിനാൽ വിമാനസർവീസ്​ നടത്തുന്നവർ എടുക്കാൻ സാധ്യത പിന്നെയും കുറവ്​. വഴികളടഞ്ഞാകുമോ ട്രംപ്​ ഇവിടെ നിർത്തിയിട്ട്​ പോയത്​? ഉത്തരത്തിനായി കാത്തിരിപ്പിലാണ്​ ലോകം.