വെസ്റ്റ്ബാങ്കിൽ കാറിനുനേരെ ഇസ്രായേൽ ഡ്രോൺ ആക്രമണം; അഞ്ച് പേർ കൊല്ലപ്പെട്ടു

വെസ്റ്റ് ബാങ്ക്: അധിനിവേശ വെസ്റ്റ് ബാങ്കിലെ തുൽക്കറെം നഗരത്തിനടുത്തുള്ള സെയ്തയിൽ വാഹനത്തിനുനേരെ ഇസ്രായേലി​ന്‍റെ വ്യോമാക്രമണം. അഞ്ച് പേർ കൊല്ലപ്പെട്ടു. തകർന്ന കാറി​ന്‍റെ ദൃശ്യങ്ങൾ പുറത്തുവന്നു. ഖാൻ യൂനിസിനടുത്ത് നടത്തിയ മറ്റൊരു ആക്രമണത്തിൽ ഒരു​ കുട്ടിയും മൂന്ന് സ്ത്രീകളുമടക്കം അഞ്ചുപേരും കൊല്ലപ്പെട്ടു. ഇവരെല്ലാം ഒരു കുടുംബത്തിലെ അംഗങ്ങളാണ്.

ഗസ്സയിലെ നിർണായക ലക്ഷ്യങ്ങൾ തങ്ങൾ നേടിയെടുത്തതായി ഇസ്രായേൽ സൈന്യം കഴിഞ്ഞ ദിവസം അവകാശ​പ്പെട്ടിരുന്നു. അതിൽ ഹമാസി​ന്‍റെ ആയുധ ശാലയും റഫയിലെ തുരങ്കങ്ങളും മിസൈൽ വിക്ഷേപണ സൈറ്റും ഉൾപ്പെടുമെന്നും അവർ വാദിച്ചു.

ഗസ്സയിൽ രാത്രിയിൽ ഉടനീളം നടത്തിയ ആക്രമണത്തിൽ നാ​ശനഷ്ടങ്ങളുടെ കണക്കുകൾ തങ്ങൾ എടുത്തിട്ടില്ലെന്നും എന്നാൽ, ബുറെയ്ജ് അഭയാർഥി ക്യാമ്പിലെ ഒരമ്മയും കുഞ്ഞും അടക്കം സിവിലിയൻമാരെ തങ്ങൾ ​കൊലപ്പെടുത്തിയെന്നും ഇസ്രായേൽ സൈന്യം പറഞ്ഞു.

ഒരു മുന്നറിയിപ്പുമില്ലാതെയാണ് ഖാൻ യൂനുസിൽ ആക്രമണം നടത്തിയതെന്നും മധ്യ ഗസ്സയിൽനിന്ന് തുടർച്ചയായി ഉഗ്രസ്​ഫോടന ശബ്ദം ഉയർന്നുവെന്നും രക്ഷാപ്രവർത്തനത്തിന് എത്തിയവർ പറഞ്ഞു. ഗസ്സക്കു പുറത്ത് ബെ്തലഹേമിലും ജെനിനിലും നബുലസിലുമൊക്കെയായി ഇസ്രായേൽ സേനയുടെ റെയ്ഡും അറസ്റ്റും തുടരുകയാണ്.