ചൈനയിൽ ഹോട്ടൽ തകർന്ന്​ വീണ്​ അഞ്ച്​ പേർ മരിച്ചു

ബെയ്​ജിങ്​: ചൈനയിൽ ഹോട്ടൽ തകർന്ന്​ വീണ്​ അഞ്ച്​ പേർ മരിച്ചു. ഷാൻഷി പ്രവിശ്യയിലുണ്ടായ അപകടത്തിൽ ഒരാൾക്ക്​ പരിക്കേറ്റതായും ചൈന സെൻട്രൽ ടി.വി (സി.സി.ടി.വി) റിപോർട്ട്​ ചെയ്​തു.

പ്രവിശ്യയിലെ ലിൻഫൻ അർബൻ ജില്ലയിലെ ഇരു​നില കെട്ടിടമാണ്​ തകർന്ന്​ വീണത്​. ശനിയാഴ്​ച പ്രാദേശിക സമയം രാവിലെ 9.40നായിരുന്നു​ അപകടം​. അപകട കാരണം ​അ​ന്വേഷിച്ച്​ വരികയാണ്​.

കുടുങ്ങിക്കിടന്ന 37ൽ 33 ആളുകളെയും രക്ഷപ്പെടുത്തിയെന്ന്​ മാധ്യമങ്ങൾ റിപോർട്ട്​ ചെയ്​തു. പാരാമിലിറ്ററി സേനാംഗങ്ങൾ, അഗ്​നിശമന സേന, പൊലീസ്​, പ്രദേശവാസികൾ എന്നിവരടക്കം 700 ലധികം ആളുകൾ രക്ഷാപ്രവർത്തനങ്ങളിൽ ഏർപെട്ടു.