പെൺകുട്ടികളെ എത്രയും വേഗം സ്കൂളിലേക്ക് മടങ്ങാൻ അനുവദിക്കും -താലിബാൻ

കാബൂൾ: അഫ്ഗാനിസ്​താനിലെ പെൺകുട്ടികളെ എത്രയും വേഗം സ്കൂളിലേക്ക് മടങ്ങാൻ അനുവദിക്കുമെന്ന് താലിബാൻ വക്​താവ്​ സബീഹുല്ല മുജാഹിദ്. അഫ്​ഗാൻ മന്ത്രിസഭ വിപുലീകരിച്ച​ ശേഷം സംസാരിക്കുകയായിരുന്നു അദ്ദേഹം. വനിതകളെ ഉൾപ്പെടുത്താതെയാണ്​ മന്ത്രിസഭ വിപുലീകരിച്ചത്​. അതേസമയം, മന്ത്രിസഭയിൽ ന്യൂനപക്ഷങ്ങളെ ഉൾപ്പെടുത്തി.

അഫ്​ഗാനിസ്​താനിൽ പെൺകുട്ടികളുടെ വിദ്യാഭ്യാസ രീതിയിലെ പരിഷ്​കാരങ്ങൾ കഴിഞ്ഞയാഴ്ചയാണ്​ താലിബാൻ ഭരണകൂടം പ്രഖ്യാപിച്ചത്​. ആൺകുട്ടികളും പെൺകുട്ടികളും ഒരുമിച്ച്​ ഒരു ക്ലാസ്​മുറിയിൽ പഠിക്കുന്ന സ​മ്പ്രദായം ഇനിയുണ്ടാകില്ല.

ബിരുദാനന്തര ബിരുദമടക്കമുള്ള കോഴ്​സുകളിൽ പെൺകുട്ടികൾക്ക്​ പഠനം പുനരാരംഭിക്കാം. എന്നാൽ, ശിരോവസ്​ത്രം അടക്കമുള്ള വസ്​ത്രധാരണം നിർബന്ധമാണ്​. പെൺകുട്ടികളെ പഠിപ്പിക്കാൻ വനിത അധ്യാപകരുണ്ടാകും.

അതേസമയം, കഴിഞ്ഞദിവസം നിർത്തലാക്കിയ വനിതകാര്യ മന്ത്രാലയത്തെ സംബന്ധിച്ച്​ താലിബാൻ വക്​താവ്​ പ്രതികരിച്ചില്ല. ഗൈഡൻസ്​ മന്ത്രാലയം എന്നാണ്​ പുതിയ പേര്​. ആരോഗ്യ മന്ത്രാലയത്തിലടക്കം മാറ്റങ്ങൾ വരുത്തിയാണ്​ മന്ത്രിസഭ വിപുലീകരിച്ചത്​.