മാസ്​ക്​ ധരിക്കാത്തവർ 50 പുഷ്​ അപ്​ എടുക്കണം; ശരിയായി ധരിക്കാത്തവർ 15ഉം- ഇന്തോനീഷ്യയിൽ വ്യത്യസ്​ത ശിക്ഷ

ബാലി: മാസ്‌ക് ധരിക്കാതിരുന്ന വിദേശികള്‍ക്ക് ഇന്തോനീഷ്യയിൽ വ്യത്യസ്​ത ശിക്ഷ. മാസ്‌ക് ധരിക്കാതെ ബാലിയിലെ റിസോർട്ടിലെത്തിയ വിദേശികളെ സുരക്ഷ ഉദ്യോഗസ്ഥര്‍ പുഷ് അപ് എടുപ്പിച്ച് ശിക്ഷിക്കുകയായിരുന്നു. ഇതിന്‍റെ വിഡിയോ ദൃശ്യങ്ങൾ സമൂഹ മാധ്യമങ്ങളിൽ അടുത്തിടെ പ്രചരിച്ചിരുന്നു.

പൊതുസ്ഥലത്ത് മാസ്​ക്​ നിർബന്ധമാക്കിയിരിക്കുന്ന ഇന്തോനീഷ്യയിൽ അത്​ ലംഘിച്ചവരാണ്​ ശിക്ഷക്ക്​ വിധേയരായത്​. ബാലിയിലെ ഒരു റിസോർട്ടിൽ അടുത്തിടെ മാസ്​ക്​ ധരിക്കാത്ത നൂറിലേറെ വിദേശികളെയാണ്​ സുരക്ഷ ഉദ്യോഗസ്​ഥർ പിടികൂടിയത്​. 70 പേരില്‍ നിന്ന് ഏഴ് ഡോളര്‍ വീതം പിഴ ഈടാക്കി. കയ്യില്‍ പണമില്ലെന്ന് പറഞ്ഞ മുപ്പത് പേർക്കാണ്​ ശിക്ഷയായി പുഷ്​ അപ്​ നൽകിയത്​. മാസ്‌ക് ധരിക്കാത്തവരെ കൊണ്ട്​ 50 പുഷ്​ അപ്പും മാസ്‌ക് ശരിയായി ധരിക്കാത്തവരെ കൊണ്ട്​ 15 എണ്ണവുമാണ്​ എടുപ്പിച്ചത്​. ടീഷർട്ടും ഷോർട്​സും ധരിച്ച്​ പൊരിവെയിലിൽ ഇവരിൽ പലരും പുഷ്​ അപ്​ എടുക്കുന്ന ദൃശ്യങ്ങളാണ്​ അടുത്തിടെ പുറത്തായത്​.

രാജ്യത്ത് സന്ദര്‍ശനത്തിനെത്തുന്നവര്‍ കോവിഡ് പ്രോട്ടോക്കോള്‍ പാലിച്ചില്ലെങ്കിൽ അവരെ പുറത്താക്കുമെന്ന്​ ഇന്തോനീഷ്യ പ്രഖ്യാപിച്ചിട്ടുണ്ട്. എന്നാല്‍ ഇതുവരെ ഈ കുറ്റത്തിന്​ ആരെയും നാടുകടത്തിയിട്ടില്ല.