ഫ്രാൻസിലെ ഇസ്​ലാം വിരുദ്ധ ബിൽ; നിയമം ലക്ഷ്യംവക്കുന്നതാരെ? പ്രധാന വ്യവസ്​ഥകൾ ഇതാണ്​

റാഡിക്കൽ ഇസ്​ലാമിനെതിരേ എന്ന പേരിൽ ഫ്രാൻസ്​ നടപ്പാക്കാനൊരുങ്ങുന്ന നിയമത്തിലെ സുപ്രധാന വ്യവസ്​ഥകൾ പുറത്തുവന്നു. 'തീവ്ര ഇസ്ലാമികത' നേരിടുന്നത്​​ ലക്ഷ്യമിടുന്ന കരട് നിയമം ഫ്രഞ്ച് മന്ത്രിസഭയിൽ ബുധനാഴ്ച അവതരിപ്പിച്ചിരുന്നു. 'ഇസ്ലാമിസ്റ്റ്'എന്ന വാക്ക് കരടി​െൻറ ഭാഗമായിട്ടില്ലെങ്കിലും നിരവധി സംശയങ്ങളാണ്​ ബില്ലിനെപറ്റി ഫ്രാൻസിൽ ഉയരുന്നത്​. 'റിപ്പബ്ലിക്കൻ തത്വങ്ങൾ ശക്തിപ്പെടുത്തുന്നതിന്'എന്നപേരിൽ നടപ്പാക്കാനൊരുങ്ങുന്ന ബിൽ ജനുവരിയിൽ ദേശീയ അസംബ്ലിയിയിൽ അവതരിക്കും. ബില്ലിനെ 'വിഭജന​ നിയമം' എന്നാണ്​ ലോകത്തെ മനുഷ്യാവകാശ പ്രവർത്തകർ വിശേഷിപ്പിക്കുന്നത്​.

'ഇത് ഏതെങ്കിലും മതത്തിനെതിരെയോ മുസ്​ലിംഗൾക്കെതിരെയോ ഉള്ള നിയമമല്ല. മറിച്ച് ഫ്രഞ്ച് ജനതയെ ഭിന്നിപ്പിക്കുന്ന തീവ്ര ഇസ്ലാമികതയ്‌ക്കെതിരെയുള്ളതാണ്'-ഫ്രഞ്ച്​ പ്രധാനമന്ത്രി ജീൻ കാസ്​റ്റെക്​സ്​ പറഞ്ഞു. അടുത്ത കാലത്തായി ഫ്രാൻസിൽ നടന്ന തുടർച്ചയായ ഭീകരാക്രമണങ്ങളുടെ പശ്ചാത്തലത്തിലാണ് ബിൽ കൊണ്ടുവരുന്നത്. യൂറോപ്പിൽ ഏറ്റവും കൂടുതൽ മുസ്‌ലിംഗളുള്ള രാജ്യമായ ഫ്രാൻസി​െൻറ നീക്കം ലോകവ്യാപകമായി കടുത്ത പ്രതിഷേധമാണ്​ ഉണ്ടാക്കിയിരിക്കുന്നത്​.

നിയമം ലക്ഷ്യമിടുന്നത്​

സ്​കൂൾ വിദ്യാഭ്യാസ പരിഷ്​കാരങ്ങൾ, പള്ളികളിലും മതപ്രസംഗകരിലും കർശനമായ നിയന്ത്രണങ്ങൾ, ഓൺലൈനിൽ വിദ്വേഷ പ്രചാരണങ്ങൾക്കെതിരായ നിയമങ്ങൾ എന്നിവ ഉൾപ്പെടെ നിരവധി നടപടികൾ പുതിയ ബില്ല്​ വിഭാവനം ചെയ്യുന്നു. നിയമം പ്രാബല്യത്തിൽ വന്നാൽ ഫ്രഞ്ച് പള്ളികളുടെ പ്രവർത്തനങ്ങളുടെമേൽ കടുത്ത നിരീക്ഷണം ഏർപ്പെടുത്താനാകും. ഇമാമുകൾക്ക്​ സ്​റ്റേറ്റ്​ നേരിട്ട്​ പരിശീലനം നൽകാനും ബില്ല്​ വ്യവസ്​ഥചെയ്യുന്നു. ലിംഗസമത്വം പോലുള്ള 'റിപ്പബ്ലിക്കൻ തത്വങ്ങൾക്ക്'എതിരാണെന്ന്​ തോന്നിയാൽ പൊതു സബ്‌സിഡി ലഭിക്കുന്ന ആരാധനാലയങ്ങൾ അടച്ചുപൂട്ടാനും സർക്കാരിന് അധികാരമുണ്ടായിരിക്കും. മിതവാദികളായ മതനേതാക്കൾക്ക് സംരക്ഷണം ലഭിക്കും.

മൂന്ന് വയസ്സിന് മുകളിലുള്ള കുട്ടികൾക്കായി ഹോം-സ്​കൂളിങ്​ ഏർപ്പെടുത്തും. 'കന്യകത്വ സർട്ടിഫിക്കറ്റ്' നൽകുന്ന ഡോക്ടർമാർക്ക് പിഴയോ ജയിൽശിക്ഷയോ നൽകും. ബഹുഭാര്യത്വ അപേക്ഷകർക്ക് റെസിഡൻസി പെർമിറ്റ് നൽകുന്നതിൽ നിന്ന് ഉദ്യോഗസ്ഥരെ വിലക്കും. വിവാഹത്തിന് മുമ്പ് ദമ്പതികളെ സിറ്റി ഹാൾ അധികൃതർ പ്രത്യേകം അഭിമുഖം നടത്തും. നിർബന്ധിച്ചാണോ വിവാഹം നടത്തുന്നത്​ എന്ന്​ തിരിച്ചറിയാനാണിത്​. ഓൺലൈൻ വിദ്വേഷ ​പ്രചരണത്തിന് കർശന ശിക്ഷകൾ ഏർപ്പെടുത്താനും നിയമം വ്യവസ്​ഥ​െചയ്യുന്നു.

അനന്തരഫലം

ഫ്രഞ്ച് മുസ്‌ലിംകളെ അന്യവത്കരിക്കാൻ ബിൽ കാരണമാകുമെന്ന് വിമർശകർ ഇതിനകംതന്നെ ആശങ്ക പ്രകടിപ്പിച്ചുകഴിഞ്ഞിട്ടുണ്ട്​. ഫ്രഞ്ച്​ പ്രസിഡൻറ്​ ഇമ്മാനുവൽ മാക്രോൺ 2022 ൽ വീണ്ടും തിരഞ്ഞെടുപ്പിനെ അഭിമുഖീകരിക്കുന്നുണ്ട്​. രാജ്യത്തെ തീവ്ര വലതുപക്ഷത്തി​െൻറ സഹായം തെരഞ്ഞെടുപ്പിൽ ഉറപ്പാക്കാനാണ്​ മാക്രോണി​െൻറ പുതിയ നീക്കങ്ങളെന്നാണ്​ വിലയിരുത്തൽ.