അമേരിക്ക തിരിച്ചയച്ചവരിൽ കോവിഡ്​ വ്യാപകം; ആശങ്കയിൽ രാജ്യങ്ങൾ

വാഷിങ്​ടൺ: കോവിഡ്​ വ്യാപനത്തിനിടെ അമേരിക്കയിൽ നിന്ന്​ തിരിച്ചയച്ച ഹെയ്​തി, ഗ്വാട്ടിമല, മെക്​സിക്കോ സ്വദേശ ികൾക്ക്​ വ്യാപകമായ തോതിൽ രോഗം സ്​ഥിരീകരിക്കുന്നു. കോവിഡ്​ നിരക്ക്​ താരതമ്യേന കുറവായിരുന്ന ഈ ദരിദ്ര രാജ്യങ ്ങളിൽ ഇത്​ ആശങ്ക സൃഷ്​ടിക്കുന്നതായി റോയി​ട്ടേഴ്​സ്​ റിപ്പോർട്ട്​ ചെയ്യുന്നു.

ഏറ്റവും ദരിദ്ര രാജ്യങ്ങള ിലേക്ക് അമേരിക്ക വിമാനം വഴി വൈറസ് ‘കയറ്റുമതി’ ചെയ്യുകയാണെന്ന്​ മനുഷ്യാവകാശ പ്രവർത്തകർ ആരോപിച്ചു. “ഈ നാടുകടത ്തലുകൾ അധാർമികമാണ്, അവർ അമേരിക്കക്കാരെയും ഹെയ്തിക്കാരെയും അപകടത്തിലാക്കുന്നു” എന്നാണ്​ യു.എസ്​ ഡെ​േമാക്രാറ ്റ്​ പ്രതിനിധി ആൻഡി ലെവിൻ പറഞ്ഞത്​. രോഗം പടരാതിരിക്കാൻ ഹെയ്തിയിലേക്കുള്ള വിമാനങ്ങൾ കൂടി നിർത്തണമെന്ന് അദ്ദേഹം ട്വിറ്ററിൽ ആവശ്യപ്പെട്ടു.

പുതിയ കൊറോണ കേസുകളിൽ അഞ്ചിലൊന്നും കഴിഞ്ഞയാഴ്ച അമേരിക്കയിൽനിന്ന് വന്നവർക്കാണെന്ന്​ ഗ്വാട്ടിമല സർക്കാർ സ്​ഥിരീകരിച്ചു. മെക്സിക്കോയിലും ഹെയ്തിയിലും എത്തിയവർക്കും കൊറോണ വൈറസ് കണ്ടെത്തിയതായി അധികൃതർ അറിയിച്ചു. രണ്ടാഴ്ച മുമ്പ് അമേരിക്കയിൽ നിന്നെത്തിയ മൂന്ന് ഹെയ്തി സ്വദേശികൾക്ക്​​ നിരീക്ഷണ കാലയളവിനിടയിൽ കോവിഡ്​ പോസിറ്റീവ് ക​ണ്ടെത്തിയിരുന്നു.

മെക്സിക്കൻ അതിർത്തി പട്ടണമായ ന്യൂവോ ലാരെഡോയിൽ, അമേരിക്കയിൽ നിന്ന്​ വന്ന ഒരാളിലൂടെ 14 പേർക്ക്​ രോഗം പകർന്നതായി പരിശോധനയിൽ തെളിഞ്ഞു. കത്തോലിക്കാസഭയുടെ നസറെത്ത് അഭയകേന്ദ്രത്തിൽ താമസിക്കുന്നവർക്കാണ്​ ഇയാളുമായുള്ള സമ്പർക്കത്തിലൂടെ കോവിഡ്​ ബാധിച്ചത്​. ക്യൂബ, മെക്സിക്ക, ഹോണ്ടുറാൻസ്, കാമറൂൺ സ്വദേശികൾക്കാണ്​ വൈറസ് പിടിപെട്ടതെന്ന് അധികൃതർ അറിയിച്ചു. മൂന്ന് കുട്ടികൾ ഉൾപ്പെടെ 15 പേരെയും ഐസൊ​ലേഷൻ വാർഡിലേക്ക്​ മാറ്റി.

തങ്ങൾ നാടുകടത്തിയവർക്ക്​ വൈറസ്​ ബാധിച്ചതായി യു.എസ് ഇമിഗ്രേഷൻ ആൻഡ് കസ്റ്റംസ് എൻഫോഴ്സ്മ​െൻറും സ്​ഥിരീകരിച്ചു. യു.എസ് സ​െൻറർസ് ഫോർ ഡിസീസ് കൺട്രോൾ ആൻഡ് പ്രിവൻഷൻ (സി.ഡി.സി) അധികൃതർ സാഹചര്യങ്ങൾ വിലയിരുത്തി ഗ്വാട്ടിമലയിലേക്കുള്ള വിമാനങ്ങൾ താൽക്കാലികമായി നിർത്തിവച്ചു. അതേസമയം, എത്രപേർക്ക്​ രോഗം ബാധിച്ചു എന്നത്​ സംബന്ധിച്ച്​ കൃത്യമായ കണകുകൾ നാടുകടത്തലിന് മേൽനോട്ടം വഹിക്കുന്ന സി.ഡി.സിയോ യു.എസ് ഭരണകൂടമോ പുറത്തുവിട്ടിട്ടില്ല.

57 കേസുകളാണ്​ ഹെയ്തിയിൽ ഇതുവരെ സ്ഥിരീകരിച്ചത്. നൂറിലധികം ഹെയ്തിക്കാർ ഈ ആഴ്ച അമേരിക്കയിൽ നിന്ന്​ വരുമെന്നും​ ഹെയ്തി പ്രധാനമന്ത്രി ജോസഫ് ജൗത്ത് പറഞ്ഞു. “അവർ വീട്ടിലേക്ക് വരുന്നു, ഞങ്ങൾ അവരെ സ്വീകരിക്കും” അദ്ദേഹം പറഞ്ഞു. അമേരിക്കയിൽ നിന്ന്​ വന്ന 51 പേർക്ക്​ കൊറോണ ബാധിച്ചതായി ഗ്വാട്ടിമല പ്രസിഡൻറ്​ അലജാൻഡ്രോ ജിയാമട്ടേയി തിങ്കളാഴ്ച അറിയിച്ചിരുന്നു.