നാളെ മുതൽ പൊതുസ്ഥലങ്ങളില്‍ മാസ്‌ക് വേണ്ടയെന്ന്​ ഫ്രാന്‍സ്

പാരീസ്​: പൊതുസ്ഥലങ്ങളില്‍ മാസ്‌ക് വെക്ക​ണമെന്ന നിബന്ധന നാളെ മുതൽ ഫ്രാന്‍സ് ഒഴിവാക്കും. കോവിഡ് കേസുകളിൽ ഗണ്യമായ കുറവുണ്ടായതും വാക്‌സിനേഷന്‍ നടപടികള്‍ ഊർജിതമായതും കണക്കിലെടുത്താണ്​ നടപടിയെന്ന്​ പ്രധാനമന്ത്രി ജീൻ കാസ്റ്റക്സ് അറിയിച്ചു. അതേസമയം, ആൾക്കൂട്ടങ്ങൾ ഉള്ളയിടങ്ങളിലും പൊതുഗതാഗത സംവിധാനങ്ങളിലും സ്റ്റേഡിയങ്ങളിലും മാസ്ക് ധരിക്കുന്നത് തുടരണമെന്നും അദ്ദേഹം ചൂണ്ടിക്കാട്ടി.

രാജ്യത്തിന്‍റെ ആരോഗ്യസ്ഥിതി പ്രതീക്ഷിച്ചതിലും വേഗത്തില്‍ മെച്ചപ്പെടുന്നു​ണ്ടെന്നും ആളുകള്‍ക്ക് പൊതുസ്​ഥലത്ത്​ മാസ്‌ക് ധരിക്കേണ്ടതിന്‍റെ ആവശ്യകത വ്യാഴാഴ്ച മുതല്‍ നീക്കിയിട്ടുണ്ടെന്നുമാണ്​ മന്ത്രിസഭ യോഗത്തിന് ശേഷം അദ്ദേഹം പറഞ്ഞത്​. നിലവിലെ രാത്രി കര്‍ഫ്യൂ ഈമാസം 20ന് നീക്കും. ഈമാസം 30ന്​ കർഫ്യൂ നീക്കാനായിരുന്നു നേരത്തേ തീരുമാനിച്ചിരുന്നത്​. ഇതാണ് 10 ദിവസം മുമ്പ്​ അവസാനിപ്പിക്കുന്നത്. യൂറോ കപ്പ്​ മത്സരങ്ങൾ നടക്കുന്ന പശ്​ചാത്തലത്തിലാണ്​ പുതിയ തീരുമാനം.

ഫ്രാൻസിലെ ശരാശരി പ്രതിദിന കേസുകൾ ചൊവ്വാഴ്ച 3,200 ആയി കുറഞ്ഞിരുന്നു. 2020 ആഗസ്റ്റിന്​ ശേഷം രാജ്യത്ത് റിപ്പോർട്ട് ചെയ്യപ്പെടുന്ന ഏറ്റവും കുറഞ്ഞ പ്രതിദിന കണക്കാണിത്. രാജ്യത്ത് 35 ദശലക്ഷം ആളുകള്‍ക്ക് മാസങ്ങള്‍ക്കുള്ളില്‍ വാക്‌സിനേഷന്‍ നല്‍കുമെന്നും കാസ്റ്റെക്‌സ് പറഞ്ഞു.