ജോർജ്​ ഫ്ലോയിഡിന്‍റെ കുടുംബത്തിന്​ നേരെ ആക്രമണം; നാലുവയസുകാരിക്ക്​ വെടിയേറ്റു

ന്യൂയോർക്ക്​: വെള്ളക്കാരനായ പൊലീസുകാരന്‍റെ വർണവെറിക്കിരയായി ശ്വാസം കിട്ടാതെ പിടഞ്ഞുമരിച്ച ആഫ്രോ അമേരിക്കൻ വംശജൻ ജോർജ്​ ​ഫ്ലോയിഡിന്‍റെ അടുത്ത ബന്ധുവായ നാലുവയസുകാരിക്ക്​ വെടിയേറ്റു. പുതുവത്സര പുലർച്ചെ മൂന്നിനായിരുന്നു കുടുംബത്തിന്​ നേരെ ആക്രമണം.

നാലുവയസുകാരി അരിയാന ഡെലനാണ്​ വെടിയേറ്റത്​. സൗത്ത്​ ഹൂസ്റ്റണിലെ അപാർട്ട്​മെന്‍റിൽ മുകളിലെ നിലയിലായിരുന്ന നാലു​പേർക്കെതിരെയായിരുന്നു ആക്രമണം. കുടുംബത്തിന്​ നേരെ നടന്ന ആക്രമണം ആസൂത്രിതമാണെന്ന്​ അരിയാനയുടെ പിതാവ്​ ആരോപിച്ചു.

ആക്രമണത്തെ തുടർന്ന്​ ഉടൻ തന്നെ അരിയാനയെ ആശുപത്രിയിൽ പ്രവേശിപ്പിച്ചു. ശ്വസകോശത്തിനും കരളിനും ശസ്ത്രക്രിയ നടത്തി. മൂന്ന്​ വാരിയെല്ലുകളും ഒടിഞ്ഞിട്ടുണ്ട്​.

കുടുംബത്തിന്​ നേരെ നടന്ന ആക്രമണത്തിന്‍റെ കാരണം കണ്ടെത്താനും കുട്ടിയെയും കുടുംബത്തെയും അക്രമികൾ ലക്ഷ്യംവെച്ചിട്ടുണ്ടോയെന്ന്​ കണ്ടെത്താനും അന്വേഷണം നടത്തുന്നതായി ഹൂസ്റ്റൻ പൊലീസ്​ പ്രതികരിച്ചു.

അതേസമയം വെളുപ്പിന്​ മൂന്നുമണിക്ക്​ സംഭവം നടന്നിട്ടും ഏഴുമണി വരെ പൊലീസ്​ അവിടെ എത്തിയില്ലെന്നും നടപടിയെടുക്കാൻ വൈകിയെന്നും കുടുംബം ആരോപിച്ചു. കുടുംബത്തിന്‍റെ ആരോപണത്തിൽ അന്വേഷണം ആരംഭിച്ചിട്ടുണ്ടെന്നും ഹൂസ്റ്റൺ പൊലീസ്​ മേധാവി പറഞ്ഞു.

അമേരിക്കയിൽ വൻ പ്രക്ഷോഭങ്ങൾക്ക്​ തുടക്കമിട്ടതായിരുന്നു ജോർജ്​ ഫ്ലോയിഡിന്‍റെ കൊലപാതകം. തുർന്ന്​ ബ്ലാക്ക്​ ലൈവ്​സ്​ മാറ്റർ മുദ്രാവാക്യവുമായി നാലുവയസുകാരി അരിയാന ഉൾപ്പെ​ടെ ഫ്ലോയിഡിന്‍റെ കുടുംബം തെരുവിൽ ഇറങ്ങിയിരുന്നു. ഫ്ലോയിഡിനെ കഴുത്തിൽ കാൽമുട്ട്​ അമർത്തി കൊലപ്പെടുത്തിയ മിനിയപോളിസ്​ പൊലീസ്​ ഓഫിസർ ഡെറിക്​ ഷോവിനെ പിന്നീട്​ 20 വർഷത്തിലധികം കഠിനതടവിന്​ വിധിച്ചിരുന്നു. 2020 മേയിലായിരുന്നു ​ലോകത്തെ നടുക്കിയ അരുംകൊല. എനിക്ക്​ ശ്വാസം മുട്ടുന്നുവെന്ന ഫ്ലോയിഡിന്‍റെ അവസാന വാചകങ്ങൾ ഉയർത്തിയായിരുന്നു പ്രതിഷേധം.