പുതിയ നിയമ നിർമാണ നീക്കത്തിനെതിരെ ഫ്രാൻസിൽ പ്രതിഷേധം കത്തുന്നു; വംശീയതക്കെതിരാണ്​ മുന്നേറ്റമെന്ന്​ പ്രതിഷേധക്കാർ

പാരിസ്​: പുതിയ സുരക്ഷാ നിയമം കൊണ്ടുവരാനുള്ള പ്രസിഡൻറ്​ ഇമ്മാനുവൽ മാക്രോണി​െൻറ നീക്കത്തിനെതിരെ ഫ്രാൻസിലെ തെരുവുകളിൽ പ്രതിഷേധം കത്തുന്നു. അര ലക്ഷത്തോളം ആളുകൾ പ​​ങ്കെടുത്ത പ്രകടനമാണ്​ പാരിസിൽ മാത്രം നടന്നത്​. കറുത്ത വർഗക്കാരനെ പൊലീസ്​ മർദിക്കുന്നതി​​െൻറ വിഡിയോ സമൂഹ മാധ്യമങ്ങളിലൂടെ പ്രചരിച്ചതിനെ തുടർന്നാണ്​ സമരം രൂക്ഷമായത്​. കല്ലെറിയലും തീവെപ്പും പൊലീസി​െൻറ ടിയർ ഗ്യാസ്​ പ്രയോഗവുമായി സമരം പാരിസ്​ ശക്​തമാകുകയാണ്​.

കഴിഞ്ഞ ദിവസം സമരക്കാർക്ക്​ നേരെ നിരവധി തവണ പൊലീസ്​ ടിയർഗ്യാസ്​ പ്രയോഗിച്ചു. ഒന്നര ലക്ഷത്തോളം ആളുകൾ ഫ്രാൻസിലെ തെരുവുകളിൽ പ്രതിഷേധത്തിലാണെന്ന്​ അന്താരാഷ്​ട്ര മാധ്യമങ്ങൾ റിപ്പോർട്ട്​ ചെയ്യുന്നു. അഞ്ച്​ ലക്ഷത്തോളം ആളുകൾ തെരുവിലെത്തുമെന്നാണ്​ പ്രതിഷേധക്കാർ പറയുന്നത്​. സമരം കൂടുതൽ രൂക്ഷമാകുമെന്നതി​െൻറ സൂചനയാണ്​ പ്രതിഷേധക്കാർ നൽകുന്നത്​.

കറുത്ത വർഗക്കാരനെ പൊലീസ്​ മർദിക്കുന്ന ദൃശ്യം ലജ്ജാകരമാണെന്ന്​ പ്രസിഡൻറ്​ മാക്രോൺ പരസ്യമായി പ്രസ്​താവന നടത്തിയിരുന്നു. എന്നാൽ, പൊലീസ്​ അടക്കമുള്ള സംവിധാനങ്ങളിൽ ഉറച്ചുപോയ കടുത്ത വംശീയത തുടച്ചു നീക്കാനുള്ള ശ്രമമാണ്​ സർക്കാർ നടത്തേണ്ടതെന്നാണ്​ സമരക്കാർ പറയുന്നത്​.

കറുത്ത വർഗക്കാർക്കെതിരെയും അറബ്​ വംശ​ജർക്കെതിരെയും പൊലീസ്​ അടക്കമുള്ള സംവിധാനങ്ങളിൽ കടുത്ത വംശീയവി​േവചനം നിലനിൽക്കുന്നതായാണ്​ പ്രതിഷേധക്കാർ ചൂണ്ടികാണിക്കുന്നത്​. ഇത്​ തെളിയിക്കുന്ന നിരവധി സംഭവങ്ങളാണ്​ അടുത്ത കാലത്ത്​ ഫ്രാൻസിലുണ്ടായിട്ടുള്ളത്​. 'ഞങ്ങൾ ദീർഘകാലമായി ഇത്തരം വിവേചനങ്ങൾ നേരിടുകയാണ്​. ഇപ്പോൾ ചൂണ്ടികാണിക്കാൻ കുറെ ആളുകൾ തെരുവിലെത്തിയിരിക്കുന്നു' - 35 കാരനായ മുഹമ്മദ്​ മാഗസ്സ പറയുന്നു.

മാക്രോണി​െൻറ പുതിയ സുരക്ഷ നിയമം നടപ്പായാൽ സ്വതന്ത്ര മാധ്യമ പ്രവർത്തനം ഫ്രാൻസിൽ ഇല്ലാതാകുമെന്നും സമരക്കാർ പറയുന്നു. മാക്രോണി​െൻറ പൊലീസ്​ സ്​റ്റേറ്റിനെതിരെ എന്ന പ്ലക്കാഡുകളുമായാണ്​ തെരുവിൽ മുദ്രാവാക്യങ്ങൾ മുഴങ്ങുന്നത്​.