യു.കെയിലേക്ക് കുടിയേറ്റക്കാരുമായി തിരിച്ച റബർ ബോട്ട് നശിപ്പിച്ച് ഫ്രഞ്ച് പൊലീസ്
text_fields
പാരിസ്: സ്ത്രീകളും കുട്ടികളുമടങ്ങുന്ന കുടിയേറ്റക്കാരുമായി യു.കെയിലേക്ക് തിരിച്ച ‘ടാക്സി ബോട്ട്’ ഫ്രാൻസിന്റെ തീരത്തുവെച്ച് പൊലീസ് നശിപ്പിച്ചതായി ബി.ബി.സി റിപ്പോർട്ട്. ഫ്രഞ്ച് തീരത്തെ വിവിധ സ്ഥലങ്ങളിൽ നിന്ന് യാത്രക്കാരെ കൊണ്ടുപോകാൻ കള്ളക്കടത്ത് സംഘങ്ങൾ ഉപയോഗിച്ചതെന്നു കരുതുന്ന ബോട്ടാണ് നശിപ്പിച്ചത്.
ബൊളോണിന് തെക്കുള്ള തീരത്ത് ആഴം കുറഞ്ഞ വെള്ളത്തിലേക്ക് ഇറങ്ങിപ്പോയി പൊലീസ് കത്തി ഉപയോഗിച്ച് ചെറിയ റബർ ബോട്ട് കീറിമുറിക്കുകയായിരുന്നു. പുരുഷന്മാരും സ്ത്രീകളും കുട്ടികളും നിറഞ്ഞ ബോട്ട് തിരമാലകളിൽ അപകടകരമായി ചുരുണ്ടുകൂടി. ബോട്ട് തകർന്നെങ്കിലും അതിലുണ്ടായിരുന്ന എല്ലാവരും കരയിലെ സുരക്ഷിത സ്ഥാനത്തേക്ക് കയറി. 100 റോളം പേർ അതിൽ ഉണ്ടായിരുന്നു.
ഒരു പൊലീസുകാരൻ റബറിൽ ആവർത്തിച്ച് വെട്ടിയപ്പോൾ ബോട്ടിലുണ്ടായിരുന്ന ചിലരിൽ നിന്ന് കോപത്തിന്റെയും നിരാശയുടെയും നിലവിളികൾ ഉയർന്നു. ബോട്ടിന്റെ അരികിൽ എൻജിനോട് ചേർന്ന് കുടുങ്ങിപ്പോയ ഒരു പെൺകുട്ടിയെ സുരക്ഷിത സ്ഥാനത്തേക്ക് വലിച്ചിഴച്ചു. മറ്റുള്ളവർ സമീപത്തുള്ള മണലിലേക്ക് കയറി.
ജീവൻ അപകടത്തിലാക്കി കടലിലൂടെ യാത്ര തിരിക്കുന്ന കുടിയേറ്റക്കാരെ തടയുന്ന കർശനമായ നിയമങ്ങൾ ഫ്രഞ്ച്പൊലീസ് സാധാരണയായി പാലിക്കാറുണ്ടെങ്കിലും ഈ ഇടപെടൽ അസാധാരണമായിരുന്നു.
യു.കെയിലേക്കുള്ള കുടിയേറ്റക്കാരുടെ ചെറു ബോട്ടുകളുടെ കടന്നുകയറ്റം തടയാനുള്ള സമ്മർദ്ദത്തിൽ ഫ്രഞ്ച് പൊലീസ് അവരുടെ തന്ത്രങ്ങൾ മാറ്റുന്നു എന്നതിന്റെ തെളിവായിരിക്കാം ഈ അപൂർവ സംഭവം എന്നാണ് റിപ്പോർട്ട്.
കടൽതീരത്ത് ഏതാനും മീറ്റർ അകലെയായപ്പോൾ തന്നെ ബോട്ട് കുഴപ്പത്തിലായിരുന്നു. ഔട്ട്‌ബോർഡ് മോട്ടോറിന് ചുറ്റും ആളുകൾ തിങ്ങിനിറഞ്ഞിരുന്നു. ബോട്ടിനടിയിൽ തിരമാലകൾ വന്യമായി ആഞ്ഞടിച്ചു. അപകടത്തിൽപ്പെട്ട കുട്ടികളുടെ ഉച്ചത്തിലുള്ള നിലവിളികൾ ഉയർന്നു. ആസമയത്ത് ഓറഞ്ച് ലൈഫ് ജാക്കറ്റുകൾ ധരിച്ച വലിയ കൂട്ടം ആളുകൾ സമീപത്തുള്ള മണൽക്കൂനകളിൽ നിന്ന് കടലിലേക്ക് കുതിച്ചു.
ഫ്രഞ്ച് പൊലീസ് ബോട്ട് നശിപ്പിക്കുന്നതിന്റെ ചിത്രങ്ങൾ ഒരു സുപ്രധാന നിമിഷമാണെന്നും ഈ നടപടിയെ ഞങ്ങൾ സ്വാഗതം ചെയ്യുന്നു എന്നും യു.കെ പ്രധാനമന്ത്രിയുടെ ഔദ്യോഗിക വക്താവ് പറഞ്ഞു. കൂടുതൽ കർശനമായ നടപടി സ്വീകരിക്കുന്നത് കാണാൻ ഞങ്ങൾ ആഗ്രഹിക്കുന്നു. അതാണ് ഞങ്ങളുടെ പ്രവർത്തനത്തിന്റെ കൃത്യമായ ലക്ഷ്യമെന്നും വക്താവ് പറഞ്ഞു.