13കാരിയെ ആ 14കാരൻ കുത്തിയത്​ 114 തവണ; അരുംകൊല നടത്തിയ ഫുച്ചി 'കുട്ടിക്കൊലയാളി'യല്ല

സെന്‍റ്​ ജോൺസ്​ കൗണ്ടി (​േഫ്ലാറിഡ): 'ഒരാളെ കൊല്ലാൻ പോകുക'യാണെന്ന്​ സ്​കൂളിലെ കൂട്ടുകാരോട്​ എയ്​ഡൻ ഫുച്ചി പറഞ്ഞത്​ തമാ​ശയായേ അവരെടുത്തിരുന്നുള്ളൂ. എന്നാൽ, സഹപാഠിയായ ട്രിസ്റ്റൻ ബെയ്​ലിയുടെ അരുംകൊലക്കുപിന്നിൽ ഫുച്ചിയാണെന്നറിഞ്ഞതോടെ അവരെല്ലാം ഞെട്ടി. ബെയ്​ലിയെ കൊലപ്പെടുത്തിയെന്നതു മാത്രമല്ല, 114 തവണ അവളെ കത്തികൊണ്ട്​ കുത്തിയാണ്​ ഫുച്ചി വധിച്ചതെന്നത്​ ആ 14കാരന്‍റെ ക്രൂരമായ മാനസികാവസ്​ഥയുടെ തെളിവായിരുന്നു.

13 വയസ്സു മാത്രമുള്ള ബെയ്​ലിയെ ആളൊഴിഞ്ഞ മരക്കൂട്ടങ്ങൾക്കിടയിലേക്ക്​ വിളിച്ചുകൊണ്ടുപോയാണ്​ ഫുച്ചി 114 തവണ ദേഹത്ത്​ കത്തി കുത്തിയിറക്കിയത്​.ശരീരത്തിന്‍റെ മുഴുവൻ ഭാഗങ്ങളിലുമെന്നപോലെ കു​ത്തേറ്റ പാടുകൾ നിറഞ്ഞിരുന്നു. കത്തിത്തലപ്പ്​ പൊട്ടി ബാലികയുടെ തലയോട്ടിയിൽ കുരുങ്ങിക്കിടക്കുകയായിരുന്നുവെന്ന്​ പോസ്റ്റ്​മോർട്ടത്തിനിടെ കണ്ടെത്തി. കത്തിയുടെ ബാക്കിഭാഗം മൃതദേഹം ഉപേക്ഷിച്ച സ്​ഥലത്തിനടുത്ത കുളത്തിൽനിന്നാണ്​ കിട്ടിയത്​.

ഈ മാസാദ്യമാണ്​ ലോകത്തെ ഞെട്ടിച്ച അരുംകൊല നടന്നത്​. ഇതിനുശേഷം ഈ കുട്ടിക്കൊലയാളിയെ ഏതുവിധം പരിഗണിക്കണമെന്നതിനെ ചൊല്ലി നിയമജ്​ഞർക്കിടയിൽ ചർച്ച നടക്കുകയായിരുന്നു. ഒടുവിൽ കഴിഞ്ഞ ദിവസം അവർ തീരുമാനത്തിലെത്തി -'കിരാതമായ ക്രൂരത കണക്കിലെടുത്ത്​ ഫുച്ചിയെ മുതിർന്നയാൾക്കു സമാനമായ രീതിയിൽ പരിഗണിക്കണം'. പ്രായപൂർത്തിയായില്ലെന്നതു കണക്കിലെടുത്ത്​ നേരത്തേ, 'സെക്കൻഡ്​ ഡിഗ്രി' കൊലപാതകമായി പരിഗണിച്ചത്​ മാറ്റി മുൻകൂട്ടി ആസൂത്രണം ചെയ്​ത്​ നടപ്പാക്കിയ ക്രൂരമായ കൊലപാതകമെന്ന നിലയിൽ മുതിർന്നവരുടെ കുറ്റകൃത്യത്തിന്​ സമാനമായി 'ഫസ്റ്റ്​ ഡിഗ്രി' കൊലപാതകമായി പരിഗണിക്കാൻ തീരുമാനിക്കുകയായിരുന്നു.

കുട്ടിക്കൊലയാളിയെന്നതു മാറി മുതിർന്ന കൊലയാളിയെന്ന നിലയിലാണ്​ ഫുച്ചി വിചാരണ നേരിടേണ്ടിവരിക. ഇതോടെ ജീവപര്യന്തം തടവുശിക്ഷയാണ്​ ഈ എട്ടാം​ഗ്രേഡ്​ വിദ്യാർഥിയെ കാത്തിരിക്കുന്നത്​. ഫുച്ചിയെ മുതിർന്നവർക്കായുള്ള ജയിലിലേക്ക്​ മാറ്റും.

'ഒരു 14കാരനെതി​െര ഫസ്റ്റ്​ ഡിഗ്രി കൊലപാതകക്കേസ്​ ചാർജ്​ ചെയ്യുന്നതിൽ എനിക്കൊട്ടും സന്തോഷമുണ്ടായിരുന്നില്ല. എന്നാൽ, എല്ലാ വസ്​തുതകളും സാഹചര്യങ്ങളും നിയമവശവും പരിശോധിച്ചശേഷം ഈ കൊലപാതകം മുതിർന്നവരുടേതിന്​ സമാനമായി കൈകാര്യം ചെയ്യണമെന്ന തീരുമാനത്തിലെത്താൻ എനിക്കും എക്​സിക്യൂട്ടിവ്​ ടീമിനും പ്രയാസവുമുണ്ടായിരുന്നില്ല' -സ്​റ്റേറ്റ്​ അറ്റോർണി ആർ.ജെ. ലാരിസ മാധ്യമപ്രവർത്തകരോട്​ പറഞ്ഞു. 'ഒരാ​െ​ള കൊല്ലുമെന്ന്​ അവൻ കൂട്ടുകാരോട്​ പറഞ്ഞിരുന്നു. മരക്കൂട്ടങ്ങൾക്കിടയിലേക്ക്​ കൂട്ടിക്കൊണ്ടുപോയി കുത്തിക്കൊല്ലുമെന്നാണ്​ പറഞ്ഞതും. എന്നാൽ, ആരെയാണെന്ന്​ പറഞ്ഞിരുന്നില്ല' -അറ്റോർണി കൂട്ടിച്ചേർത്തു.

മാതൃദിനത്തിലാണ്​ ഡർബിൻ ക്രോസിങ്ങിനടുത്തുള്ള കുളത്തിനരികിൽ​ ബെയിലിയുടെ മൃതദേഹം കാണപ്പെട്ടത്​. ഫുച്ചിയുടെ വീട്ടിൽനിന്ന്​ ഒരു കിലോമീറ്റർ പോലുമില്ല ഇവിടേക്ക്​. ബെയിലിയുടെ കുടുംബം അവളെ കാണാനില്ലെന്ന്​ പരാതിപ്പെട്ട്​ എട്ടുമണിക്കൂറിന്​ ശേഷമാണ്​ അയൽക്കാരിലൊരാൾ മൃത​ദേഹം കണ്ടത്​. ഇതിനടുത്ത കുളത്തിൽനിന്നാണ്​ കത്തി കണ്ടെടുത്തത്​. മെയ്​ പത്തിനാണ്​ ഫുച്ചി അറസ്റ്റിലായത്​.